Matio 27:1-66
27 Nony maraina ny andro, dia nikaon-doha ny amin’ny fomba hamonoana an’i Jesosy ho faty ny lehiben’ny mpisorona sy ny anti-panahy rehetran’ny vahoaka.+
2 Ary nafatony izy, dia nentiny ka natolony an’i Pilato governora.+
3 Ary i Jodasy, ilay namadika azy, dia nahita fa voaheloka i Jesosy. Koa nanenina i Jodasy ka namerina ny farantsa volafotsy telopolo+ tamin’ny lehiben’ny mpisorona sy ny anti-panahy,
4 sady niteny hoe: “Nanota aho fa namadika olo-marina.”*+ Fa hoy ireo: “Ahoanay inona izany? Raharahanao izany!”+
5 Koa natsipin’i Jodasy tao amin’ny tempoly ireo farantsa volafotsy. Ary niala teo izy, dia lasa nananton-tena.+
6 Naka an’ireo farantsa volafotsy anefa ny lehiben’ny mpisorona, ka nanao hoe: “Vidin-dra ireto, ka tsy azo arotsaka ao amin’ny toerana masina fitehirizan-karena.”
7 Ary niara-nidinika izy ireo, ka novidiny tamin’ilay vola ny sahan’ny mpanefy tanimanga, mba hatao fandevenam-bahiny.
8 Koa nantsoina hoe “Sahan-dra”+ io saha io mandraka androany.
9 Ary tanteraka izay nampilazaina an’i Jeremia mpaminany hoe: “Nalain’ireo ny farantsa volafotsy telopolo,+ izay vidiny nanombanan’ny sasany tamin’ny zanak’Israely azy.
10 Nomen’izy ireo hividianana ny sahan’ny mpanefy tanimanga+ izany, araka izay nandidian’i Jehovah ahy.”
11 Ary nijoro teo anatrehan’ny governora i Jesosy, ka nanontaniany hoe: “Ianao ve no mpanjakan’ny Jiosy?”+ Dia hoy ny navalin’i Jesosy: “Voalazanao.”+
12 Tsy namaly+ anefa izy rehefa nampangain’ny+ lehiben’ny mpisorona sy ny anti-panahy.
13 Ary hoy i Pilato: “Tsy renao ve ny hamaroan’ny fiampangany anao?”+
14 Gaga be ilay governora fa tsy namaly azy izy na indraim-bava aza.+
15 Ary fanaon’ny governora isaky ny fety ny nanafaka voafonja iray izay tian’ny vahoaka.+
16 Ary nisy voafonja iray nalaza ratsy nantsoina hoe Barabasy,+ tamin’izay fotoana izay.
17 Koa rehefa tafangona ny olona, dia hoy i Pilato taminy: “Iza no tianareo hafahako ho anareo: i Barabasy sa i Jesosy ilay antsoina hoe Kristy?”+
18 Fantany mantsy fa noho ny fialonana+ no nanoloran’ireo an’i Jesosy.+
19 Ankoatra izany, raha mbola nipetraka teo amin’ny toeram-pitsarana i Pilato, dia nisy olona nirahin’ny vadiny hilaza taminy hoe: “Aza miditra amin’ny raharaha momba an’io olo-marina+ io ianao, fa nijaly be aho androany rehefa nanonofy+ azy.”
20 Nandresy lahatra ny vahoaka anefa ny lehiben’ny mpisorona sy ny anti-panahy mba hangataka an’i Barabasy,+ fa hampamono an’i Jesosy kosa.
21 Koa nanontany azy ireo indray ny governora hoe: “Iza amin’izy roa lahy no tianareo hafahako ho anareo?” Dia hoy ireo: “Barabasy.”+
22 Ary hoy i Pilato: “Inona àry no hataoko amin’i Jesosy, ilay antsoina hoe Kristy?” Dia hoy izy rehetra: “Aoka hofantsihana amin’ny hazo fijaliana izy!”+
23 Ary hoy izy: “Fa nahoana? Inona no ratsy nataony?” Vao mainka anefa niantsoantso ireo hoe: “Aoka hofantsihana amin’ny hazo fijaliana izy!”+
24 Ary hitan’i Pilato fa tsy nisy vokany izay nataony fa vao mainka nisy savorovoro. Koa naka rano izy+ ka nanasa tanana teo anatrehan’ny vahoaka sady nilaza hoe: “Tsy tompon’andraikitra amin’ny fahafatesan’io* lehilahy io aho, fa raharahanareo izany.”
25 Dia hoy ny navalin’ny olona rehetra: “Izahay sy ny zanakay no ho tompon’andraikitra amin’ny fahafatesany.”*+
26 Koa nafahan’i Pilato ho an’ny vahoaka i Barabasy, fa nasainy nokaravasina+ kosa i Jesosy ka natolony hofantsihana amin’ny hazo fijaliana.+
27 Ary nentin’ny miaramilan’ny governora nankao an-dapan’ny governora i Jesosy, ary novorin’izy ireo teo aminy ny miaramila rehetra.+
28 Dia nesorin’ireo ny fitafian’i Jesosy, ka nampitafiany lamba mena midorehitra izy.+
29 Nandrandrana fehiloha tsilo koa ireo ka nataony teo amin’ny lohan’i Jesosy, dia nasiany bararata teny an-tanany havanana. Ary nandohalika teo anatrehany izy ireo, ka nanao azy ho fihomehezana+ sady niteny hoe: “Arahaba, ry Mpanjakan’ny Jiosy!”+
30 Dia nororan’ireo+ izy sady nalainy ilay bararata, ka nokapohiny ny lohany.
31 Tamin’ny farany, rehefa avy nanao azy ho fihomehezana+ ireo, dia nanaisotra an’ilay lamba ka nampanao azy indray ny akanjony ivelany ary nitondra azy hofantsihana amin’ny hazo fijaliana.+
32 Nony nivoaka izy ireo, dia nahita lehilahy iray nantsoina hoe Simona,+ teratany avy any Kyrena. Notereny hanao fanompoana io lehilahy io mba hibata ny hazo fijalian’i Jesosy.
33 Rehefa tonga teo amin’ny toerana iray antsoina hoe Golgota,+ izany hoe Ikarandoha, izy ireo,
34 dia nomeny divay niharo zava-mangidy+ i Jesosy hosotroiny. Tsy nety nisotro anefa izy rehefa avy nanandrana izany.+
35 Nony voafantsik’ireo+ izy, dia nataon’izy ireo antsapaka+ ny fizarana ny akanjony+ ivelany.
36 Ary nipetraka ireo, sady niambina azy teo.
37 Napetany terỳ ambonin’ny lohany koa ny soratra milaza ny fiampangana azy hoe: “Ity no Jesosy Mpanjakan’ny Jiosy.”+
38 Nisy jiolahy roa koa nampiarahina taminy ka natao teo amin’ny tsato-kazo: Ny iray teo ankavanany, ary ny iray teo ankaviany.+
39 Koa nanomboka nanevateva+ azy ny mpandalo, sady nihivingivin-doha+
40 no niteny hoe: “Ry ilay nilaza hoe handrodana ny tempoly+ sy hanorina azy ao anatin’ny telo andro, vonjeo ny tenanao! Raha zanak’Andriamanitra ianao, midìna avy eo amin’ny hazo fijaliana!”+
41 Toy izany koa no nataon’ny lehiben’ny mpisorona sy ny mpanora-dalàna ary ny anti-panahy izay samy nanao azy ho fihomehezana sady nilaza hoe:+
42 “Ny hafa novonjeny, fa ny tenany tsy hainy vonjena! Mpanjakan’ny+ Israely izy. Aoka izy izao hidina avy eo amin’ny hazo fijaliana, dia hino azy izahay.+
43 Nitoky tamin’Andriamanitra izy. Koa raha tia azy Andriamanitra, dia aoka hamonjy+ azy ankehitriny, satria hoy izy: ‘Zanak’Andriamanitra aho.’”+
44 Na ireo jiolahy nampiarahina taminy teo amin’ny tsato-kazo aza mba nandatsa azy toy izany koa.+
45 Ary nisy haizina+ nanarona an’ilay faritra manontolo, nanomboka tamin’ny ora fahenina* ka hatramin’ny ora fahasivy.+
46 Ary tokony ho tamin’ny ora fahasivy, dia niantso mafy i Jesosy hoe: “Ely, Ely, lamà sabaktany?”, izany hoe “Andriamanitro ô, Andriamanitro ô, nahoana no nahafoy ahy ianao?”+
47 Rehefa nandre izany ny sasany nijoro teo, dia niteny hoe: “Miantso an’i Elia ilehio.”+
48 Avy hatrany dia nihazakazaka naka spaonjy ny iray tamin’ireo, ary natsobony tao anaty divay marikivy+ izany ka nataony teo amin’ny bararata iray, dia nomeny hosotroin’i Jesosy.+
49 Hoy anefa ny hafa rehetra: “Avelao izy! Aoka hojerentsika raha ho avy hamonjy azy i Elia.”+ [[Naka lefona ny lehilahy hafa iray ka nanindrona ny takibany, dia nisy ra sy rano nivoaka.]]+
50 Ary niantsoantso mafy indray i Jesosy, dia tapitra ny ainy.+
51 Ary nitriatra roa hatrany ambony ka hatrany ambany ilay ridao+ tao amin’ny toerana masina,+ dia nihovotrovotra ny tany, ary nitresaka ny vatolampy.+
52 Nisokatra koa ny fasana ka maro ny faty nitsangana, dia ny fatin’ny olona masina izay efa nodimandry,*
53 ka hitan’ny olona maro.—Ary niditra tao amin’ny tanàna masina+ ny olona avy tany am-pasana, taorian’ny nitsanganan’i Jesosy.—
54 Fa rehefa nahita an’ilay horohoron-tany sy izay nitranga ilay manamboninahitra sy ireo niaraka taminy niambina an’i Jesosy, dia natahotra be ka nilaza hoe: “Zanak’Andriamanitra tokoa io.”+
55 Ankoatra izany, dia nisy vehivavy maro teo, nijery teny lavidavitra teny.+ Efa nanaraka an’i Jesosy nanomboka tany Galilia izy ireo mba hikarakara azy.+
56 Anisan’ireny i Maria Magdalena, ary koa i Maria renin’i Jakoba sy Josesy, ary ny renin’ny zanak’i Zebedio.+
57 Rehefa harivariva ny andro, dia nisy lehilahy mpanankarena iray nantsoina hoe Josefa, avy any Arimatia, izay mpianatr’i Jesosy koa,+
58 nankany amin’i Pilato ka nangataka ny fatin’i Jesosy.+ Ary nandidy ny hanomezana azy izany i Pilato.+
59 Koa nalain’i Josefa ny faty ka nofonosiny tao anaty lamba madio vita tamin’ny rongony tena tsara,+
60 dia napetrany tao amin’ny fasany+ vaovao nolavahany teo amin’ny vatolampy. Ary nanakodia vato be teo am-baravaran’ilay fasana izy, dia lasa.+
61 Fa i Maria Magdalena sy ilay Maria anankiray kosa nijanona teo ihany, nipetraka teo anoloan’ny fasana.+
62 Ny ampitson’iny, taorian’ny Andro Fiomanana,+ dia nivory teo anatrehan’i Pilato ny lehiben’ny mpisorona sy ny Fariseo
63 ka nilaza hoe: “Tompoko, tsaroanay izay nolazain’iny mpisandoka iny fony fahavelony hoe: ‘Hitsangana aho rehefa afaka telo andro.’+
64 Koa asaivo atao tsara ambina ny fasana hatramin’ny andro fahatelo, sao ho avy ny mpianany ka hangalatra+ azy ary hilaza amin’ny olona hoe: ‘Efa natsangana tamin’ny maty izy!’ Dia ho ratsy noho ny voalohany izany fisandohana farany izany.”
65 Koa hoy i Pilato taminy: “Manana mpiambina+ ianareo. Mandehana ataovy tsara ambina araka izay vitanareo ny fasana.”
66 Koa lasa izy ireo nanisy tombo-kase ny vato+ sy nametraka mpiambina mba hiarovana ny fasana.
Fanamarihana
^ A.b.t.: “ra marina.”
^ A.b.t.: “ran’io.”
^ A.b.t.: “Ho aminay sy ny zanakay ny rany.”
^ Tamin’ny 12 antoandro teo ho eo.
^ A.b.t.: “natory.”
