Naharitra adiny telo ilay fitsarana nataon’ny Fitsaram-paritra Sovietsky ao Oriol, any Rosia, tamin’ny 20 Novambra 2017. Namoaka didy izy ireo fa hitohy hatramin’ny 23 Febroary 2018 ny fitanana am-ponja vonjimaika an’i Dennis Christensen. Fanindroany amin’io izao ilay fitsarana no nampitombo telo volana ny fotoana igadran’A^toa Christensen. Efa tamin’ny Mey 2017 izy no nosamborina sy nogadraina, nefa tsy nandalo fitsarana akory. Nanatrika fotoam-pivavahana milamina tsara tao Oriol izy, rehefa nanao bemidina ny polisy.

Teratany danoà A^toa Christensen sady Vavolombelon’i Jehovah. Talohan’ny nisamborana azy, dia nilaza ny Fitsarana Tampony any Rosia hoe mahery fihetsika, hono, ny fivavahan’ny Vavolombelon’i Jehovah, dia norarany. Mbola nampian’ilay fitsaram-paritra indray àry ny fotoana itanana azy am-ponja. Amin’izay, hono, dia ho afaka hanangona “porofo” ireo mpanao famotorana, mba hiampangana azy ho nandika lalàna, kanefa izy nanaraka ny fivavahany fotsiny. Tsy neken’ny fitsarana ny hiambenana azy tany an-tranony nandritra an’ilay famotopotorana. Tsy noraharahainy koa ny tenin’ny fanjakana danoà, izay nanome toky fa tsy hanome pasipaoro ho an’A^toa Christensen sady tsy hanampy azy hivoaka an’i Rosia.

Teratany rosianina ny vadin’A^toa Christensen. Niara-nivory tamin’ny mpiara-mivavaka taminy izy mivady, tamin’ny fotoana nisamborana an’A^toa Christensen. Anisan’ny zo fototra mantsy izany hoe afaka mivory sy manaraka ny fivavahana tiany izany. Roa taona ihany izy, fara fahabetsany, no azon’ny fitsarana tazonina am-ponja vonjimaika. Raha hita hoe meloka izy, dia higadra enina ka hatramin’ny folo taona.