Ny Rahalahy John Hunguka, anisan’ny Komitin’ny Sampan’i Zimbabwe, no namoaka ny Soratra Grika Kristianina​—Fandikan-tenin’ny Tontolo Vaovao amin’ny teny chitonga (Zimbabwe), tamin’ny 10 Aprily 2022. Nivoaka tamin’ny endrika elektronika ilay Baiboly tamin’izay. Noraisina video mialoha ilay fandaharana ary olona 500 teo ho eo no nanaraka an’ilay izy. Amin’ny Jolay 2022 kosa ny Baiboly vita pirinty no hivoaka.

Ny mponina Tonga no tena mampiasa ny teny chitonga. Any amin’ny faritra atsimo sy faritra andrefan’i Zambia, ary any amin’ny faritra avaratr’i Zimbabwe no misy azy ireo. Nivoaka tamin’ny 2014 Ny Soratra Masina​—Fandikan-tenin’ny Tontolo Vaovao tamin’ny teny chitonga, fiteny fampiasan’ny olona any Zambia. Mitovitovy amin’ny teny chitonga (Zimbabwe) io fiteny io. Ity ny Baiboly voalohany voadika tamin’ny teny chitonga (Zimbabwe). Ny Baiboly tamin’ny teny chitonga fampiasa any Zambia no tsy maintsy nampiasain’ny olona niteny chitonga (Zimbabwe) talohan’ny nivoahan’ity fandikan-teny ity.

Na dia mitovitovy aza ny fiteny chitonga any Zambia sy ny chitonga (Zimbabwe), dia be dia be ny teny sy fehezan-teny tsy mitovy hevitra amin’ireo fiteny roa ireo. Milaza, ohatra, izao ny 1 Jaona 3:17 ao amin’ny Soratra Grika Kristianina​—Fandikan-tenin’ny Tontolo Vaovao, amin’ny teny chitonga any Zambia, hoe tokony hangoraka ny rahalahy “sahirana” ny Kristianina. Raha io fehezan-teny io anefa dia midika hoe rahalahy “adaladala” amin’ny teny chitonga (Zimbabwe), satria izay no hahazoan’ny olona any an’ilay izy. Tsy maintsy nampiasa teny mamoaka tsara an’ilay hevitra àry ny mpandika teny rehefa nandika an’ilay Baiboly tamin’ny teny chitonga (Zimbabwe).

Nilaza ny mpandika teny iray hoe: “Lany fotoana be manazava ny dikan’ny andinin-teny nampiasaiko aho taloha rehefa eny amin’ny fanompoana. Izao aho mamaky andinin-teny fotsiny dia tonga dia azon-dry zareo ny Tenin’Andriamanitra.”

Faly be koa isika, hoatran’ny rahalahintsika mampiasa ny teny chitonga (Zimbabwe), satria afaka mampiasa an’ity fandikan-teny ity ry zareo mba hanampiana ny olona tso-po hahafantatra ny “lalan’ny fiainana.”​—Salamo 16:11.