24 JANOARY 2022 | VAOVAO FARANY: 29 DESAMBRA 2023
ROSIA

VAOVAO FARANY: VOAHELOKA IREO RAHALAHY | Nahazo Fitahiana Be dia Be ny Rahalahy Aleksandr Polozov sy Stepan Shevelev na dia Nenjehina Aza

HANDEFA

Tamin’ny 29 Desambra 2023, dia nomelohin’ny Fitsarana any Norilsk, any amin’ny Faritanin’i Krasnoïarsk, ny Rahalahy Aleksandr Polozov sy Stepan Shevelev. Nahazo sazy mihantona enin-taona avy ry zareo fa mbola tsy nampidirina am-ponja aloha izao.

Zava-nitranga

20 Oktobra 2019

Nisy miaramila be dia be nanodidina ny toby filasiana tany Norilsk. Vavolombelona 50 mahery no voatazona
26 Oktobra 2019

Nosamborina i Aleksandr dia notanana am-ponja vonjimaika
21 Janoary 2020

Nafahana i Aleksandr telo volana latsaka tatỳ aoriana
19 Febroary 2020

Nampidirina ho anisan’ny olona mpampihorohoro i Aleksandr, dia tsy nataon’ny banky nandeha intsony ny kaontiny
6 Mey 2021

Nampangaina i Stepan hoe “niray tsikombakomba tamin’ny resaka heloka bevava” niaraka tamin’i Aleksandr. Anisan’ny “heloka bevava” nataon’i Stepan, hono, ny nivavaka sy nitory

Ilay voampanga

Aleksandr Polozov

Teraka: 1970 (tany Torzhok, Faritr’i Tver)

Mombamomba azy: Tia nanao hockey sy nilomano izy tamin’izy mbola tanora. Niasa tamina orinasa mpamonjy voina. Nanambady an’i Svetlana tamin’ny 1998. Tia mitaingina bisikileta sy mandehandeha ry zareo

Nanomboka nianatra Baiboly tamin’ny Vavolombelon’i Jehovah tamin’ny 1990 mahery tany ho any. Natao batisa tamin’ny 1995

Resadresaka nifanaovana taminy

Ahoana no nanampian’i Jehovah anao tamin’ianao notanana am-ponja vonjimaika?

Nohidiana tao amin’ny efitra kely izay aho rehefa avy natao famotorana voalohany. . . . Nanontanian’ilay olona iray efitra tamiko tao aho tamin’izay hoe fa maninona aho no nigadra. Dia nohazavaiko azy hoe noho ny finoako an’Andriamanitra no nanamelohana ahy. . . . Dia hoy izy: “Jereo ange ao ambany latabatra ao e!” Dia nijery aho. Hay Baiboly anankiroa no tao, teo amin’izay talantalana izay. Hoatran’ny hoe nanonofy aho! . . . Tsy nampoiziko hoe ny andro voalohany dia efa nanana ny Tenin’Andriamanitra aho. Tena nisaotsaotra an’i Jehovah aho fa miavaka be mihitsy iny nanampiany ahy iny.

Ahoana no nanampian’ny mpiara-manompo anao?

Tsy hitako izay fomba ilazana azy fa tena nanampy be anay mihitsy ny mpiara-manompo. Indray maraina izay, tamin’izaho hiala an’ilay fonja nitanana ahy mba hoentina any amin’ny fitsarana, dia nisy mpiara-manompo maromaro niarahaba ahy sady nitehatehaka be daholo. Ny andro amin’io mangatsiaka be! Dia mbola nitehatehaka be ihany ry zareo, rehefa nentina hankeny amin’ilay aotomobilina hitondra ahy ho any am-ponja indray aho, tamin’ny 6 hariva. Tena sarobidy be mihitsy izany tamiko, sady tonga dia fitoriana vita ho azy.

Stepan Shevelev

Teraka: 1982 (tany Maslyanino, Faritr’i Novossibirsk)

Mombamomba azy: Miasa amin’ny orinasa mpanamboatra kabla. Nanambady an’i Oksana tamin’ny 2013. Tia mamaky boky sy manao dia lavitra

Tamin’ny 1996 ny maman’i Stepan sy ny anabaviny no nanomboka nianatra Baiboly. Samy nijanona tsy nianatra intsony ilay mamany sy ilay anabaviny. Nanomboka nianatra Baiboly anefa i Stepan ary tena gaga tamin’ny zavatra nampianarin’ny Vavolombelon’i Jehovah. Tena tiany ilay hoe mahavita manatsara fiainan’olona ny Baiboly. Natao batisa tamin’ny 2001

Resadresaka nifanaovana taminy

Nahoana no nanampy anareo mivady ny hoe zatra manao zavatra ara-panahy?

Tena tianay be ny manao fotoam-pivavahan’ny fianakaviana. Nifidy andro anankiray hanaovanay an’ilay izy izahay, taona maro lasa izay, dia tsy nisy zavatra navelanay hanelingelina an’ilay izy mihitsy. Ireny no mahatonga ahy hatoky hoe hatanjaka foana ny finoan’ny vadiko. Ataoko mahafinaritra an’ahy foana koa ny famakiako Baiboly isan’andro. Indray taona izay, ohatra, nasesiko hatrany amin’ny voalohany fotsiny ilay izy. Dia taorian’izay indray, novakiko arakaraka ny fotoana nitrangany. Dia tatỳ aoriana nosokajiko arakaraka izay mpanoratra azy ilay izy, dia hoatr’izany hatrany hatrany no namakiako azy. Amin’izay mantsy tsy hoatran’ny hoe fahazarana fotsiny ny famakiako Baiboly. Mahita hevitra vaovao koa izaho na dia amin’ny andinin-teny efa mahazatra an’ahy aza.

Inona no nanampy anao hanova ny fahitanao ny olona manenjika anao?

Nampian’i Jehovah [aho] dia lasa mitovy fomba fihevitra aminy [momba an-dry zareo]. Imbetsaka izahay mivady no mahita hoe olon-tsotra manao ny asany fotsiny ange ry zareo raha ny marina e. Mba manana olana koa ry zareo, dia mila itoriantsika ny zavatra ampanantenain’ny Baiboly.

Matoky isika fa mbola hanohana ny mpiara-manompo amintsika any ihany i Jehovah. (Salamo 94:14) Tsy mivadika mihitsy mantsy ry zareo ka tsy miala amin’ny fahamarinana mihitsy, na dia enjehina aza.

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO