Nisy famotsoran-keloka tany Turkménistan, tamin’ny Febroary 2016, ka gadra an-jatony no nafahana. Tsy tafiditra tao anatin’izany anefa i Bahram Hemdemov. Nampakarina tany amin’ny Fitsarana Tampony tao Turkménistan ilay raharaha. Nolavina anefa izany, telo volana latsaka tatỳ aoriana. Nametraka fitoriana tany amin’ny Komitin’ny Firenena Mikambana Miaro ny Zon’olombelona àry ny mpisolovavan’A^toa Hemdemov, tamin’ny 15 Aogositra 2016.

Nosamborina A^toa Hemdemov, tamin’ny Martsa 2015. Nanao fotoam-pivavahana niaraka tamin’ny Vavolombelona hafa tao an-tranony, any Turkmenabat, izy tamin’izay. Nisy polisy tonga tao dia nisava ny tranony, naka ny fananany, ary nampijaly an’izay niara-nivavaka tao. Tsy nisy fahazoan-dalana akory anefa tany amin’ireo polisy, fa tonga izy ireo dia niditra fotsiny.

Hoy ny mpisolovavan’A^toa Hemdemov: “I Bahram Hemdemov no tena nampijalijalin’ny polisy raha oharina tamin’ireo mpiara-mivavaka taminy, amin’izay matahotra daholo ny Vavolombelona rehetra any Turkmenabat.” Tapa-kevitra ny tsy hiala amin’ny zavatra inoany anefa izy, na dia mafy aza ny nahazo azy.

Manantena ny Vavolombelon’i Jehovah fa tsy ho ela dia havoakan’ny manam-pahefana any Turkménistan A^toa Hemdemov. Tena be famindram-po A^toa Filoha Gurbanguly Berdimuhamedov, raha havoakany amin’ny famotsoran-keloka manaraka A^toa Hemdemov.

Malahelo be an’A^toa Hemdemov i Gulzira vadiny sy ny zanany efatra, ary ny mpiara-mivavaka aminy. Efa tena tsy andrin’izy ireo izay hodiany any an-trano. Miangavy amim-panajana ny manam-pahefana any Turkménistan àry ny Vavolombelon’i Jehovah, mba tsy hanakorontana azy ireo rehefa miara-mivavaka izy ireo.