1 Tantara 14:1-17
14 Ary nandefa iraka ho any amin’i Davida i Hirama+ mpanjakan’i Tyro,+ sady nandefa hazo sedera+ sy mpanorina rindrina ary mpandrafitra, mba hanorina trano ho azy.+
2 Ary fantatr’i Davida fa efa nampitoetra+ azy ho mpanjakan’ny Israely i Jehovah, satria nasandratra ho avo ny fanjakany, noho ny amin’ny Israely olony.+
3 Ary naka vady hafa+ koa i Davida tao Jerosalema, ka mbola niteraka zazalahy sy zazavavy hafa koa.+
4 Ireto avy ny anaran’ireo zaza naterany tany Jerosalema: Samoa+ sy Sobaba,+ Natana+ sy Solomona,+
5 sy Jibara,+ Elisoa, Elipeleta,+
6 Noga, Nafega,+ Jafia,
7 Elisama,+ Beliada ary Elifeleta.+
8 Rehefa ren’ny Filistinina fa nohosorana ho mpanjakan’ny Israely rehetra i Davida,+ dia niakatra hitady an’i Davida izy rehetra.+ Ren’i Davida izany, ka nivoaka hiady tamin’izy ireo izy.
9 Ary tonga nanafika teo amin’ny lemaka ivan’ny Refaima ny Filistinina.+
10 Dia nanontany an’Andriamanitra+ i Davida hoe: “Hiakatra hamely ny Filistinina ve aho? Hatolotrao eo an-tanako ve izy ireo?” Ary hoy i Jehovah taminy: “Miakara, fa hatolotro eo an-tananao tokoa izy ireo.”
11 Koa niakatra nankany Bala-perazima+ i Davida, ka novonoiny tany izy ireo. Ary hoy i Davida: “Andriamanitra efa nampiasa ny tanako, ka namaky ny laharan’ny fahavaloko sahala amin’ny rano mamaky fefiloha.” Koa natao hoe Bala-perazima ny anaran’io toerana+ io.
12 Ary navelan’ny Filistinina teo ny sampiny.+ Koa nodorana ireny,+ araka ny baikon’i Davida.
13 Nanafika teo amin’ny lemaka iva indray ny Filistinina tatỳ aoriana.+
14 Koa nanontany+ an’Andriamanitra indray i Davida, ka hoy Andriamanitra: “Aza miakatra manaraka azy ary aza manitsy mamely azy, fa mandehana mihodidina ka tsenao tandrifin’ireo hazo bakà izy.+
15 Ary rehefa mandre figadongadona eny an-tendron’ireo hazo bakà ianao,+ dia mivoaha hiady+ satria ho efa nivoaka hialoha anao Andriamanitra,+ mba hamely ny tobin’ny Filistinina.”
16 Koa nanao araka izay nandidian’Andriamanitra azy i Davida.+ Dia nasian’izy ireo ny tobin’ny Filistinina, hatrany Gibeona+ ka hatrany Gazera.+
17 Dia niely nanerana ny tany ny lazan’i Davida,+ ary nataon’i Jehovah natahotra azy ny firenena rehetra.+
