Vita tamin’ny alahady 20 Novambra 2022 ny COP27, izany hoe ny Fivoriana Fanaon’ny Firenena Mikambana Momba ny Fiovan’ny Toetrandro. Tapaka tamin’izay fa homena vola ny firenena matetika tra-boina, mba hiatrehan-dry zareo ny loza vokatry ny toetrandro. Samy miaiky anefa ry zareo hoe tsy mahavaha ny tena fototr’ilay olana izany.

•   “Faly aho tamin’ilay fanapahan-kevitray hoe hanokana vola hanampiana an’izay tra-boina vokatry ny toetrandro ratsy”, hoy i António Guterres, sekretera jeneralin’ny Firenena Mikambana, tamin’ny 19 Novambra 2022. “Tsoriko anefa fa tsy ampy izany . . . Mila vonjy maika ny tanintsika.”

•   “Mbola hisy loza mahatsiravina eto an-tany atsy ho atsy, vokatry ny toetrandro ratsy.”​—Mary Robinson, filoham-pirenen’i Irlandy taloha sady Ambasadaoro ho An’ny Zon’olombelona UN taloha, 20 Novambra 2022.

 Ny tanora no tena manahy ny amin’ny hoavin’ity tanintsika ity. Afaka miara-miasa mba hisorohana ny vokatry ny toetrandro ratsy araka ny nampanantenainy ve anefa ny firenena? Inona no lazain’ny Baiboly?

 Marina aloha hoe manao ezaka be ny firenena eran-tany amin’izao hamahana an’io olana io. Milaza anefa ny Baiboly fa tsy hahavita hamaha tanteraka an’ilay olana vokatry ny toetrandro ratsy ry zareo. Jereo ireto antony roa ireto:

•   “Izay mibilaka dia tsy azo ahitsy.”​—Mpitoriteny 1:15.

   Inona no dikan’izany? Voafetra ny zava-bitan’ny fanjakana, satria tsy natao hifampitondra ny olombelona. (Jeremia 10:23) Mety hoe mahavita miara-miasa ny firenena, kanefa tsy mbola hahavita hamaha ny olana eto amin’izao tontolo izao mihitsy na hiezaka hoatran’ny inona aza.

•   “Fa ny olona ho tia tena, ho tia vola, . . . tsy ho azo ifanarahana.”​—2 Timoty 3:2, 3.

   Inona no dikan’izany? Efa nilaza mialoha ny Baiboly fa ho tia tena ny ankamaroan’ny olona amin’izao androntsika izao, ka tsy te hiara-hiasa mba hanatsarana ny fiainan’ny olon-kafa.

 Tsy miankina amin’ny zavatra ampanantenain’ny fanjakan’olombelona anefa ny hoavin’ny tanintsika. Efa nanome Mpitondra mahay Andriamanitra, dia i Jesosy Kristy. Hitondra maneran-tany izy, ary izao no lazain’ny Baiboly momba azy:

•   “Ho eo am-pelatanany ny fitondrana. Ny anarany hatao hoe Mpanolo-tsaina Mahagaga, Andriamanitra Mahery, Ray Mandrakizay, Andrianan’ny Fiadanana.”​—Isaia 9:6, fanamarihana ambany pejy.

 I Jesosy no Mpanjakan’ny Fanjakan’Andriamanitra, ary any an-danitra io fitondrana io. (Matio 6:10) Manana hery sy fahendrena hikarakarana ny tanintsika sy ny mponina eto izy, sady tena te hanao an’izany. (Salamo 72:12, 16) Rehefa mitondra io fitondrana any an-danitra io, dia tsy hisy havelany ‘hanimba ny tany’ intsony, ary haveriny amin’ny laoniny indray ny tontolo iainana eto.​—Apokalypsy 11:18; Isaia 35:1, 7.

 Raha tianao ny hahafantatra hoe inona no tena vahaolana amin’ny loza vokatry ny fiovaovan’ny toetrandro, dia vakio ilay lahatsoratra hoe “Ny Fiovan’ny Toetrandro sy ny Hoavintsika.”