Lioka 13:1-35
13 Ary tamin’izay indrindra, dia nisy tamin’ireo olona teo nitantara tamin’i Jesosy ny nanjo ny Galilianina+ sasany. Nampifangaroin’i Pilato tamin’ny sorona nataon’ireo Galilianina ireo mantsy ny ran’izy ireo.
2 Koa hoy i Jesosy: “Heverinareo ve fa mpanota+ kokoa noho ny Galilianina rehetra ireny, satria izany no nanjo azy?
3 Tsy izany velively, hoy aho aminareo. Ho ringana toa azy koa anefa ianareo rehetra raha tsy mibebaka.+
4 Ary ireo olona valo ambin’ny folo maty nianjeran’ny tilikambo tao Siloama, heverinareo ve fa mpanota* kokoa noho ny mponina rehetra ao Jerosalema ireny?
5 Tsy izany velively, hoy aho aminareo. Ho ringana toa azy koa anefa ianareo rehetra raha tsy mibebaka.”+
6 Dia nanohy ny teniny izy, ka nilaza izao fanoharana izao: “Nisy lehilahy nanana aviavy izay nambolena tao an-tanimboalobony.+ Dia tonga hitady voa taminy izy,+ saingy tsy nahita mihitsy.+
7 Ary hoy izy tamin’ny mpikarakara tanimboaloboka: ‘Efa telo taona+ aho izao no tonga nitady voa tamin’ity aviavy ity, nefa tsy nahita mihitsy. Koa kapao any io!+ Nahoana io no avela eo, ka manjary tsy azo ampiasaina ny tany?’
8 Fa namaly ilay mpikarakara tanimboaloboka hoe: ‘Tompo ô, avelao eo ihany izy+ amin’ity taona ity, mandra-pangadiko ny manodidina azy, sy mandra-panisiko zezika azy.
9 Koa raha hamoa izy, dia tsara! Fa raha tsy hamoa kosa izy, dia hokapainao ihany.’”+
10 Ary nampianatra tao amin’ny synagoga anankiray i Jesosy tamin’ny sabata.
11 Ary io fa nisy vehivavy azon’ny fanahy ratsy+ mampahalemy teo, ka nalemy efa nandritra ny valo ambin’ny folo taona izy. Koa tena nanjoko be izy, ary tsy afa-nitraka mihitsy.
12 Niantso azy i Jesosy rehefa nahita azy, ka nanao hoe: “Afaka+ amin’ny fahalemenao ianao, ravehivavy.”
13 Dia nametra-tanana taminy izy, ka nitraka avy hatrany+ ravehivavy, ary nanome voninahitra an’Andriamanitra.
14 Tezitra anefa ny mpitantana ilay synagoga noho i Jesosy nanasitrana tamin’ny sabata, ka hoy izy tamin’ny vahoaka: “Enina andro no natao hiasana,+ ka amin’ireo andro ireo ianareo no tokony ho tonga hositranina, fa tsy amin’ny andro sabata.”+
15 Namaly azy anefa ny Tompo hoe: “Ry mpihatsaravelatsihy,+ tsy samy mamaha ny ombiny na ny ampondrany avy ve ianareo amin’ny sabata, ka mitondra azy hisotro rano?+
16 Koa tsy tokony hovahana ho afa-patorana amin’ny andro sabata àry ve ity vehivavy zanak’i Abrahama+ ity, izay efa nafatotr’i Satana nandritra ny valo ambin’ny folo taona be izao?”
17 Ary menatra daholo ny mpanohitra azy+ noho ny nilazany izany. Fa ravoravo kosa ny vahoaka rehetra noho ny zavatra malaza rehetra nataon’i Jesosy.+
18 Ary hoy ihany izy: “Mitovy amin’inona ny fanjakan’Andriamanitra? Ary inona no hanoharako azy?+
19 Mitovy amin’ny voan-tsinapy* izy io, izay nalain’ny olona ka nataony tao an-jaridainany, ary naniry ka tonga hazo, ary nitoeran’ny voro-manidina+ teny amin’ny sampany.”+
20 Ary hoy indray izy: “Inona no hanoharako ny fanjakan’Andriamanitra?
21 Tahaka ny lalivay izy io, izay nalain’ny vehivavy anankiray ka nampifangaroiny tamin’ny* lafarinina intelon’ny famarana lehibe mandra-pitombon’ny koba manontolo.”+
22 Dia nandeha nitety tanàna sy vohitra izy, ka nampianatra sady nanohy ny diany ho any Jerosalema.+
23 Ary hoy ny lehilahy anankiray taminy: “Tompo ô, vitsy ve ny hovonjena?”+ Hoy i Jesosy tamin’izy ireo:
24 “Miezaha+ mafy dia mafy hiditra amin’ny varavarana tery,+ fa maro, hoy aho aminareo, no hitady hiditra nefa tsy ho afaka.+
25 Raha vao mitsangana hanidy varavarana mantsy ny tompon-trano, nefa amin’izay ianareo no manomboka mijoro ao ivelany sy mandondòna ao am-baravarana, ka manao hoe: ‘Mba vohay re izahay, tompoko ô!’,+ dia izao no havaliny anareo: ‘Tsy fantatro na avy aiza ianareo, na avy aiza.’+
26 Dia hanomboka hilaza ianareo hoe: ‘Nihinana sy nisotro teo anatrehanao ange izahay e, ary nampianatra teny an-dalambenay ianao.’+
27 Hilaza aminareo anefa izy hoe: ‘Tsy fantatro na avy aiza ianareo, na avy aiza. Mialà amiko, ianareo mpanao ny tsy marina!’+
28 Any ianareo no hitomany sy hitoloko,+ rehefa hahita an’i Abrahama sy Isaka ary Jakoba mbamin’ny mpaminany rehetra ao amin’ny fanjakan’Andriamanitra,+ fa ianareo kosa voaroaka eny ivelany.
29 Ary ho tonga avy any atsinanana sy andrefana ary avaratra sy atsimo+ ny olona ka handry ilika hisakafo ao amin’ny fanjakan’Andriamanitra.+
30 Ary misy ny farany ho voalohany, ary misy ny voalohany ho farany.”+
31 Tamin’izay indrindra no nisy Fariseo nanatona, ka nanao taminy hoe: “Mandehana ka mialà eto, fa mitady hamono anao i Heroda.”
32 Dia hoy izy tamin’ireo: “Mandehana ka lazao amin’iny amboadia+ fetsy iny hoe: ‘Jereo fa mandroaka demonia sy manasitrana aho anio sy rahampitso, fa rahafakampitso dia ho vita ny asako.’+
33 Na izany aza, tsy maintsy mandeha aho anio sy rahampitso ary rahafakampitso, satria ny mpaminany tsy azo vonoina any ivelan’i Jerosalema.+
34 Ry Jerosalema, ry Jerosalema, izay mpamono+ ny mpaminany sy mpitora-bato+ an’izay irahina ho any aminy! Impiry aho no te hanangona ny zanakao, tahaka ny fanangon’ny reniakoho ny zanany ao ambany elany!+ Tsy nety anefa ianareo.+
35 Hilaozana ny tranonareo+ ka havela ho anareo. Lazaiko aminareo fa tsy hahita ahy intsony ianareo mandra-pilazanareo hoe: ‘Mahazo fitahiana ilay tonga amin’ny anaran’i Jehovah!’”+
