Namoaka didy nanome rariny ny Vavolombelon’i Jehovah any Kryvyi Rih, any Ukraine, ny Filan-kevitra ao amin’ny Fitsarana Eoropeanina Momba ny Zon’olombelona (CEDH), tamin’ny 3 Septambra 2019. Nomelohin’ilay Fitsarana ny filan-kevitry ny tanàna ao Kryvyi Rih satria nanao fanahy iniana tsy nanome alalana ny rahalahintsika hanorina Efitrano Fanjakana.

Nilaza ilay Filan-kevitra hoe tsy nohajain’ilay filan-kevitry ny tanàna ny Andininy faha-9 (miaro ny zo haneho hevitra sy hanaraka ny feon’ny fieritreretana ary hanana fivavahana) sy ny Andininy voalohany amin’ny Fifanekena No. 1 (miaro ny zon’ny tompon-javatra), ao amin’ny Fifanarahana Eoropeanina Momba ny Zon’olombelona. Nilaza koa ilay Fitsarana hoe tsy maintsy mandoa 7000 euros (28600000 ariary eo ho eo) amin’ireo fiangonana roa tompon’ilay toerana ny filan-kevitry ny tanàna, mba hanonerana ny fahavoazana nihatra tamin’izy ireo sy ny vola laniny teny amin’ny fitsarana. Manana telo volana i Ukraine raha te hampakatra an’ilay raharaha any amin’ny Filan-kevitra Ambony Indrindra ao amin’ny CEDH.

Efa tamin’ny 15 taona lasa ireo fiangonana roa any Kryvyi Rih ireo no nangataka hanorina Efitrano Fanjakana. Tamin’ny 9 Aogositra 2004 izy ireo no nividy trano teo amin’ny tanim-panjakana iray. Nandefa fangatahana hanorina Efitrano Fanjakana teo izy ireo avy eo. Nanome ny fahazoan-dalana voalohany ny filan-kevitry ny tanàna, tamin’ny 28 Septambra 2005, sady nampahatsiahy azy ireo hoe mila jeren’ny fikambanana maromaro ilay tetikasa, alohan’ny hamoahany ny fahazoan-dalana farany.

Rehefa naseho ny manam-pahefana isan-tsokajiny ilay tetikasa dia neken’izy ireo. Nalefa tany amin’ny filan-kevitry ny tanàna àry ny fangatahana fahazoan-dalana farany, tamin’ny 23 Aogositra 2006. Tsy namaly an’ilay fangatahana mihitsy anefa ny filan-kevitry ny tanàna na dia takin’ny lalàna aza ny hanomezany valiny ao anatin’ny iray volana. Na dia nilaza aza ny fitsarana iray hoe nandika lalàna ny filan-kevitry ny tanàna, dia mbola tsy nanome an’ilay fahazoan-dalana farany ihany izy ireo. Nentina tany amin’ny ambaratongam-pitsarana samihafa ilay raharaha nefa tsy nisy vokany, ka nametraka fitarainana tany amin’ny CEDH ny mpiara-manompo amintsika, tamin’ny 13 Aprily 2010.

Faly isika hoe namoaka didy nanome rariny ny mpiara-manompo amintsika any Kryvyi Rih ny CEDH. Mbola tsy malalaka tsara ny asantsika any amin’ny firenena sasany. Mivavaka isika mba ho mora amin’ny mpiara-manompo amintsika any amin’ireny tany ireny ny hanorina trano hivavahana amin’i Jehovah, vokatr’iny didy navoakan’ny CEDH iny.—Salamo 118:5-9.