27 JONA 2023
ROSIA

Voaheloka ny Rahalahy Skvortsov sy Tibiy

HANDEFA

Nomelohin’ny Fitsaran’ny Tanànan’i Taganrog any amin’ny Faritr’i Rostov ny Rahalahy Aleksandr Skvortsov sy Valeriy Tibiy. Voaheloka higadra fito taona i Aleksandr. Efa hatramin’ny 7 Desambra 2021 izy no nigadra, ary mbola hijanona any. I Valeriy indray nomena sazy mihantona enin-taona. Nigadra izy nanomboka tamin’ny 18 Mey 2022, fa nafahana avy any aloha.

Ireo voampanga

Aleksandr Skvortsov

Teraka: 1962 (Taganrog)

Mombamomba azy: Mpanao sodira no asany taloha

Nanambady an’i Larisa tamin’ny 1983. Manan-janaka roa vavy izy mivady

Nianatra Baiboly tamin’ny Vavolombelon’i Jehovah i Larisa dia natao batisa tamin’ny 1996. Faly i Aleksandr rehefa nahita an’ilay fampanantenan’ny Baiboly hoe tsy hisy intsony ny tsy rariny indray andro any. Natao batisa tamin’ny 1997

Efa voaheloka tamin’ny 2015, dia sazy mihantona dimy taona sy tapany no azony tamin’izay

Resadresaka nifanaovana tamin’i Larisa, vadin’i Aleksandr a

Inona no manampy ny vadinao hiatrika ny fiainana any am-ponja?

In-13 niova efitra figadrana i Aleksandr nandritra ny herintaona. Tsy mora aminy foana aloha ny mifandray tsara amin’ny mpiara-migadra aminy e! Fa na izany aza dia miezaka be izy mba hifanaraka tsara amin-dry zareo. Mivavaka amin’i Jehovah, hono, izy, dia mamaky Baiboly sy mamaky ny taratasy azony, dia izay no manampy azy ho akaiky an’i Jehovah foana. Ilay izy tsy afaka miaraka amin’ny fianakaviany sy ny namany no tena mafy indrindra aminy. Fa ataon’i Jehovah milamin-tsaina anefa izy, na izany aza.

Inona no vokatr’izao zavatra iainanareo izao amin’ny fifandraisanao amin’i Jehovah?

Vao mainka aho izao lasa matoky an’i Jehovah. Tena resy lahatra koa aho hoe tia anay mivady izy. Tena manohana anay roa mantsy izy. Mikarakara be anay koa ny anadahy sy rahavavy sady mivavaka ho anay. Latsaka mihitsy ny ranomasoko rehefa mahita sy mieritreritra an’izany.

Valeriy Tibiy

Teraka: 1977 (Novopokrovka, Crimée)

Mombamomba azy: Mpitondra kamiao no asany taloha

Nianatra Baiboly tamin’ny Vavolombelon’i Jehovah rehefa nahafantatra ny anaran’Andriamanitra. Natao batisa tamin’ny 2004

Nanambady an’i Kristina tamin’ny 2012

Resadresaka nifanaovana tamin’i Kristina, vadin’i Valeriy b

Ahoana no iatrehan’i Valeriy ny fiainana any am-pigadrana?

Mitabataba be ao amin’ilay efitra igadrany sady be olona be, dia matetika i Valeriy no mivavaka mba ho tony sy hahazo hery hiatrehana an’ilay izy. Tsikaritry ny mpiara-migadra aminy hoe tony foana izy sady tsy mihontsina amin’ny tabataban-dry zareo. Dia lasa manontany foana ry zareo hoe: ‘Fa maninona ianao no tony be foana e? Ianao angamba no olona falifaly indrindra ato!’ Faly i Valeriy satria ampian’i Jehovah hampihatra ny torolalan’ny Baiboly izy dia mba afaka miresaka tsara amin’ireo lehilahy ireo. Mangataka torohevitra aminy mihitsy aza ry zareo. Manaja tsara an’i Valeriy ny olona any am-ponja, dia lasa tsapany amin’izany hoe i Jehovah mihitsy no miaro azy.

Inona no andinin-teny tena manampy anao?

Manampy ahy hiantehitra mafimafy kokoa amin’i Jehovah ny Ohabolana 3:6, hatramin’izay nanombohan’ny fanenjehana anay izay. Hoy io andinin-teny io hoe: “Eritrereto izy amin’izay rehetra ataonao, dia hataony mandeha tsara ny fiainanao.” I Jehovah ihany no tena hendry. Dia rehefa misy olana mahazo ahy, dia aleoko tonga dia mijery Baiboly mba hahafantarako ny fomba fihevitr’i Jehovah momba an’ilay izy. Hitako hoe tena manampy ny manao an’izany. Teo foana i Jehovah nanampy ahy, na inona na inona zava-niseho, dia mbola eo foana izy.

Misaotra an’i Jehovah isika satria mikarakara antsika amim-pitiavana izy sady mitari-dalana antsika, dia lasa mahavita miaritra isika na inona na inona fitsapana mahazo antsika.—Salamo 5:12.

Zava-nitranga

20 Martsa 2021

Nosavana ny tranon-dry Skvortsov
7 Desambra 2021

Nosavana fanindroany ny tranon-dry Skvortsov, niaraka tamin’ny tranon’ny Vavolombelon’i Jehovah 29 hafa any Taganrog. Nampangaina hoe nanao heloka bevava izy dia notanana am-ponja vonjimaika
8 Desambra 2021

Notanana am-ponja i Aleksandr mandra-piandry ny fitsarana azy
29 Martsa 2022

Nampangaina ho mpanao heloka bevava i Valeriy
31 Martsa 2022

Natambatry ny mpanao famotorana ny raharaha mikasika an’i Aleksandr sy Valeriy
18 Mey 2022

Nosamborina i Valeriy dia notanana am-ponja vonjimaika
26 Mey 2022

Notanana am-ponja i Valeriy mandra-piandry ny fitsarana azy
6 Desambra 2022

Nanomboka ny fitsarana
20 Jona 2023

Voaheloka higadra fito taona i Aleksandr. I Valeriy indray nomena sazy mihantona enin-taona

a b Mbola tany am-ponja ny Rahalahy Skvortsov sy Tibiy tamin’ny fotoana nanomanana an’ity lahatsoratra ity, dia tsy azo natao ny niresaka tamin-dry zareo.

Jereo Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO