Nanamafy an’ilay didim-pitsarana navoakany, izay mandrara ny asan’ny Vavolombelon’i Jehovah any Rosia, ny Fitsarana tampon’i Rosia tamin’ny 17 Jolay 2017. Tsy nanaja ny fifanarahana iraisam-pirenena mamela ny olona hanaraka izay fivavahana tiany i Rosia rehefa nanao an’izany. Lasa voarara àry ny fivavahan’ny Vavolombelon’i Jehovah manerana an’i Rosia.

Nolavin’ireo mpitsara telo anisan’ny Filan-kevitra ao amin’ny Fitsarana Tampony Mandinika ny Fampiakarana Fitsarana ilay fangatahan’ny Vavolombelon’i Jehovah, ary nohamafisiny ilay didim-pitsarana navoakan’ny Mpitsara Yuriy Ivanenko tamin’ny 20 Aprily. Nanome rariny ny Minisiteran’ny Fitsarana io mpitsara io, ka nanaiky an’ilay fangatahana hoe: “Foanana ny Foibem-pitantanan’ny Vavolombelon’i Jehovah any Rosia sy ireo Fikambanana Ara-pivavahana anisan’izy io, ary homena ny Federasionan’i Rosia ny fananan’ilay fikambanana rehetra.”

Tandindomin-doza ireo Vavolombelon’i Jehovah 175000 mahery any Rosia noho ilay didim-pitsarana. Hoy i Philip Brumley, mpanolo-tsaina momba ny lalàna ho an’ny Vavolombelon’i Jehovah: “Manahy mafy ny Vavolombelon’i Jehovah maneran-tany hoe ho tandindomin-doza ireo rahalahiny sy anabaviny any Rosia. Toy ny manome rariny ny fampijaliana efa mihatra amin’ny Vavolombelon’i Jehovah any Rosia ny didy navoakan’ilay filan-kevitra. Vao mainka koa izy ireo henjehina hoatran’ny mpanao heloka bevava sy hampijaliana. Lasa voailikilika izy ireo nefa ao amin’ny taniny ihany.”

Nandefa fangatahana tany amin’ny Fitsarana Eoropeanina Momba ny Zon’olombelona sy tany amin’ny Komitin’ny Firenena Mikambana Miaro ny Zon’olombelona ny Vavolombelon’i Jehovah. Mivavaka ireo mpiray finoana amin’izy ireo maneran-tany, mba hamerina handinika ny fanapahan-kevitra noraisiny ny fanjakana rosianina ary hanaja ny zo fototry ny Vavolombelona. Ho afaka ‘hanana fiainana tony sy milamina hatrany, ao anatin’ny fahafoizan-tena ho an’Andriamanitra’ izy ireo amin’izay, araka ny 1 Timoty 2:2.