Amin’izao fiantombohan’ny taona 2023 izao, dia manantena daholo isika hoe hihatsara ny fiainantsika sy ny an’ny fianakaviantsika. Inona no hanampy antsika ho be fanantenana?

 Izao ny vaovao tsara resahin’ny Baiboly: Mandalo ihany ny olana atrehintsika amin’izao dia kely sisa ireny dia hilamina. Raha ny marina dia “nosoratana mba hampianarana antsika” ny Baiboly, “amin’izay isika dia hanana fanantenana, satria ... manome fampiononana antsika ny Soratra Masina.”​—Romanina 15:4.

•   Vakio ilay lahatsoratra hoe “Mbola Hihatsara ve ny Fiainana Amin’ny Hoavy?” raha te hahafantatra misimisy kokoa momba ny fampanantenan’ny Baiboly ianao.

 “Vatofantsiky ny aintsika” ny fampanantenan’ny Baiboly. (Hebreo 6:19) Mahatonga antsika ho tony ny fanantenana satria manampy antsika hiatrika olana, hanana toe-tsaina tsara foana, ary ho sambatra mandrakizay. Diniho ireto ohatra ireto:

•   Nanampy lehilahy iray nanana fahazaran-dratsy ny fampanantenana ao amin’ny Baiboly. Jereo ilay video hoe Nankaleo Ahy ny Fomba Fiainako.

•   Manampy antsika ny fampanantenan’ny Baiboly rehefa maty ny olona akaiky antsika. Jereo ilay video hoe Fampaherezana ho An’izay Nidonam-pahoriana.

 Betsaka no manantena zavatra tsara be nefa tsy azony antoka hoe tena ho tanteraka izany. Tsy hoatr’izany ny fampanantenan’ny Baiboly. Nahoana? Satria avy amin’i Jehovah Andriamanitra a ny fampanantenana ao, ary “tsy mahay mandainga” izy. (Titosy 1:2) I Jehovah ihany no mahavita manatanteraka ny fampanantenany rehetra. Afaka manao izay tiany mantsy izy.​—Salamo 135:5, 6.

 Tena tianay handray soa avy amin’ny fampanantenana azo antoka ao amin’ny Baiboly ianao. Hatoky kokoa an’izay voalaza ao ianao raha ‘mandinika tsara ny Soratra Masina.’ (Asan’ny Apostoly 17:11) Andramo ange ilay fianarana Baiboly miaraka amin’ny mpampianatra e! Ho tsara fiantombohana ny taona 2023 raha manana fanantenana ianao!