23 DESAMBRA 2021 | VAOVAO FARANY: 29 AOGOSITRA 2023
ROSIA

VAOVAO FARANY: VOAHELOKA IZY MIVADY | Milamin-tsaina ry Postnikov Noho ny Fandaharana Ataon’i Jehovah

HANDEFA

Nomelohin’ny Fitsaram-paritr’i Birobidzhanskiy any amin’ny Faritra Mahaleo Tena Jiosy ny Rahalahy Oleg Postnikov sy Ranabavy Agnessa Postnikova, tamin’ny 23 Aogositra 2023. Nomena sazy mihantona dimy taona sy tapany i Oleg, ary efa-taona sy tapany i Agnessa. Mbola tsy naiditra am-ponja aloha ry zareo izao.

Nofoanan’ny fitsarana any amin’ny Faritra Mahaleo Tena Jiosy ny fanamelohana ny Rahalahy Oleg Postnikov sy Ranabavy Agnessa Postnikova, tamin’ny 11 Oktobra 2022. Haverina hotsaraina indray àry izy mivady.

Nomelohin’ny Fitsaram-paritr’i Birobidzhanskiy any amin’ny Faritra Mahaleo Tena Jiosy i Oleg sy Agnessa, tamin’ny 25 Aprily 2022. Sazy mihantona dimy taona sy tapany no nomena an’i Oleg, ary dimy taona ny an’i Agnessa. Mbola tsy migadra ry zareo izao.

Zava-nitranga

12 Febroary 2021

Nampangain’ny FSB ho mpanao heloka bevava i Agnessa. Nolazaina hoe nanangana antokon’olona “mpanao heloka bevava”, hono, ry Postnikov sady miresadresaka amin’olona ny tanjon-dry zareo, nefa “mampidi-doza”, hono, ilay izy. Tsy nahazo niala tao amin’ilay faritra nisy an-dry zareo i Oleg sy Agnessa sady tsy nahazo naka vola tao amin’ny kaontiny tany amin’ny banky. Nampidirina tao amin’ilay lisitra misy an’ireo olona heverin’i Rosia hoe mpampihorohoro koa ny anaran-dry zareo
12 Febroary 2020

Nampangain’ny FSB ho mpanao heloka bevava i Oleg

Ireo voampanga

Oleg Postnikov

Teraka: 1965 (tany Vyazemsky, Faritanin’i Khabarovsk)

Mombamomba azy: Mpikarakara fantson-drano no asany taloha. Lasa niaraka tamin’ny andian-jiolahy tamin’izy mbola tanora. Efa nigadra satria nanao heloka bevava. Tany am-pigadrana izy no nianatra Baiboly. Natao batisa izy rehefa afaka tany tamin’ny 1986, dia lasa Vavolombelon’i Jehovah

Nanambady an’i Agnessa tamin’ny 1989. Manan-janaka roa efa lehibe ry zareo

Resadresaka nifanaovana taminy

Ahoana no nahalalanao ny fahamarinana tamin’ianao nigadra?

Nisy Vavolombelona niara-nigadra tamiko satria tsy nety nanao miaramila. ... Niresaka ela be mihitsy izahay, dia noporofoiny tamiko hoe tena misy Andriamanitra sady tsy marina ny evolisiona. Noresahinay koa hoe tena be pitsiny sady mahavariana ny zavaboary eo amin’izao rehetra izao. Niova ny toe-tsaiko taorian’izay. ... Lasa namaky boky sy gazety maromaro navoakan’ny Vavolombelon’i Jehovah aho. ... Mbola nianatra Baiboly foana aho rehefa avy nigadra, dia natao batisa avy eo.

Ahoana no nahitanao hoe ilaina ny matoky an’i Jehovah?

Nivavaka imbetsaka kokoa aho, indrindra rehefa hihaona amin’ilay mpanao famotorana. Fetsifetsy be izy sady tena nahay namitaka. Izay hahatonga ahy hivadika amin’i Jehovah no tanjony. Hitako hoe mety ho nivadika tamin’i Jehovah aho, raha izay hevitra tao an-tsaiko sy izay zavatra mba haiko fotsiny no nentiko namaliana azy. Tsy maintsy natoky tanteraka an’i Jehovah aho sady tsy nanahy be loatra hoe inona no hitranga. Tsy maintsy nanao an’izay aho mba ho tony sy tsy hatahotahotra.

Inona no andinin-teny nampahery anao?

Ilay ao amin’ny Josoa 1:9 no tadidiko matetika. Ilay hoe: “Hanampy anao i Jehovah Andriamanitrao na aiza na aiza alehanao.” Mampahatsiahy ahy io hoe mety tsy maintsy handeha any amin’ny toerana tsy tiako haleha aho, nefa hoatran’ny miteny amiko i Jehovah hoe: ‘Aza manahy fa hiaraka aminao any aho. Izaho ange niaraka tamin-dry Josefa [sy ny mpanompoko hafa tsy nivadika] e! Dia ianao indray ve no havelako handeha irery any?’ Manampy ahy tsy hiady saina be momba an’izay mety hitranga rahampitso izany. Lasa tsy mieritreritra zavatra mahakivy koa aho.

Agnessa Postnikova

Teraka: 1963 (tany Kazakhstan)

Mombamomba azy: Fito mianadahy ry zareo, dia izy no fahadimy. Tia nandihy sy nilalao teatra tamin’izy mbola tanora. Tia nikorisa teny ambony lanezy koa. Tia mankany ambanivohitra izy amin’izao, dia mikarakara voninkazo sy mianika tendrombohitra rehefa any. Niasa tao amina mpanjaitra

Natao batisa tamin’ny 1979. Nanambady an’i Oleg tamin’ny 1989

Resadresaka nifanaovana taminy

Inona no hitanao hoe mampahery anao amin’izao fotoan-tsarotra atrehinao izao?

Misaotra ny Filan-kevi-pitantanana aho fa manome sakafo ara-panahy amin’ny fotoana tena ilana an’izany foana ry zareo. Dia misaotra an’ireo ranadahy sy rahavavy rehetra mandray anjara amin’ny fanomanana hira, filma, video, ary fivoriambe. Misaotra an’izay manampy amin’ny fandikana Baiboly koa. Misaotra an’i Jehovah aho satria omeny fianakaviana tsara fanahy sy mahafinaritra hoatr’izany mba hampahery ahy amin’izao fitsapana atrehiko izao.

Inona amin’ny fandaharana ataon’i Jehovah no tena tianao?

Hitako hoe mahasoa ahy ny mivavaka amin’i Jehovah sy misaintsaina ny hiran’ny fandaminana, ohatra izao ilay hira hoe ‘Ilay Tontolo Vaovao’ sy ilay hoe ‘Efa ao Ambadika Ao.’ Ny zavatra ho hitantsika ao amin’ny tontolo vaovao no aseho ao amin’ireo hira ireo. Mampitony ahy ilay izy sady lasa tsapako hoe tia ahy ilay Raiko.

Hita avy amin’ny tenin’ireo rahalahy sy anabavy ireo hoe ampian’i Jehovah ho vonona hiatrika fitsapana isan-karazany ny vahoakany. Enga anie isika rehetra ka hatoky foana hoe ‘be fitiavana sy tsy mivadika ary mendri-pitokisana’ i Jehovah.—Salamo 115:1.

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO