Hita amin’ny ady any Ukraine fa mampirisika ny olona hanohana ady ny mpitondra fivavahana kristianina maro. Mariho hoe samy miandany amin’ny miaramila ao amin’ny taniny ry zareo:

•   “Tena manaja sy mankasitraka ny miaramilantsika izahay satria miaro an’ny Ukraine tanindrazany amin’ny fahavalo izy ireo. ... Mivavaka sy manohana anareo foana izahay ary any aminareo foana ny fonay.”​—Épiphane I, filohan’ny Eglizy Ortodoksa Iokrenianina any Kiev, araka ny tatitry ny The Jerusalem Post, tamin’ny 16 Martsa 2022.

•   “Mbola eo am-panafihana an’ny Ukraine i Moscou no nandamina fotoam-pivavahana ho an’ny miaramila rosianina ny filohan’ny Eglizy Ortodoksa Rosianina tamin’ny alahady. Nampirisika an’ireo miaramila izy mba hiaro ny tanindrazany ary raha resaka fiarovana tanindrazana, hono, dia ‘tsy misy hoatran’ny Rosianina.’”​—Reuters, 3 Aprily 2022.

 Tokony handray anjara amin’ny ady ve ny Kristianina? Inona no lazain’ny Baiboly?

 Asehon’ny Baiboly hoe tsy mandray anjara amin’ny ady ny tena mpanara-dia an’i Jesosy Kristy.

•   “Avereno amin’ny tranony ny sabatrao, fa ho fatin’ny sabatra izay rehetra mampiasa sabatra.”​—Matio 26:52.

   Tena mankatò an’io tenin’i Jesosy io ve ny olona anankiray raha mankasitraka na mandray anjara amin’ny ady?

•   “Izao no didy vaovao omeko anareo: Mifankatiava ianareo, ka hoatran’ny nitiavako anareo no tokony mba hifankatiavanareo koa. Raha mifankatia ianareo, dia izany no hahafantaran’ny olona rehetra fa mpianatro ianareo.”​—Jaona 13:34, 35.

   Mampiseho an’io fitiavana mampiavaka ny mpianatra na mpanara-dia an’i Jesosy io ve ny olona anankiray raha manohana ady?

 Raha mila fanazavana fanampiny ianao, dia vakio ilay lahatsoratra hoe “Mety ve Raha Miady ny Kristianina?”

 Ary amin’izao, vitan’ny Kristianina ve ny tsy handray anjara amin’ny ady? Eny. Nilaza mialoha ny Baiboly fa hisy olona avy amin’ny firenena rehetra hiaina mifanaraka amin’ny fampianaran’i Jesosy, izany hoe “tsy hianatra ady intsony.” Antsoin’ny Baiboly hoe “andro farany” izao andro iainantsika izao, ary amin’izao izany no tanteraka.​—Isaia 2:2, 4, fanamarihana ambany pejy.

•   Raha mila fanazavana fanampiny ianao, dia vakio ilay andian-dahatsoratra ao amin’ny Tilikambo Fiambenana hoe “Mankasitraka ny Ady ve Andriamanitra?”

 Tsy ho ela i Jehovah, a ilay “Andriamanitry ny fiadanana”, dia hampiasa an’ilay fitondram-panjakany any an-danitra mba hanafahana ny olona amin’ny “fampahoriana sy ny herisetra.”​—Filipianina 4:9; Salamo 72:14.

•   Raha tianao ho fantatra hoe ahoana no hanatanterahany an’izany, dia jereo ilay video hoe Inona moa ny Fanjakan’Andriamanitra?