1 OKTOBRA 2021 | VAOVAO FARANY: 29 AOGOSITRA 2023
ROSIA

VAOVAO FARANY: VOAHELOKA IREO RAHALAHY | Rahalahy Dimy Tapa-kevitra ny Tsy Hivadika na dia Enjehina Aza

HANDEFA

Nomelohin’ny Fitsaram-paritr’i Promyshlenniy any Orenburg ny Rahalahy Vladimir Kochnev, Vladislav Kolbanov, Pavel Lekontsev, Sergey Logunov, ary Nikolay Zhuginny. Sazy mihantona roa taona sy tapany ka hatramin’ny telo taona sy tapany no azon-dry zareo. Mbola tsy nampidirina am-ponja aloha ry zareo izao.

Zava-nitranga

1 Martsa 2021

Herintaona taorian’ny namerenana an’ilay raharaha tany amin’ny mpampanoa lalàna dia nanomboka ny fitsarana teny amin’ny Fitsaram-paritr’i Promyshlenniy any Orenburg
14 Janoary 2020

Naverina tany amin’ny biraon’ny mpampanoa lalàna ilay raharaha satria tsy nazava tsara hoe inona no niampangana an’ireo rahalahy ireo
3 Aogositra 2018

Nafahana i Vladimir ary nambenana tao an-trano rehefa avy natao am-ponja vonjimaika nandritra ny 79 andro
16 Mey 2018

Nanao savahao tranona fianakaviana 19 tao amin’ny Faritr’i Orenburg ny manam-pahefana. Natao am-ponja vonjimaika i Vladimir sy Vladislav. Nafahana i Vladislav rehefa afaka telo andro ary nambenana tao an-trano
14 Mey 2018

Nampangain’ny Biraon’ny Famotorana Sahanin’ny Komity Mpanao Famotorana any Rosia ho an’ny Faritr’i Orenburg hoe mpanao heloka bevava ny rahalahy dimy

Ireo voampanga

Vladimir Kochnev

Teraka: 1979 (Orenburg)

Mombamomba azy: Tia nanjono sy nilalao baolina tamin’izy mbola kely. Mpanefy sy mpanamboatra tele na radio no asany. Vita batisa ary lasa Vavolombelon’i Jehovah tamin’ny 1993. Nanambady an’i Galina tamin’ny 2003

Resadresaka nifanaovana taminy

Vao mainka nifandray tsara tamin’i Jehovah ve ianao rehefa niaritra fanenjehana?

Tamin’iny izaho notanana am-ponja vonjy maika iny aloha no tiako indrindra ny fifandraisako tamin’i Jehovah e! Nianatra natoky an’i Jehovah kokoa aho satria izaho irery no tany sady tsy afa-nanoatra aho.

Inona ny torohevitra homenao an’izay miomana ho amin’ny fanenjehana raha te hampiasa tsara ny fotoanany ry zareo?

Raha ny marina, tsy hoe tsy maintsy tonga dia lasa tsara toetra kokoa na lasa ratsy toetra kokoa ny olona iray rehefa enjehina. Rehefa enjehina izy no hita hoe hoatran’ny ahoana ny tena maha izy azy. Hatanjaka foana ny finoantsika raha manana fahazarana tsara isika, ohatra hoe mivavaka tsy tapaka amin’i Jehovah, mianatra ny Teniny, ary manatrika fivoriana. Tsy tokony hiandry zavatra miavaka be hitranga isika vao hanatsara ny fifandraisantsika amin’i Jehovah. Tsy andrasantsika hoe misy zavatra mihatra amintsika vao hanomboka hamaky Baiboly isan’andro isika na hazoto hivavaka.

Vladislav Kolbanov

Teraka: 1992 (Orenburg)

Mombamomba azy: Nanomboka nianatra Baiboly ny mamany tamin’izy enin-taona. Natao batisa ary lasa Vavolombelon’i Jehovah tamin’ny 2008. Nangataka hanao fanompoana sivily izy tamin’izy 18 taona fa tsy te hanao miaramila. Mikarakara be taona tany amin’ny trano fitaizana be antitra no fanompoana sivily nataony

Resadresaka nifanaovana taminy

Nahoana ianao no vao mainka tapa-kevitra ny hanompo an’i Jehovah rehefa avy niatrika an’iny zavatra nahazo anao iny?

Matetika aho no nisy nanontany hoe: ‘Raha nanan-tsafidy ve ianao dia tianao raha tsy nampangaina hoe mpanao heloka bevava tamin’iny?’ Rehefa mieritreritra an’izany aho dia hozy aho hoe tsy nisy nanenenako mihitsy ireny zavatra nahazo ahy ireny. ... Hitako tamin’ireny mantsy hoe manampy ahy ny tanan’i Jehovah, dia tsapako hoe manohana ahy ny mpiara-manompo.

Hitako hoe rehefa miaritra zavatra mafy isika vao lasa mahay miaritra. Hatanjaka anefa ny finoantsika rehefa miaritra isika ary vao mainka isika ho tia an’i Jehovah.

Pavel Lekontsev

Teraka: 1981 (Kytat, Faritr’i Krasnoïarsk)

Mombamomba azy: Efa tia zavaboary hatramin’ny mbola kely. Tia mitsangantsangana, manjono, ary maka olitra. Nanao asa mifandray amin’ny fanorenana. Nanomboka nianatra Baiboly tamin’ny Vavolombelon’i Jehovah tany amin’ny taona 1998 tany ho any. Lasa tsapany hoe tsy ho sambatra mihitsy izy raha tsy manaraka ny fitsipiky ny Baiboly. Vita batisa tamin’ny 1999. Nanambady an’i Oksana tamin’ny 2017

Resadresaka nifanaovana taminy

Ahoana no nataonao rehefa nisava ny tranonareo ny polisy, dia rehefa natao famotorana sy nampangaina ianao?

Gaga aho hoe haingana be ny namalian’i Jehovah ny vavaka nataoko, rehefa niditra an-keriny tao an-trano ny polisy. Izay vavaka nataoko izay anefa angamba no vavaka fohy indrindra nataoko hatramin’izay. Nivavaka tamin’i Jehovah aho mba ho tony. Dia teo no ho eo ihany aho dia tony fa tsy nila niandry ela akory. Afaka nisaina tsara koa aho.

Tapa-kevitra hanao inona ianao izao, na ahoana na ahoana ny hiafaran’ilay raharaha?

Sarotra be ny hahafantatra hoe inona ny fanapahan-kevitra horaisin’ny fitsarana. Ny azoko antoka anefa dia hoe hanome hery ahy foana i Jehovah. Mpandresy foana tsinona isika na inona na inona holazain’ny fitsarana eo! Na ho sarotra hoatran’inona aza ny eny amin’ny fitsarana, dia azoko antoka hoe hanome antsika ny fanahy masina ilaintsika i Jehovah. Resy lahatra ny amin’izany aho satria imbetsaka aho no nahita an’izany hatramin’izay nanompoako azy izay. Vao mainka aho izao tapa-kevitra ‘hamita an’ilay hazakazaka hatramin’ny farany.’—2 Timoty 4:7.

Sergey Logunov

Teraka: 1962 (Orenburg)

Mombamomba azy: Nahazo fampiofanana manokana momba ny fampiasana milina. Niasa tao amin’ny tafika, dia avy eo lasa mpaka sary matihanina. Mpikarakara zaridaina no asany farany. Mbola maka sary izy fa ataony fialam-boly. Tia mitendry gitara koa. Nanomboka nianatra Baiboly tany amin’ny taona 1990 tany ho any. Natao batisa tamin’ny 1992. Nanambady an’i Larisa tamin’ny 1994

Resadresaka nifanaovana taminy

Inona ny torohevitra omenao an’izay te hiomana ho amin’ny fanenjehana?

Efa fantatsika hoe rehefa miatrika olana isika vao ho hita hoe hivadika sa tsia. Mila manatanjaka ny fifandraisantsika amin’i Jehovah sy Jesosy Kristy isika dieny izao mba hiatrehana an’izany. Hoatran’ny sabatra ihany. Alohan’ny ady ilay izy no hamafisina mba tsy ho mora tapaka rehefa any an’ady. Rehefa azon’ny miaramila iray antoka hoe mafy ny sabany, dia hatoky tena kokoa izy mandritra ny ady. Nilaza i Jesosy hoe “izay mendri-pitokisana amin’ny zavatra kely dia mendri-pitokisana koa amin’ny zavatra lehibe.” (Lioka 16:10) Dieny izao àry isika no tokony hankatò an’i Jehovah amin’ny zava-drehetra. Hoatran’ny hoe manao fanazaran-tena isika raha manao an’izany, ka rehefa tena tonga ny fanenjehana dia ho mora kokoa amintsika ny tsy hivadika.

Nikolay Zhugin

Teraka: 1976 (Kazakhstan)

Mombamomba azy: Tia nanao spaoro tamin’ny mbola kely. Mpanao sodiora no asany. Nanomboka nianatra Baiboly tamin’ny Vavolombelon’i Jehovah tany amin’ny taona 1995 tany ho any. Natao batisa tamin’ny 1996. Mianadahy ny zanany, ary na dia tsy Vavolombelona aza i Galina vadiny dia sambatra izy mianakavy

Resadresaka nifanaovana taminy

Inona ny zavatra nitalahoanao tamin’i Jehovah tamin’ireny fotoana ireny?

Fantatro hoe tsy esorin’i Jehovah ny olana sy ny fanenjehana mihatra amin’ny mpanompony, fa avelany hitranga. Izany no nahatonga ahy hangataka ny fanahy masina mba ho afaka hiaritra, ary mbola mangataka an’izany foana aho hatramin’izao. Hitako hoe nampian’i Jehovah aho nandritra ny famotorana sy ny fitsarana dia falifaly foana. Tsy ho vitako mihitsy ny hiatrika an’izao raha tsy eo izy!

Telo taona izay izy dimy mirahalahy no niady ho an’ny finoany. Hita hoe tapa-kevitra ny tsy hivadika amin’i Jehovah ry zareo. Miharihary koa hoe tsy mivadika amin-dry zareo i Jehovah.—2 Samoela 22:26.

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO