4 NOVAMBRA 2022
ROSIA

VAOVAO FARANY: VOAHELOKA IZY MIVADY | Nampahery An-dry Zareo ny Tantaran’ny Olona Nanam-pinoana ao Amin’ny Baiboly

HANDEFA

Nomelohin’ny Fitsaram-paritr’i Petropavlovsk-Kamtchatski, any amin’ny Faritanin’i Kamtchatka, ny Rahalahy Dmitriy Semenov sy Nadezhda vadiny tamin’ny 8 Novambra 2022. Samy nomena sazy mihantona efa-taona izy mivady. Mbola tsy naiditra am-ponja aloha ry zareo izao.

Zava-nitranga

3 Septambra 2021

Lasa niara-niasa tamin’ny polisin’ny FSB ny vehivavy iray niresadresaka momba ny Baiboly tamin’i Dmitriy sy Nadezhda. Noho ny fanazavana nampitain’io vehivavy io tamin’ny polisy, dia nampangaina ho mpanao heloka bevava izy mivady. Mandresy lahatra ny olona mba hiditra ao amin’ny fikambanana mampidi-doza sy handray anjara amin’ny asan’izy io, hono, ry zareo
6 Septambra 2021

Natao savahao ny tranon’izy mivady, dia nentina mba hatao famotorana ry zareo ary tsy navela hanao dia lavitra
26 Jolay 2022

Nanomboka ny fitsarana

Ireo voampanga

Dmitriy Semenov

Teraka: 1984 (Petropavlovsk-Kamtchatski)

Mombamomba azy: Nianatra matematika sy informatique. Mpamorona programa amin’ny ordinatera no asany

Havany no nahafantarany ny Vavolombelon’i Jehovah. Natao batisa tamin’ny 2006. Tsy nety nanao miaramila fa naleony nanao fanompoana sivily

Nanambady an’i Nadezhda tamin’ny 2010

Resadresaka nifanaovana taminy

Iza ao amin’ny Baiboly no ataonao modely dia manampy anao hatoky kokoa an’i Jehovah?

Mbola tsy nenjehina aho dia efa nisaintsaina momba ny tantaran’i Jeremia. Ilay izy nogadrain’ny Babylonianina tamin-dry zareo nanao fahirano an’i Jerosalema no tena noeritreretiko. Hoatran’ny hoe tsy nisy na inona na inona azony natao tamin’izay. Nanao zavatra miavaka be anefa i Jehovah mba hiarovana azy. Ny olona tao Jerosalema izao tratran’ny mosary, fa i Jeremia indray tsy ory sakafo sady tafavoaka velona rehefa noravana ilay tanàna. (Jeremia 37:21) Tsy mitovy amin’ny antsika ny fahitan’i Jehovah ny zava-mitranga, na inona izany na inona, sady tonga dia tsinjony hoe hanao ahoana ilay izy. Na dia hoatran’ny hoe tsy misy azo antenaina intsony aza, dia hataon’i Jehovah mahita lalan-kivoahana foana ianao amin’ny fotoana tena mety.

Nadezhda Semenova

Teraka: 1985 (Iekaterinbourg, Faritanin’i Sverdlovsk)

Mombamomba azy: Anisan’ny antoko-mpihira tao an-tsekoly izy tamin’ny mbola kely, dia tiany be ilay izy. Tena tia mandihy koa izy tamin’izany. Mpiandraikitra ny entana ao amin’ny fivarotana iray no asany izao

Ny zokiny vavy no nahafantarany ny fahamarinana. Io zokiny io no nianatra Baiboly voalohany. Lasa Vavolombelon’i Jehovah izy mirahavavy sy ny mamany. Tamin’ny 1997 i Nadezhda no natao batisa

Nanambady an’i Dmitriy tamin’ny 2010

Resadresaka nifanaovana taminy

Inona ny tantara ao amin’ny Baiboly manatanjaka ny finoanao?

Nandinika ny tantaran’ilay vehivavy mpitondratena tao Zarefata izahay vao haingana. Tsy maintsy nampiseho aloha izy hoe nanam-pinoana, izay izy vao nahazo fitahiana. Izao no voalaza tao amin’ilay lahatsoratra nianaranay: “Tahin’i Jehovah izay maneho finoana.” Nisy fehezanteny nalaina tao amin’ny Tilikambo Fiambenan’i Ziona tamin’ny 1898 koa tao amin’ilay izy, hoe: “Toy izany koa fa mitsapa ny finoantsika ny Tompo amin’ny fotoana sasany eo amin’ny fiainantsika. Hahazo fitahiana isika raha maneho finoana. Tsy hotahina kosa isika raha tsy manam-pinoana.”

Nianarako tamin’ilay izy hoe na mafy hoatran’ny inona aza ny mahazo ahy, dia tena mila manao ny anjarako aho mba hampisehoana hoe tsy mivadika amin’i Jehovah sy amin’ny ranadahy sy rahavaviko. Hampian’i Jehovah mba hahavita hiaritra aho amin’izay satria homeny an’izay hery ilaiko sady hataony be herim-po sy manam-pinoana.

Ampian’i Jehovah mba ho be herim-po sy hahery ny mpanompony rehefa enjehina, ary mahatsapa tsara an’izany i Dmitriy sy Nadezhda. Tsy mba manary izany mihitsy i Jehovah!—Josoa 1:9.

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO