Trano maherin’ny 30, any amin’ny faritra andrefan’i Rosia, no nanaovan’ny polisy rosianina bemidina, nandritra ny volana Oktobra 2018. Rahalahy enina sy anabavy roa no nosamborina sy notanana am-ponja vonjimaika satria mandray anjara amin’ny asa lazaina fa mampidi-doza. Rahalahy sy anabavy 25 àry amin’izao no gadraina tsy ara-drariny ary 18 hafa no ambenana any an-tranony.

7 Oktobra, Sychyovka, faritanin’i Smolensk: Nanao savahao tamin’ny trano efatra ny polisy teo an-toerana sy ny polisy manokana misaron-tava. Nosamborin’izy ireo i Nataliya Sorokina, 43 taona, sy Mariya Troshina, 41 taona, anabavy mipetraka any. Namoaka didy ny Fitsaram-paritr’i Leninsky, roa andro taorian’izay, hoe tanana am-ponja vonjimaika izy ireo hatramin’ny 19 Novambra 2018. Namerina namoaka didy indray ilay fitsarana tamin’ny 16 Novambra 2018 hoe ampiana telo volana ny fijanonan’izy ireo any am-ponja, izany hoe hatramin’ny 19 Febroary 2019.

9 Oktobra, Kirov, faritanin’i Kirov: Trano 19, fara fahakeliny, no nanaovana bemidina. Anti-panahy dimy no nosamborina ary notanana am-ponja vonjimaika tatỳ aoriana. Rosianina ny efatra amin’ireo rahalahy (Maksim Khalturin, Vladimir Korobeynikov, Andrey Suvorkov, ary Evgeniy Suvorkov) ary Poloney kosa i Andrzej Oniszczuk. Taorian’i Dennis Christensen avy any Danemark, dia ny Rahalahy Oniszczuk no teratany vahiny manaraka gadraina tsy ara-drariny any Rosia, noho ny zavatra inoany.

18 Oktobra, Dyurtyuli, any amin’ny Repoblikan’i Bachkirie: Trano 11, fara fahakeliny, no nanaovan’ny polisy bemidina ary nogiaziny tamin’izany ny vola, karatry ny banky, sary, taratasy voaray, ordinatera, puce ho an’ny telefaonina, ary telefaonina entin-tanana. Nosamborina ny anti-panahy atao hoe Anton Lemeshev, ary nomelohina higadra vonjimaika mandritra ny roa volana. Nampodina anefa izy tamin’ny 31 Oktobra 2018 ka lasa ambenana ao an-tranony hatramin’izao.

Mbola mivavaka ho an’izay migadra ihany ny rahalahy sy anabavy any Rosia sady manampy azy ireo sy ny vady aman-janany, na dia atahorana aza hoe hanaovana bemidina koa ny tranony ary mety halaina ny fananany. Mivavaka ho an’ny rahalahy sy anabavy tsy mivadika rehetra any Rosia isika vahoakan’i Jehovah eran-tany, ary mety hanonona ny anaran’ny sasany aminy mihitsy aza, mandra-pilamin’ny olana any.—Efesianina 6:18.