27 MARTSA 2024 | VAOVAO FARANY: 13 MEY 2024
ROSIA

VAOVAO FARANY: VOAHELOKA IREO RAHALAHY | Matoky An’i Jehovah sy Vonona ary Faly Foana ry Zareo

HANDEFA

Tamin’ny 13 Mey 2024, dia nomelohin’ny Fitsaram-paritr’i Leninski any Barnaul, Faritanin’i Altaï, ny Rahalahy Yuriy Kolotinskiy sy Mikhail Reshetnikov ary Anatoliy Sarychev. Nahazo sazy mihantona roa taona sy telo volana avy ry zareo, fa mbola tsy nampidirina am-ponja aloha izao.

Ireo voampanga

Yuriy Kolotinskiy

Teraka: 1955 (tany Moldavia)

Mombamomba azy: Mpampandeha milina tao amin’ny toeram-pitrandrahana.

Nanambady an’i Nataliya tamin’ny 1977

Nieritreritra hoe nahoana ny olona no mijaly. Nahita valiny mazava tsara tao amin’ny Baiboly rehefa nianatra Baiboly tamin’ny Vavolombelon’i Jehovah. Samy natao tamin’ny 1995 i Yuriy sy Nataliya

Resadresaka nifanaovana taminy

Tantaran’iza ao amin’ny Baiboly no manampy anao hatoky hoe manohana anao i Jehovah?

Mieritreritra foana momba an’ireo Israelita avy niala tany Ejipta aho. Nitarika sy niaro an-dry zareo foana i Jehovah tamin’izy ireo tany an-tany efitra. Tsapako hoe manao zavatra mitovy amin’izany ho ahy koa izy. Isaky ny mandeha eny amin’ny fitsarana aho, dia eritreretiko foana hoe mandeha eo alohako i Jehovah. Tsapako hoe manohana ahy izy ka lasa matoky aho hoe tia ahy izy ary hanome hery ahy mba hiaretana sy tsy hivadihana na inona na inona mitranga. Vao mainka matanjaka ny finoako sady resy lahatra aho hoe mety ny zavatra ataoko. Vonona hanao izay rehetra azoko atao aho mba hiarovana ny anaran’i Jehovah.

Mikhail Reshetnikov

Teraka: 1949 (tany Maksiner, Faritanin’i Kirov)

Mombamomba azy: Saoferana bisy sy kamiao efa maherin’ny 50 taona

Manan-janaka mianadahy izy sy ny vadiny voalohany. Matin’ny kansera io vadiny io tatỳ aoriana. Nanambady an’i Antonina izy tamin’ny 2021

Nanana fanontaniana be dia be momba ny Baiboly nefa tsy nahazo valiny tao amin’ny fiangonany. Faly be fa nahafantatra ny fahamarinana rehefa nianatra Baiboly tamin’ny Vavolombelon’i Jehovah. Natao batisa tamin’ny 2000

Resadresaka nifanaovana taminy

Nahoana no nanampy anao ny niomana hiatrika fanenjehana?

Vao nanomboka nosamborina sy nogadraina ireo rahalahy sy ranabavy, dia tonga aho dia nivavaka tamin’i Jehovah. Nangataka taminy aho mba homeny fahendrena sy fifehezan-tena, amin’izay aho ho vonona rehefa hiharan’izany. Imbetsaka izy no nanampy ahy, ka nanome toky ahy izany hoe mamaly vavaka foana izy amin’ny fotoana mety amin’izany. Matoky aho hoe eo akaikiko eo foana izy. Lasa tsy matahotra an’izay didy mety havoakan’ny fitsarana momba ahy aho vokatr’izany. Fantatro hoe afaka ny tsy hivadika amin’i Jehovah aho rehefa ampiany.

Anatoliy Sarychev

Teraka: 1949 (tany Karpovo, Faritanin’i Altaï)

Mombamomba azy: Mpanamboatra sary no asany taloha, fa efa misotro ronono

Nanambady an’i Nadezhda tamin’ny 1990. Manan-janakalahy iray ry zareo

Nisy Vavolombelon’i Jehovah nitsidika azy tamin’izy vao avy nodidiana. Nampahery azy ny fampanantenan’i Jehovah hoe hofoanany ny herisetra sy fijaliana. Natao batisa i Nadezhda tamin’ny 2001 ary i Anatoliy tamin’ny 2002

Resadresaka nifanaovana taminy

Inona no manampy anao ho faly foana?

Saintsainiko ilay voaresaka ao amin’ny 1 Petera 3:14 hoe: “Fa na mijaly aza ianareo satria manao ny marina, dia sambatra ianareo.” Nanenjika an’ireo apostoly ny Fariseo satria tsy nety nitsahatra nitory mihitsy ry zareo. Nalam-baraka ireo apostoly ireo noho ny anaran’i Jesosy, fa noraisin-dry zareo hoe zavatra mahafaly anefa izany. Te hanahaka an-dry zareo aho. Tsisy antony tokony hahakivy ahy satria hoe enjehina aho. Faly kosa aho mahalala hoe efa nenjehina hoatr’ahy koa ny Kristianina voalohany sy Jesosy Kristy.

Faly be isika manana rahalahy hoatran-dry zareo. Modely ho antsika ry zareo satria manam-pinoana sy matoky an’i Jehovah isika. Matoky isika hoe hanampy azy ireo foana i Jehovah satria tsy mivadika amin-dry zareo izy sady tena tia an-dry zareo.—Salamo 25:10.

Zava-nitranga

25 Mey 2021

Nampangaina hoe mpanao heloka bevava i Mikhail
27 Mey 2021

Nosavana ny tranon’i Mikhail. Natao famotorana izy sy Antonina. Tsy navela nanao dia lavitra i Mikhail
6 Oktobra 2022

Nampangaina hoe mpanao heloka bevava i Anatoliy sy Yuriy ary natambatra ny raharaha mahakasika an-dry zareo sy Mikhail
7 Oktobra 2022

Tsy navela hanao dia lavitra i Anatoliy sy Yuriy
19 Janoary 2023

Nanomboka ny fitsarana

Jereo Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO