14 SEPTAMBRA 2023 | VAOVAO FARANY: 22 SEPTAMBRA 2023
ROSIA

VAOVAO FARANY: VOAHELOKA IREO ANABAVY | Ny Vavaka no Manampy ny Anabavy Telo Hatanjaka Foana

HANDEFA

Nomelohin’ny Fitsaram-paritr’i Zeya any amin’ny Faritr’i Amour ny Ranabavy Margarita Moiseyenko sy Galina Yatsik ary Yelena Yatsyk. Nomena sazy mihantona telo taona i Margarita, roa taona i Galina, ary roa taona sy tapany i Yelena. Tsy mbola naiditra am-ponja aloha ry zareo amin’izao.

Ireo voampanga

Margarita Moiseyenko

Teraka: 1978 (Krasnoyarsk, Faritanin’i Krasnoyarsk)

Mombamomba azy: Mpanjaitra no asany. Nanambady an’i Konstantin tamin’ny 1998. Voaheloka i Konstantin tamin’ny 14 Jolay 2021, dia nomena sazy mihantona enin-taona

Nisy havany akaiky maty tamin’izy 18 taona, dia nanomboka nianatra Baiboly izy. Natao batisa dia lasa Vavolombelon’i Jehovah tamin’ny 2001

Resadresaka nifanaovana taminy

Inona no manampy anao hiaritra foana?

Tadidiko fa noresahina tamin’ilay fivoriamben’ny vondrom-paritra hoe “Manàna Herim-po”! tamin’ny 2018 ny Ohabolana 21:31. Voalaza ao hoe: “Voaomana hampiasaina amin’ny andron’ny ady ny soavaly, fa avy amin’i Jehovah kosa ny famonjena.” Mora matahotra kely ny soavaly, dia tsy maintsy ‘omanina’ tsara ry zareo vao alefa mandeha miady. Hoatr’izany koa isika. Tsy hoe vao teraka isika dia efa manam-pinoana sy be herim-po. Tsy maintsy miezaka hanana an’ireo toetra ireo isika mba ho vonona hiady. Dia raha te hanana an’ireo toetra ireo aho, dia tena mila miezaka hinamana be amin’i Jehovah sy hianatra tsara ny Baiboly. Mila mivavaka koa aho mba tsy hihena mihitsy ny finoako na inona na inona mitranga.

Galina Yatsik a

Teraka: 1950 (Zeya)

Mombamomba azy: Mpandinika ny vola mivoaka amin’ny fanorenana sy fikojakojana tanàna. Efa misotro ronono

Nanambady an’i Valeriy tamin’ny 1971. Manan-janaka mianadahy ry zareo. Maty vady tamin’ny 1995

Nobeazina tsy hino an’Andriamanitra, nefa lasa saina foana hoe ahoana no nampisy ny fiainana. Lasa namaky ny gazety Ny Tilikambo Fiambenana sy Mifohaza! dia nanomboka nanatrika fivoriana. Nahita porofo dia resy lahatra hoe misy ny Mpamorona. Natao batisa tamin’ny 1994

Resadresaka nifanaovana taminy

Inona no nianaranao momba ny vavaka avy amin’izao zava-tsarotra iainanao izao?

Nianarako hoe tena zava-dehibe ny manao vavaka fohy rehefa misy zavatra tsy ampoizina mitranga. Manampy ahy ho tony sy hahalala an’izay tokony hatao mantsy izany. Mahafinaritra be koa ny mahafantatra hoe misy olon-kafa mivavaka ho ahy any ho any. Hoy ny Jakoba 5:16 hoe: “Misy vokany be ny fitalahoan’ny olo-marina.” Ireny vavaka ataon’ny anadahy sy rahavaviko ho ahy ireny no anisan’ny mahatonga ahy hilamin-tsaina foana sy tsy hatahotra be. Hoatran’ny lakan’aina ho ahy ny vavaka, na ny vavaka ataoko izany na izay ataon’ny olon-kafa ho ahy. Efa nilentika aho hoatr’izay raha tsy nisy an’ireny.

Yelena Yatsyk b

Teraka: 1972 (Zeya)

Mombamomba azy: Mpanjaitra no asany

Nanambady an’i Andrey tamin’ny 1994. Manan-janaka vavitokana ry zareo

Ny maman’i Yelena sy Yevgeniy Bitusov, zandriny lahy, no nianatra Baiboly niaraka tamin’ny Vavolombelon’i Jehovah voalohany. Hitan’i Yelena hoe mahasoa ny torolalan’ny Baiboly sady nanatsara ny fiainany ny fampiharany azy ireny. Natao batisa tamin’ny 1997

Resadresaka nifanaovana taminy

Inona no vokatr’izao fanenjehana izao aminao?

Vao mainka nihamafy ny fifandraisako amin’i Jehovah. Rehefa mivavaka aminy aho mba ho tony, dia tena ataony milamin-tsaina aho. Vao mainka koa aho izao mankasitraka ny anadahy sy rahavaviko. Fantatro hoe eo foana ry zareo vonona hanampy ahy, dia tena mampionona ahy izany. Tena hoatran’ny hoe anisan’ny fianakaviambe anankiray mihitsy aho. Vao mainka koa izao tsapako hoe tena ilaina ny mivavaka ho an’izay migadra hoatran’i Yevgeniy anadahiko. Mivavaka ho an-dry zareo foana aho isan’andro.

Hanampy antsika hiezaka hanana ny toetra ilaina mba handresena an’izay fitsapana mahazo antsika ny tantaran’ireo anabavintsika ireo. Mampahatsiahy antsika koa izany hoe henon’i Jehovah ny vavaka ataontsika.—1 Jaona 5:14.

Zava-nitranga

21 Martsa 2019

Nosavana ny tranon-dry Moiseyenko
13 Oktobra 2020

Nosavana ny tranon-dry Yelena sy Galina
22 Novambra 2021

Nisokatra ny raharaha iampangana an-dry zareo ho nanao heloka bevava
15 Febroary 2022

Tsy navela hiala lavitra ny toerana misy azy
24 Aprily 2023

Nanomboka ny fitsarana

a b Tsy mpihavana ny Ranabavy Galina Yatsik sy Yelena Yatsyk.

Jereo Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO