21 NOVAMBRA 2023
ROSIA

Vavolombelona Efatra Nomena Sazy Mihantona Tany Toula, any Rosia

HANDEFA

Nomelohin’ny Fitsaram-paritr’i Proletarskiy, any Toula ny Rahalahy Yevgeniy Godunov sy Gurami Labadze ary ny Ranabavy Yuliya Popkova sy Anzhela Putivskaya tamin’ny 20 Novambra 2023. Samy nahazo sazy mihantona enin-taona sy enim-bolana avy i Yevgeniy sy Gurami. I Yuliya sy Anzhela indray samy nomena sazy mihantona roa taona sy enim-bolana avy. Mbola tsy voatery migadra aloha ry zareo izao.

Ilay voampanga

Gurami Labadze

Teraka: 1963 (tany Nigvzara, any Géorgie)

Mombamomba azy: Mpanamboatra fiara sy mpitondra taxi no asany taloha

Ny mamany sy ny zokiny vavy no nampahafantatra azy momba ny Vavolombelon’i Jehovah. Nampihatra ny torolalan’ny Baiboly izy, dia faly satria hitany hoe nisy vokany tsara teo aminy izany. Hitany koa hoe mifankatia ny Vavolombelon’i Jehovah. Natao batisa tamin’ny 1996

Nanambady an’i Galina tamin’ny 1995. Manan-janaka lahy iray izy roa

Resadresaka nifanaovana taminy

Nahoana no sarotra taminao ny nanaiky nampian’olona?

Sarotra tamiko ilay izy satria betsaka tamin’ireo rahalahy nanampy an’ahy no sahirana ara-bola, fa nosaintsainiko ilay tenin’i Jesosy hoe: “Mahasambatra kokoa ny manome noho ny mandray.” (Asan’ny Apostoly 20:35) Tsy tokony hosakanako izany ny rahalahy sy anabaviko raha te hanome zavatra ahy, satria mba tiako ho sambatra ry zareo. Nataoko tao an-tsaina hoe: “Mba hoatran’ny ahoana tokoa moa no ho tsapan’ilay mpitondratena nahantra, raha hoe nangoraka azy i Jesosy dia ho niteny taminy hoe: ‘Tazòny ho anao ireny vola madinika kely anankiroa ireny, fa aza arotsaka ao’?” (Marka 12:41-44) Tena misaotra betsaka an’ireo mpiara-manompo amiko aho fa tena nikarakara ahy ry zareo. Tena tsy nampoiziko ilay izy. Lasa akaiky kokoa an’i Jehovah aho. Tamin’ny tantaram-piainana foana aho taloha no namaky hoe manampy ny mpanompony i Jehovah, fa izao tena hoe izaho mihitsy no miaina an’ilay izy.

Yuliya Popkova

Teraka: 1978 (tany Bogoroditsk, any Toula)

Mombamomba azy: Niasa tamina akanin-jaza

Nisy mpiara-mianatra aminy nanasa azy hanatrika ny fivorian’ny Vavolombelon’i Jehovah. Nianatra Baiboly. Rehefa nianatra momba an’i Jehovah, di niezaka nitadidy hoe Ray be fitiavana izy. Natao batisa tamin’ny 1999

Resadresaka nifanaovana taminy

Azo antoka hoe nahasoa anao ilay ianao efa nifandray tsara tamin’i Jehovah, tamin’ianao notanana am-ponja vonjimaika. Mba azonao hazavaina ve ny amin’izay?

Vao tonga tany amin’ilay fonja aho, dia tsapako hoe tsy misy zava-dehibe amiko mihoatra noho ny fifandraisako amin’i Jehovah. Tsy hoe rehefa mivory sy mitory na manao zavatra ara-panahy hafa ianao dia hoe mifandray tsara amin’i Jehovah no dikan’izay. Soa ihany aho fa efa niezaka be nifandray akaiky tamin’i Jehovah talohan’ireny fitsapana ireny, dia tena afaka nanaporofo taminy hoe ho namany foana aho sady tsy hivadika aminy mihitsy. Faly be mihitsy izy mahita an’izany, dia vao mainka aho tsy te hivadika aminy hatramin’ny farany. Tsy te hanao zavatra mampalahelo an’i Jehovah mihitsy aho. Izay ihany no tena atahorako izao, hoe handiso fanantenana an’i Jehovah.

Ilaintsika ny tantaran’ireo rahalahy sy anabavy ireo satria manampy antsika hatoky hoe hahazo fampiononana sy fanantenana koa isika, rehefa miantehitra amin’i Jehovah sy manahaka an’ireo olona nanam-pinoana ao amin’ny Soratra Masina.—Romanina 15:4.

Zava-nitranga

25 Martsa 2021

Nampangaina ho mpanao heloka bevava ry zareo.
13 Aprily 2021

Nosavana ny tranon-dry zareo. Nosamborina i Anzhela sy Yuliya
14 Aprily 2021

Notanana am-ponja vonjimaika i Anzhela sy Yuliya. Nosamborina i Yevgeniy, dia nampangaina hoe mpanao heloka bevava. Nambenana tao an-trano i Gurami
16 Aprily 2021

Notanana am-ponja vonjimaika i Yevgeniy
20 Mey 2021

Navoaka i Anzhela sy Yevgeniy ary Yuliya, dia nambenana tao an-trano
22 Jolay 2021

Tsy nambenana tao an-trano intsony i Anzhela sy Yevgeniy ary Yuliya, fa tsy nahazo nanao dia lavitra
23 Jolay 2021

Tsy nambenana tao an-trano intsony i Gurami, fa tsy nahazo nanao dia lavitra
11 Mey 2023

Nanomboka ny fitsarana
20 Novambra 2023

Voaheloka dia nomena sazy mihantona

Jereo Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO