Jaona 10:1-42
10 “Lazaiko aminareo marina dia marina tokoa fa izay tsy miditra eo amin’ny vavahadin’ny+ valan’ondry, fa mananika any an-toeran-kafa dia mpangalatra sy mpandroba.+
2 Fa izay miditra eo amin’ny vavahady+ kosa no mpiandry+ ondry.+
3 Izy no vohan’ny mpiandry vavahady,+ ary mihaino ny feony ny ondry.+ Dia antsoiny amin’ny anarany avy ny ondriny, ka tarihiny hivoaka.
4 Koa rehefa tafavoakany daholo ny ondriny rehetra, dia mandeha eo alohan’ireo izy, ary ny ondry manaraka+ azy satria fantatr’ireo ny feony.+
5 Tsy hanaraka olona tsy fantany mihitsy ireo, fa handositra+ azy kosa satria tsy fantany ny feony.”+
6 Nilaza izany fanoharana izany taminy i Jesosy. Tsy azon’izy ireo anefa izay nolazain’i Jesosy taminy.+
7 Dia hoy indray i Jesosy: “Lazaiko aminareo marina dia marina tokoa fa izaho no vavahadin’ondry.+
8 Mpangalatra sy mpandroba izay rehetra naka ny toerako,+ nefa tsy nihaino azy ny ondry.+
9 Izaho no vavahady.+ Izay miditra eo amiko dia ho voavonjy, ary hiditra sy hivoaka izy ary hahita tanimbilona.+
10 Ny mpangalatra+ tsy tonga raha tsy hangalatra sy hamono ary handringana.+ Fa izaho kosa tonga mba hananany fiainana, eny, hananany fiainana maharitra.
11 Izaho no mpiandry+ tena tsara. Ny mpiandry tena tsara mahafoy ny ainy ho an’ny ondry.+
12 Ny mpikarama+ kosa, noho izy tsy mba mpiandry sy tsy tompon’ny ondry, dia mandao ny ondry sy mandositra raha mahita amboadia manatona, ka rombahin’ny amboadia sy aparitany ny ondry.+
13 Mandositra izy satria mpikarama,+ ka tsy raharahainy ny ondry.+
14 Izaho no mpiandry tena tsara ary fantatro ny ondriko,+ ary ny ondriko koa mahalala ahy,+
15 toy ny ahafantaran’ny Ray ahy sy ahafantarako ny Ray.+ Ary foiko ho an’ny ondry ny aiko.*+
16 “Manana ondry hafa+ tsy ao amin’ity vala ity+ aho. Ireny koa tsy maintsy hoentiko, ary hihaino ny feoko izy,+ ka ho tonga andiany iray ireo sady ho iray ihany ny mpiandry.+
17 Izao no itiavan’ny Ray ahy:+ Satria afoiko ny aiko+ mba hahazoako azy indray.
18 Tsy misy manaisotra ny aiko amiko fa izaho no mahafoy azy araka ny nahim-poko. Manana fahefana hamoy azy aho, ary manana fahefana hahazo azy indray.+ Izany no didy+ voaraiko avy tamin’ny Raiko.”
19 Dia nisara-kevitra+ indray ny Jiosy noho izany teny izany.
20 Ary maro no nanao hoe: “Misy demonia izy,+ sady adala. Koa nahoana ianareo no mihaino azy?”
21 Fa hoy ny sasany: “Tsy tenin’olona misy demonia izany. Ny demonia angaha afaka mampahiratra ny mason’ny jamba?”
22 Ary tonga ny fetin’ny fitokanana tany Jerosalema. Ririnina tamin’izay,
23 ary nandeha tao amin’ny tempoly i Jesosy, tao amin’ny lala-mitafon’i* Solomona.+
24 Dia nitangoronan’ny Jiosy izy, ary hoy ireo: “Mandra-pahoviana ianao no hampisalasala anay? Tsory+ aminay raha ianao no Kristy.”+
25 Dia namaly i Jesosy hoe: “Efa nolazaiko taminareo, saingy tsy mino ianareo. Ny asa izay ataoko amin’ny anaran’ny Raiko no porofo manamarina ahy.+
26 Tsy mino anefa ianareo, satria tsy anisan’ny ondriko.+
27 Ny ondriko+ mantsy mihaino ny feoko, ary izaho mahalala azy, ary izy manaraka ahy.+
28 Dia omeko fiainana mandrakizay izy,+ ary tsy ho ringana mihitsy+ sady tsy hisy handrombaka azy etỳ an-tanako.+
29 Izay nomen’ny Raiko+ ahy dia sarobidy noho ny zavatra hafa rehetra,+ ary tsy misy maharombaka azy eny an-tanan’ny Ray.+
30 Ary izaho sy ny Ray dia iray* ihany.”+
31 Dia naka vato hitorahana azy indray ny Jiosy.+
32 Hoy i Jesosy: “Asa tsara maro avy tamin’ny Ray no nasehoko taminareo, koa iza amin’ireo no itorahanareo vato ahy?”
33 Hoy ny navalin’ny Jiosy azy: “Tsy noho ny asa tsara no itorahanay vato anao, fa noho ny teny fanevatevana,+ satria olona ihany ianao nefa manao ny tenanao ho andriamanitra.”+
34 Dia hoy i Jesosy: “Tsy voasoratra ao amin’ny Lalànareo+ ve hoe: ‘Hoy aho: “andriamanitra ianareo”’?+
35 Koa raha antsoiny hoe ‘andriamanitra’+ ireo nomelohin’ny tenin’Andriamanitra, ary tsy azo foanana ny Soratra Masina,+
36 nahoana aho, izay nohamasinin’ny Ray sy nirahiny ho amin’izao tontolo izao, no lazainareo hoe manevateva an’Andriamanitra satria aho nilaza hoe: Zanak’Andriamanitra+ aho?
37 Aza mino ahy raha tsy manao ny asan’ny+ Raiko aho.
38 Fa raha manao izany kosa aho, na tsy mino ahy aza ianareo, dia minoa kosa noho ny asa ataoko,+ mba hahafantaranareo ary mbola hahafantaranareo hatrany fa ny Ray dia tafaray amiko, ary izaho tafaray amin’ny Ray.”+
39 Dia nitady hisambotra azy indray ireo,+ nefa niala izy ka tsy azony.+
40 Nankany ampitan’ny Reniranon’i Jordana indray izy, ho any amin’ilay toerana nanaovan’i Jaona batisa+ tamin’ny voalohany, ary nijanona tany.
41 Nisy olona maro tonga teo aminy, ka nilaza hoe: “Tsy mba nanao famantarana i Jaona na iray aza. Marina daholo anefa izay rehetra nolazainy momba ity lehilahy ity.”+
42 Ary maro no nino an’i Jesosy tany.+
Fanamarihana
^ Gr.: psykè. Jereo F.F. 3A.
^ Andry maro no manohana ny tafony.
^ Na: “tafaray.” Gr.: hen, izay midika hoe miara-miasa amim-piraisan-tsaina.
