Nivoaka tamin’ny 5 Jona 2022 Ny Soratra Grika Kristianina​—Fandikan-tenin’ny Tontolo Vaovao amin’ny teny mapudungun. Ny Rahalahy Jason Reed, anisan’ny Komitin’ny Sampan’i Silia, no namoaka an’ilay Baiboly vita printy sy amin’ny endrika elektronika. Nasaina nanaraka nivantana an’ilay fandaharana tamin’ny Internet ny mpanatrika. Teo amin’ny 800 teo ho eo ny olona nanatrika an’ilay izy.

Mipetraka any amin’ny faritra atsimo sy afovoan’i Silia ary any Arzantina ny ankamaroan’ny mponina mapuche, izany hoe eo anelanelan’ny Oseana Pasifika sy Oseana Atlantika. Misy ala, volkano, ny tendrombohitr’i Andes, ary lemaka midadasika any amin’io faritra io. Tia mandray vahiny sady manaja fivavahana ny mponina mapuche.

Efa hatramin’ny 1901 no nisy ampahana Baiboly voadika tamin’ny teny mapudungun. Nisy Fikambanana Mampiely Baiboly nandika ny Soratra Grika Kristianina iray manontolo, tamin’ny 1997. Nila fandikan-teny marina tsara ihany anefa ny olona tany. Nampiasa an’ilay teny hoe “lakroa”, ohatra, ilay Baiboly nivoaka tamin’ny 1997 rehefa nilaza an’ilay hazo namantsihana an’i Jesosy ho faty. Ny Fandikan-tenin’ny Tontolo Vaovao indray anefa nampiasa an’ilay teny mapudungun hoe “log” mba hampisehoana hoe maty teo amin’ny tsato-kazo i Jesosy.

Niavaka be ity fandaharana ity satria niara-nivoaka tamin’ilay Fandikan-tenin’ny Tontolo Vaovao tamin’ny endrika elektronika koa ilay Baiboly vita printy. Tonga dia nozaraina an’ilay Baiboly vita printy àry ny olona tsirairay nanatrika an’ilay fandaharana nivantana tany amin’ny Efitrano Fanjakana 23. Nanazava ny Rahalahy Jorge González, anisan’ny Komitin’ny Sampan’i Silia hoe: “Lasa mitady tsy hatoky ny Tenin’Andriamanitra ny Mapuche rehefa atao amin’ny endrika elektronika ilay izy. Dia mieritreritra izahay hoe betsaka ny olona ho liana raha mahazo Baiboly vita printy amin’ny Soratra Grika Kristianina​—Fandikan-tenin’ny Tontolo Vaovao amin’ny teny mapudungun.”

Mivavaka isika mba hanampy olona betsaka kokoa avy any amin’ny “firenena rehetra” ity Baiboly ity, amin’izay izy ireo hahalala an’i Jehovah sy hanompo azy.​—Isaia 2:2.