Mbola nitohy tamin’ny Mey 2014 ny fitsarana an’ireo Vavolombelon’i Jehovah 16, tao amin’ny tribonalin’i Taganrog. Io irery no fitsarana any Rosia anerena olom-pirenena rosianina hiala amin’ny finoany. Rahonana izy ireo hoe hampangaina ho mpanao heloka bevava raha tsy mety manao an’izany. Hoy ny iray amin’ireo voampanga: “Tsy tian’izy ireo hiavaka aho fa tiany hitovy amin’ny olona. Tsy tian’izy ireo hiresaka momba ny Baiboly aho. Tsy haiko mihitsy izao izay mbola hitranga.”

Ampiharin’ny manam-pahefana rosianina amin’ny fivavahan’ny Vavolombelon’i Jehovah ilay Lalàna Hanoherana ny Fikambanana Mahery Fihetsika, ary nihamafy izany nanomboka tamin’ny 2009. Hoy i Victor Zhenkov, mpisolovavan’ny Vavolombelona: “Hitako fa ny Vavolombelon’i Jehovah foana no tena kendren’ireo mpitandro filaminana, rehefa nodinihiko ireo zava-nitranga nandritra ireo taona faramparany momba ny fiampangana ny Vavolombelon’i Jehovah.” Vao mainka ampijalin’ny manam-pahefana any Taganrog ny Vavolombelona sady ataony toy ny hoe voarara eo amin’ilay faritra ny asan’izy ireo. Efa voasoratra ara-panjakana tany amin’ny Federasionan’i Rosia anefa ny Vavolombelon’i Jehovah nanomboka tamin’ny 1992. Mazava ny tanjon’ny manam-pahefana any Taganrog. Nitantara ny zavatra nanjo azy ny Vavolombelona voampanga iray hafa. Hoy izy: “Nilaza tamiko ilay mpanao famotorana, tao amin’ny biraony, hoe: ‘Soniavo ity taratasy fialanao tsy ho Vavolombelon’i Jehovah ity, dia hafahanay madiodio ianao ary mahazo mandeha any amin’izay tianao.’”

Mety hampandoavina lamandy, na hampanaovina asa an-terivozona, na hogadraina ireo Vavolombelona 16, arakaraka ny fanapahan-kevitry ny fitsarana. Atahorana ny fahalalahana ara-pivavahana manerana an’i Rosia raha voaheloka izy ireo. Mety hampangaina ho manao heloka bevava koa mantsy ny Vavolombelon’i Jehovah rehetra any Rosia, satria fotsiny hoe manao asa ara-pivavahana tsy mampidi-doza. Hoy i Alyona Borodina, mpisolovava hafan’ireo voampanga: “Sakantsakanan’ny manam-pahefana foana ny Vavolombelona. Sokajina ho boky mampidi-doza ny bokin’izy ireo. Potehina ny boky iray rehefa misy didim-pitsarana milaza azy io hoe mampidi-doza. Hoy ny mpanoratra iray: ‘Handoro olona, amin’ny farany, izay mandoro boky.’ Tena loza mandrahona ny fahalalahana ara-pivavahana izany.”

Amin’ny Jona 2014 no andrasana ny didim-pitsarana farany. Manahy momba ny hiafaran’io raharaha io ny Vavolombelon’i Jehovah eran-tany sy ireo olon-kafa liana amin’ny fahalalahana ara-pivavahana.