Nomelohin’ny Fitsaram-paritr’i Babushkinskiy, any Moscou, ny Rahalahy Ivan Chaykovskiy, Yuriy Chernyshev, Vitaliy Komarov, Sergey Shatalov, ary Vardan Zakaryan. Migadra enin-taona sy telo volana i Ivan, Yuriy, Vitaliy, ary Sergey. I Vardan indray migadra efa-taona sy telo volana. Tonga dia nentina tany am-ponja izy ireo rehefa avy teny amin’ny fitsarana.

1. 24 Novambra 2020

   Tranona Vavolombelon’i Jehovah 20, fara fahakeliny, no nanaovan’ny polisy bemidina tany Moscou. Nosamborin’ny polisy i Ivan, Yuriy, Vitaliy, ary Sergey. Notanana am-ponja vonjimaika izy ireo avy eo, ary natao tao amin’ny efitra fanokanan-toerana. Nisy ekipa mpamokatra filma naka video an’i Yuriy sy ny fianakaviany, nandritra an’ilay fisavana sy fakana am-bavany azy ireo. Nalefa tamin’ny vaovao tao amin’ny televizionam-panjakana ilay video tatỳ aoriana

2. 26 Novambra 2020

   Nafahana i Sergey ary nambenana tao an-tranony. Notanana am-ponja vonjimaika i Vardan ary natokan-toerana, rehefa avy niditra hopitaly noho ny ratra nahazo azy nandritra an’ilay fisavana

3. 27 Novambra 2020

   Nafahan’ny fitsarana i Ivan sy Yuriy ary Vitaliy, ary nambenana tao an-tranony

4. 30 Novambra 2020

   Nafahan’ny manam-pahefana i Vardan ary nambenana tao an-tranony. Nametraka fitarainana tany amin’ny biraon’ny mpampanoa lalàna izy taorian’izay, momba ny fampiasan-kery tsy ara-dalàna

5. 16 Febroary 2022

   Nanomboka ny fitsarana azy ireo

Mampahery antsika ny mahita hoe manatona an’ireo rahalahintsika ireo sy ny fianakaviany i Jehovah, satria miezaka manatona azy foana izy ireo.​—Jakoba 4:8.