15 SEPTAMBRA 2023
ROSIA

Voaheloka Higadra Enin-taona sy Iray Volana any Rosia ny Rahalahy Sergey Gromov

HANDEFA

Nomelohin’ny Fitsaram-paritr’i Moskovski any Kazan higadra enin-taona sy iray volana ny Rahalahy Sergey Gromov, tamin’ny 14 Septambra 2023. Nanomboka tamin’ny 15 Martsa 2022 izy no efa tany am-ponja, dia mbola hotazonina any izy.

Ilay voampanga

Sergey Gromov

Teraka: 1969 (Kazan, Repoblikan’i Tatarstan)

Mombamomba azy: Mpanamboatra sary no asany taloha

Nanambady an’i Yelena tamin’ny 1990. Manan-janaka mianadahy ry zareo

Tsy nino an’Andriamanitra hatramin’izay, nefa lasa saina ihany matetika hoe ahoana no nampisy ny fiainana. Nanomboka nianatra Baiboly niaraka tamin’ny Vavolombelon’i Jehovah. Faly be rehefa nahita hoe mifanaraka tsara amin’ny siansa ny Baiboly. Niara-natao batisa izy sy Yelena tamin’ny 1995

Resadresaka nifanaovana tamin’i Yelena, vadin’i Sergey a

Ahoana no niomananao sy Sergey hiatrika fanenjehana?

Tsy natahotra izahay rehefa nisy fiovana teto Rosia tamin’ny 2017, fa napetrakay tamin’i Jehovah izay nanavesatra anay. Narahinay mianakavy tsara ny torohevitra avy tamin’ny fandaminany, dia nanapa-kevitra izahay hoe hanohy hanompo an’i Jehovah foana na inon-kidona na inon-kihatra. Nanohy nianatra sy nivory ary nanompo izahay, sady nivavaka sy nampahery ny rahalahy sy anabavy foana.

Ahoana no anampian’i Jehovah anao amin’izao ianao tsy miaraka amin’ny vadinao izao?

Mbola tsy niresaka matetika be tamin’i Jehovah hoatran’ny amin’izao aho, sady tena aborako aminy daholo izay ato am-poko. Tena mahatsiaro ho akaiky be an’i Jehovah aho hatramin’izay tsy naha teo an’i Sergey izay. Tsy mamela ahy hiady irery mihitsy izy. Indraindray mbola tsy vita akory ny vavaka ataoko dia efa mahatsapa aho hoe novalian’i Jehovah ilay izy. Misy olona miteny zavatra mahafinaritra amiko, ohatra, na mamihina ahy, na manao zavatra hafa mba hanampiana ahy. Hoatran’ny hoe mitrotro ahy i Jehovah rehefa mampiasa an’ireny olona ireny hoatr’izany. Lasa tsy mifantoka be loatra amin’ny olana atrehiko aho vokatr’izany, fa vao mainka aza lasa te hanampy ny hafa indray.

Tsy mivadika amin’i Jehovah i Sergey sy Yelena sady miantehitra amin’i Jehovah foana, dia tena faly isika amin’ny modely omen-dry zareo. Rehefa mahita ny fitahiana omen’i Jehovah an-dry zareo isika, dia resy lahatra tanteraka hoe “tsy hoe fohy loatra ny tanan’i Jehovah ka tsy mahavonjy, na hoe donto loatra ny sofiny ka tsy maheno.”—Isaia 59:1.

Zava-nitranga

15 Martsa 2022

Nisokatra ny raharaha iampangana azy ho nanao heloka bevava. Nentina hatao famotorana dia notanana am-ponja vonjimaika
16 Martsa 2022

Nosavana ny tranony
17 Martsa 2022

Nafindra tany amin’ny fonja hafa mandra-piandry ny fitsarana azy
30 Martsa 2023

Nanomboka ny fitsarana
14 Septambra 2023

Voaheloka higadra enin-taona sy iray volana

a Tany am-ponja, teo am-piandrasana ny fitsarana azy, ny Rahalahy Gromov tamin’ny nomanina ity lahatsoratra ity, dia tsy mbola azo natao ny niresadresaka taminy.

Jereo Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO