20 JANOARY 2022
ROSIA

Vao Mainka Matanjaka ny Finoan’ny Mpiara-manompo any Karpinsk Satria Miantehitra Amin’i Jehovah Izy Ireo

HANDEFA

Tsy ho ela ny Fitsarana any Karpinsk, any amin’ny Faritr’i Sverdlovsk, dia hamoaka ny didim-pitsarany momba ny Anabavy Darya Dulova sy Venera Dulova, ny Rahalahy Aleksandr Prianikov sy Anastasiya Prianikova vadiny, ary ny Anabavy Svetlana Zalyaeva. Mbola tsy nolazain’ny mpampanoa lalàna hoe inona ny sazy omena an-dry zareo

Zava-nitranga

27 Janoary 2020

Nomelohina i Aleksandr sy Darya ary Venera, tamin’ny fitsarana voalohany
Febroary 2020

Nampangaina fanindroany hoe mpanao heloka bevava i Aleksandr sy Darya ary Venera
30 Martsa 2020

Nataon’ny manam-pahefana savahao ny tranon-dry zareo dia nalain-dry zareo ny telefaoniny sy ny tablette-ny
19 Mey 2020

Nampangaina ho mpanao heloka bevava koa i Anastasiya sy Svetlana. Samy tsy navela hiala tao amin’ilay faritra izy roa
29 Aprily 2021

Nanomboka ny fitsarana azy

Ilay voampanga

Darya Dulova

Teraka: 2000 (tany Karpinsk, Faritr’i Sverdlovsk)

Mombamomba azy: Izy no zandriny indrindra amin’izy telo mpiray tam-po. Be dia be ny zavatra mahaliana azy, hatramin’ny zavakanto ka hatramin’ny spaoro

Tena nahagaga azy, tamin’izy mbola kely, ny nahita olona mankatò ny toro lalan’ny Baiboly. Natao batisa tamin’ny 2016 dia lasa Vavolombelon’i Jehovah

Resadresaka nifanaovana taminy

Tsapanao hoe vao mainka nifandray akaiky tamin’i Jehovah ve ianao nandritra an’ireny fotoan-tsarotra ireny?

Vao mainka tsapako hoe tena misy i Jehovah noho ireny zava-tsarotra nahazo ahy ireny. . . . Vao mainka aho lasa tsy matahotra rehefa mahita hoe manampy an’ahy i Jehovah na dia amin’ny zavatra madinika aza. Lasa matoky mantsy aho hoe tsy handao an’ahy mihitsy izy. . . . Ny Romanina 8:38, 39 no tena manampy ahy tsy hatahotra.

Venera Dulova

Teraka: 1968 (tany Karpinsk, Faritr’i Sverdlovsk)

Mombamomba azy: Ny mamany sy ny bebeny no nitaiza azy. Tia manao vim-ba sy mamaky boky ary mianatra. Talohan’izy handray 17 taona no maty ny mamany sy ny bebeny. Nanambady tamin’ny 1990. Manan-janaka telo

Nampiasa saina azy hoe fa maninona isika no maty, dia hanao ahoana ny hoavin-janany. Nanomboka nianatra Baiboly tamin’ny Vavolombelon’i Jehovah tamin’izy 28 taona. Natao batisa tamin’ny 1998

Resadresaka nifanaovana taminy

Ahoana no nahitanao hoe nanampy anao i Jehovah nandritra an’izao fotoan-tsarotra izao?

Lasa tsara fanahy aminay mivady izao ny havanay sasany nanohitra anay taloha. Midera ahy ny vadiko dia mampirisika ahy hoe aza mivadika mihitsy. . . . Mampiasa ny mpiara-manompo koa i Jehovah hampaherezana ahy.

Ny tonga tao an-tsaiko voalohany tamin’ilay vao nosavana ny tranonay dia hoe: ‘Izaho ve izany dia mpanao heloka bevava? Tsy mampino! Loza mihitsy izany!’ Soa ihany fa nisy namako izay niteny an’ahy hoe aleo tsy mieritreritra an’izany, fa hoe ‘Mpandresy hoatran’i Jesosy aho izao.’

Aleksandr Prianikov

Teraka: 1987 (tany Udinsk, Faritanin’i Khabarovsk)

Mombamomba azy: Tena tia mozika be. Mitendry angorodao. Elektrisianina tany amin’ny orinasa iray. Mpanamboatra karô izao izy

Efa hatramin’izay izy no nino hoe misy Andriamanitra. Tena nanohina ny fony ilay fampanantenan’Andriamanitra hoe tsy ho faty intsony ny olona. Natao batisa tamin’ny 2004. Nanambady an’i Anastasiya tamin’ny 2011

Resadresaka nifanaovana taminy

Ahoana no nampaherezan’ny mpiara-manompo anao nandritra an’izao fotoan-tsarotra izao?

Nisy rahalahy iray izay nampirisika anay handinika ny Salamo 139:1. Nilaza izy avy eo hoe: “Tena tia be anareo i Jehovah dia dinihiny daholo ny zavatra eritreretinareo sy izay tsapanareo, ary izay lazainareo sy ataonareo. . . . Fantatr’i Davida Mpanjaka tsara hoe tena liana amintsika tsirairay i Jehovah. . . . Dinihiny tsara daholo ny zava-drehetra mitranga amintsika sy izay mahatonga ny toetrantsika ho hoatr’izao. Tena tsy tokony hahatsapa ho irery mihitsy isika.” Nanohina be ny foko ireo teniny ireo. Tsapako isan’andro hoe eo akaikiko eo i Jehovah.

Anastasiya Prianikova

Teraka: 1987 (tany Karpinsk, Faritr’i Sverdlovsk)

Mombamomba azy: Ny mamany no nitaiza azy sy ny zokiny lahy. Tia mihira sy manjaitra

Tiany be ilay fampanantenan’ny Baiboly hoe mbola hilamina ny tany amin’ny hoavy. Tsapany hoe azo ampiharina izay lazain’ny Baiboly sady feno fahendrena. Natao batisa tamin’ny 2002. Nanambady an’i Aleksandr tamin’ny 2011

Resadresaka nifanaovana taminy

Tsapanao hoe vao mainka nifandray akaiky tamin’i Jehovah ve ianao nandritra an’ireny fotoan-tsarotra ireny?

Efa ho telo taona izahay no nampangaina hoe mpanao heloka bevava, dia tamin’ireny no vao mainka natanjaka ny finoako. Lasa vao mainka aho natoky an’i Jehovah. Haiko hoe voafehin’i Jehovah ny zava-drehetra. Indraindray tena hoatran’ny hoe tsy misy vahaolana mihitsy ilay mahazo anay, dia amin’iny izy no manisy lalan-kivoahana. Tsikaritro koa hoe arakaraka ny maha mafy an’ilay fanenjehana no vao mainka aho te hanao zavatra ho an’i Jehovah.

Svetlana Zalyaeva

Teraka: 1975 (tany Volchansk, Faritr’i Sverdlovsk)

Mombamomba azy: Telo mianadahy ry zareo no mpiray tam-po. Mbola kely izy dia maty ny mamany. Tia nilalao hockey sy nanao voley tamin’izy tanora. Niasa tamin’ny toeram-pitrandrahana arintany. Misotro ronono izy izao. Nanambady an’i Ruslan tamin’ny 2003. Manan-janaka efatra ry zareo

Resy lahatra izy hoe tena marina daholo ny lazain’ny Baiboly, dia izay no nahatonga azy te hampihatra ny fitsipika ao. Natao batisa tamin’ny 2016

Resadresaka nifanaovana taminy

Ahoana no nanampian’i Jehovah anao mba tsy hatahotra sy ho falifaly foana?

Tsy misalasala mihitsy aho na dia kely aza hoe raha mbola matoky an’i Jehovah sy miezaka ny ho tony izaho sy ny vady aman-janako, dia hahavita hiaritra foana na inon-kidona na inon-kihatra!

Mbola mitohy ny fanenjehana ny rahalahy sy anabavintsika any Rosia. Manatanjaka ny finoantsika anefa ny mahita hoe be fitiavana i Jehovah dia mikarakara sy manohana azy ireo. Lasa mahazo “dera sy voninahitra ary haja” ny anaran’i Jehovah, noho ny finoan’izy ireo vita sedra.—1 Petera 1:7.

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO