Mipetraka any Mongolia ny vehivavy iray antsoina hoe Odval. Tsy hainy tsara hoe firy taona izy, fa milaza izy hoe hoatran’ny teraka tamin’ny 1921. Mbola kely izy dia efa niompy ary herintaona fotsiny izy no nianatra tany an-tsekoly. Tsy mahay mamaky teny àry izy. Vao haingana anefa izay, dia nisy bokikely feno sary nanampy azy hahalala an’Andriamanitra sady nahalalany hoe misy zavatra tsara be amin’ny hoavy, ho an’izay mihaino an’Andriamanitra. Tena tiany ny zavatra nianarany.

Namoaka an’io bokikely io ny Vavolombelon’i Jehovah tamin’ny 2011, ary misy karazany roa ilay izy. Samy feno sary tsara tarehy izy roa fa ny iray fotsiny tsy dia misy soratra firy.

Efa ho amin’ny fiteny 583 izao ilay feno soratra kokoa, izany hoe ilay Mihainoa An’Andriamanitra dia Hiaina Mandrakizay Ianao. Amin’ny fiteny 483 kosa ilay hoe Mihainoa An’Andriamanitra, izay vitsy soratra kokoa. Ampitahao amin’ny Fanambarana Iraisam-pirenena Momba ny Zon’olombelona ange izany e! Navoakan’ny Firenena Mikambana izy io ary voadika tamin’ny fiteny 413 tamin’ny Oktobra 2013. Raha atambatra koa ny isan’ny natao pirinty tamin’ireo bokikely roa ireo, dia efa ho 80 tapitrisa.

Faly erỳ ny ramatoa be taona iray tany Brezila nandray an’ilay bokikely Mihainoa An’Andriamanitra. Hoy izy: “Faly aho hoe mba misy mieritreritra ihany ny olona hoatr’anay. Tsy mbola nandray ny gazetinareo mihitsy aho satria tsy mahay mamaky teny. Fa ity bokikely ity tiako.”

Hoy i Brigitte, mipetraka any Frantsa ary tsy mahay mamaky teny: “Isan’andro aho mijery ny sary ao amin’ilay bokikely.”

Hoy ny Vavolombelon’i Jehovah iray any Afrika Atsimo: “Io no bokikely mora ampiasaina indrindra mba hanombohan-dresaka amin’ny Sinoa rehefa hampianatra ny fahamarinana ao amin’ny Baiboly. Nitory tamin’ny olona teny amin’ny oniversite aho ary nitory tamin’ny olona zara raha mahay mamaky teny. Tsy misy antsasak’adiny akory dia vitako ny mampita hevitra fototra avy ao amin’ny Baiboly.”

Misy Vavolombelon’i Jehovah mampianatra mpivady nahita fianarana, any Alemaina. Tena tian’ilay rangahy ilay bokikely. Hoy izy: “Fa maninona no izao vao omenareo ahy ity bokikely ity? Nefa ity mihitsy no tena manampy ahy hahazo tsara ny tantara sy zavatra lazaina ao amin’ny Baiboly!”

Hoy ny vehivavy iray marenina any Aostralia: “Efa an-taonany maro aho no nipetraka tany amin’ny tranon-drelijiozy niaraka tamin’ny masera. Izaho no akaiky indrindra ny mpitondra fivavahana, nefa mbola tsy nisy tamin-dry zareo nampianatra ahy momba ny Fanjakan’Andriamanitra. Ny sary ao amin’io bokikely io no nahazoako tsara ny tena dikan’ny Matio 6:10.”

Izao no nosoratan’ny biraon’ny sampan’ny Vavolombelon’i Jehovah any Kanada: “Maro amin’ny olona avy any Sierra Leone mipetraka atỳ no miaiky fa miezaka mafy mitory momba ny Baiboly ny Vavolombelon’i Jehovah. Nahita an’ilay bokikely hoe Mihainoa An’Andriamanitra amin’ny teny krio mantsy izy ireo. Nisy niteny hoe: ‘Tena mikarakara ny olona ianareo, tsy hoatran’ny olon-kafa.’”