6 MEY 2024 | VAOVAO FARANY: 11 JOLAY 2024
ROSIA

VAOVAO FARANY: VOASAZY HIGADRA | ‘Vitan’i Jehovah ny Manampy Antsika Hiaritra’

HANDEFA

Nomelohin’ny Fitsaram-paritr’i Khorolskiy any amin’ny Faritanin’i Primorié ny Rahalahy Boris Andreyev sy ny Rahalahy Anatoliy Li ary ny Ranabavy Nataliya Sharapova, tamin’ny 10 Jolay 2024. Voasazy higadra enin-taona i Boris, enin-taona sy tapany i Anatoliy, ary telo taona i Nataliya. Efa notanana am-ponja vonjimaika izy ireo ary mbola hotazonina any.

Ireo voampanga

Boris Andreyev

Teraka: 1951 (tany Monastyrishche, Faritanin’i Primorié)

Mombamomba azy: Niara-niasa tamin’ny mpandray antso ao amin’ny ekipa mpamonjy voina

Niaiky izy hoe nahita ny fahamarinana rehefa voavaly tao amin’ny Baiboly ny fanontaniany. Natao batisa ary lasa Vavolombelon’i Jehovah tamin’ny 2004

Nanambady an’i Aleksandra tamin’ny 2020

Resadresaka nifanaovana tamin’i Aleksandra vadin’i Boris a

Ahoana nanampian’ny vadinao anao hiaritra an’izao zava-tsarotra izao?

Nisy andro anankiray izay tena mafy be tamiko. Taorian’ny nisamborana an’i Boris ilay izy. Nalahelo be aho tamin’izay, dia nitomany be. Nanoratra taratasy ho an’i Boris aho, dia noresahiko azy tao hoe inona no nitranga dia inona no tsapako. Namaly an’ilay taratasiko izy, dia nampahery ahy sady niteny hoe azony tsara ny mahazo ahy. Fa ny tena zava-dehibe dia hoe nampahatsiahiviny ahy daholo ny fotoan-tsarotra efa nolalovanay sy ny nanampian’i Jehovah anay mba hahavita hiatrika an’ilay izy. Izay mihitsy no tena nilaiko, dia vao mainka aho resy lahatra hoe tsy handao anay mihitsy Jehovah.

Anatoliy Li

Teraka: 1985 (tany Ouzbékistan)

Mombamomba azy: Efa nivavaka tany amin’ny fiangonana samihafa, nefa mbola tsy voavaly ihany ny fanontaniany. Nanomboka nianatra tamin’ny Vavolombelon’i Jehovah ary tena faly rehefa nahalala ny fahamarinana ao amin’ny Baiboly. Natao batisa tamin’ny 2010

Nanambady an’i Raisa tamin’ny 2011

Resadresaka nifanaovana tamin’i Raisa vadin’i Anatoliy b

Ahoana no nanampian’i Jehovah anareo mivady?

Taoriana kelin’ny nitanana an’i Anatoliy vonjimaika any am-ponja, dia niteny tamiko izy fa mafy be taminy ny nieritreritra hoe irery aho. Niara-nanao zavatra ara-panahy foana mantsy izahay, talohan’ny nosamborina azy. Lasa tsy nanahy be intsony anefa izy rehefa fantany hoe mampiasa ny anadahy sy rahavavy i Jehovah mba hanampiana ahy sy hanomezana an’izay ilaiko. Hitanay mivady hoe tena mikarakara anay i Jehovah ary tsy hanary anay mihitsy.

Nataliya Sharapova

Teraka: 1972 (tany Kazakhstan )

Mombamomba azy: Nihaona tamin’ny Vavolombelona tamin’ny 1995 ary nanaiky hianatra Baiboly. Niaiky hoe tena Tenin’Andriamanitra ny Baiboly. Natao batisa tamin’ny 2012

Resadresaka nifanaovana tamin’i Nina maman’i Nataliya c

Inona no nanampy an’i Nataliya tsy ho kivy na dia migadra aza?

Miatrika zava-tsarotra isan-karazany ny zanako any am-ponja. Mangatsiaka be any. Marary foana koa ny an-dohany. Kivikivy ihany izy indraindray, nefa matoky izy hoe vitan’i Jehovah ny manampy azy hiaritra. Hoy izy: “Fantatro hoe tsy hijanona atỳ mandrakizay aho. Ampian’i Jehovah hanam-paharetana aho, dia vonona hiandry.” Vao mainka i Nataliya lasa akaiky kokoa an’i Jehovah noho ny zava-tsarotra mahazo azy. Mahatsiaro ho hoatran’ny hoe trotroin’i Jehovah mihitsy izy.

Matoky isika hoe hamaly ny vavaka ataontsika i Jehovah amin’ny andro fahoriantsika, ary hanome antsika hery hiaretana, hoatran’ny nataony tamin’i Anatoliy sy Boris ary Nataliya.—Salamo 20:1.

Zava-nitranga

28 Jolay 2022

Nampangaina ho mpanao heloka bevava
6 Oktobra 2022

Trano 12 tao amin’ny tanànan’i Yaroslavsky no nosavana. Notazonin’ny polisy i Boris sy Nataliya
7 Oktobra 2022

Notanana am-ponja vonjimaika i Boris sy Nataliya
12 Oktobra 2022

Notazonin’ny polisy i Anatoliy
13 Oktobra 2022

Notanana am-ponja vonjimaika i Anatoliy
5 Oktobra 2023

Nanomboka ny fitsarana

a b c Mbola notanana am-ponja vonjimaika ny Rahalahy Andreyev sy ny Rahalahy Li ary ny Ranabavy Sharapova tamin’ny fotoana nanomanana an’ity lahatsoratra ity, ka tsy nisy ny resadresaka nifanaovana taminy.

Jereo Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO