8 APRILY 2024 | VAOVAO FARANY: 1 JOLAY 2024
ROSIA

VAOVAO FARANY: VOASAZY HIGADRA | Nahatsapa hoe Nampian’i Jehovah Ry Zareo Tany Am-ponja

HANDEFA

Nomelohin’ny Fitsaran’i Novocherkassk any amin’ny Faritr’i Rostov ny Ranabavy Lyubov Galitsyna sy ny Rahalahy Garegin Khachaturyan sy Gevorg Yeritsyan tamin’ny 26 Jona 2024. Voasazy higadra roa taona sy telo volana i Lyubov. Noraisina hoe efa voaefa io saziny io noho ny fotoana efa nitanana azy am-ponja vonjimaika. Tsy migadra aloha izy amin’izao. Voasazy higadra enin-taona sy tapany kosa i Garegin, dia i Gevorg enin-taona sy roa volana. Hotazonina any am-ponja ihany ireo rahalahy ireo.

Ireo voampanga

Lyubov Galitsyna

Teraka: 1959 (tany Plastunovskaya, Faritanin’i Krasnodar)

Mombamomba azy: Injeniera mekanika no asany taloha fa efa misotro ronono

Lasa te hianatra Baiboly rehefa nahafantatra hoe tsy hisy intsony ny aretina sy ny fahafatesana amin’ny hoavy. Natao batisa dia lasa Vavolombelon’i Jehovah tamin’ny 1995

Maty tamin’ny 2015 ny vadiny

Resadresaka nifanaovana taminy

Ahoana no nanampian’i Jehovah anao nandritra ny herintaona sy efa-bolana nitanana anao am-ponja?

Tena sarotra ilay niray efitra tamin’ny olona mpifoka rongony sy mpangalatra ary mpanao heloka bevava isan-karazany. Nampitebiteby be ilay izy. Nivavaka tamin’i Jehovah nandritra ny alina iray manontolo mihitsy aho indraindray, dia nitalaho taminy mba hanoro ahy hoe ahoana no hiatrehako an’ilay izy. Gadra 25 mahery no efa niray efitra tamiko, fa nampian’i Jehovah aho dia nahavita nifandray tsara tamin’izy rehetra. Nampiany koa aho, dia afaka nanararaotra an’ireny fotoana ireny mba hijerena hoe inona no toetrako mbola mila hatsaraina. Tena faly aho satria lasa tsara toetra kokoa noho iny zavatra natrehiko iny.

Garegin Khachaturyan

Teraka: 1967 (Azerbaïdjan)

Mombamomba azy: Mpandrafitra no asany taloha. Nipetraka tany Polonina sy Alemaina dia avy eo nifindra tany Rosia tamin’ny 1995

Nampiaiky azy ny nahita hoe marina tsara ny zavatra voaresaka ao amin’ny Baiboly sady mahasoa ny mampihatra ny torolalana ao. Natao batisa tamin’ny 1994

Nanambady an’i Kseniya izy tamin’ny 2008. Manan-janaka lahy iray ry zareo

Resadresaka nifanaovana tamin’i Kseniya, vadin’i Garegin a

Inona no nanampy anareo mivady hahavita hiaritra?

Nandefa taratasy ho ahy i Garegin dia hoy izy hoe: “Tena misaotra an’i Jehovah aho amin’ny fanampiany. Misy hevitra mampahery be dia be avy ao amin’ny Baiboly ny taratasy alefan’ny mpiara-manompo atỳ amiko. Manampy ahy ho tony koa ny mahafantatra hoe mikarakara anao ry zareo. Mbola tsy nahatsapa ho akaiky an’i Jehovah hoatran’izao mihitsy aho.” Dia hoatr’izay tsapan’i Garegin izay koa no tsapako. Samy mahatsapa izahay hoe lasa akaiky kokoa an’i Jehovah, sady vao mainka mahita hoe manampy anay isan’andro izy.

Resy lahatra isika hoe na dia miezaka manisy ratsy antsika aza ny mpanohitra, dia hitahy ny mpanompony tsy mivadika foana i Jehovah, sady ‘havadiny ho zavatra tsara’ ny ratsy ataon’ny olona amin-dry zareo.—Genesisy 50:20.

Zava-nitranga

11 Aogositra 2022

Nampangaina ho mpanao heloka bevava i Lyubov sy Garegin ary Gevorg. Nosavana ny tranon-dry zareo. Notanana am-ponja vonjimaika i Gevorg
12 Aogositra 2022

Nafindra fonja i Garegin sy Gevorg, dia any no miandry ny fitsarana azy
16 Aogositra 2022

Notanana am-ponja vonjimaika i Lyubov
17 Aogositra 2022

Nafindra fonja i Lyubov, dia any no miandry ny fitsarana azy
20 Septambra 2023

Nanomboka ny fitsarana
25 Desambra 2023

Nafahana avy tany am-ponja i Lyubov dia lasa nambenana tao an-tranony

a b Mbola notanana am-ponja ny Rahalahy Khachaturyan sy Yeritsyan tamin’ity lahatsoratra ity nomanina dia tsy nisy resadresaka natao tamin-dry zareo.

Jereo Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO