Mpitoriteny 9:1-18
9 Izao no noraketiko tato am-poko rehefa nanao fikarohana aho:+ Eo an-tanan’Andriamanitra ny olo-marina sy ny hendry, mbamin’ny asan’izy ireo.+ Samy tsy fantatry ny olombelona na ny fitiavana na ny fankahalana nisy talohany.+
2 Mitovy ny manjo ny olon-drehetra.+ Mitovy ny iafaran’ny+ marina+ sy ny ratsy fanahy,+ ny tsara fanahy sy ny madio ary ny tsy madio, ny manao sorona sy ny tsy manao. Mitovy ihany ny tsara fanahy sy ny mpanota,+ ary mitovy koa ny manao fianianana sy ny matahotra ny hanao fianianana.+
3 Izao no zava-mampahory hitako, amin’izay rehetra atao etỳ ambanin’ny masoandro: Feno faharatsiana ny fon’ny zanak’olombelona+ satria mitovy ihany ny iafaran’izy rehetra.+ Misy hadalana+ ao am-pony mandritra ny androm-piainany, ary avy eo dia lasa any amin’ny maty izy!+
4 Raha mbola anisan’ny velona ny olona iray dia mbola misy ny fanantenana, satria aleo alika velona+ toy izay liona maty.+
5 Fa fantatry ny velona fa ho faty izy,+ fa ny maty kosa tsy mahalala na inona na inona,+ sady tsy mahazo valin-kasasarana intsony, satria hadino izay nahatsiarovana azy.+
6 Efa foana koa ny fitiavany sy ny fankahalany ary ny fialonany.+ Tsy misy anjarany intsony amin’izay rehetra atao etỳ ambanin’ny masoandro.+
7 Mandehana, hano amim-pifaliana ny sakafonao, ary sotroy amin’ny fo falifaly ny divainao,+ satria sitrak’Andriamanitra ny asanao.+
8 Aoka ho fotsy foana ny akanjonao,+ ary aoka hisy menaka foana ny lohanao.+
9 Ankafizo ny fiainana iarahanao amin’ny vady malalanao,+ mandritra ny fiainana poakaty nomen’Andriamanitra anao etỳ ambanin’ny masoandro, eny, mandritra ny androm-piainanao, izay zava-poana ihany. Izany mantsy no valisoanao eo amin’ny fiainana+ sy valisoanao noho ny asa mafy isasaranao etỳ ambanin’ny masoandro.
10 Izay rehetra azon’ny tananao atao dia ataovy amin’ny herinao manontolo,+ fa tsy misy asa na eritreritra na fahalalana+ na fahendrena+ ao amin’ny Fasana,*+ izay toerana halehanao.+
11 Nandinika indray aho ka izao no hitako etỳ ambanin’ny masoandro: Tsy ny haingam-pandeha no mahazo fandresena,+ ary tsy ny mahery no mandresy,+ ary tsy ny hendry no manan-kanina,+ ary tsy ny mahira-tsaina no mahazo harena,+ ary tsy ny manam-pahalalana no mahazo sitraka,+ satria mety ho azon-tsampona izy rehetra amin’ny fotoana tsy ampoizina.+
12 Fa tsy fantatry ny olombelona+ ny fotoana ahafatesany.+ Toy ny trondro azon’ny harato+ mahafaty sy toy ny vorona azon’ny fandrika+ ny zanak’olombelona, izay voafandrika rehefa tonga tampoka+ aminy ny fotoana ahitan-doza.+
13 Izao koa no fahendrena hitako tetỳ ambanin’ny masoandro, ary nampiaiky volana ahy izany:
14 Nisy tanàna kely iray, nonenan’ny lehilahy vitsivitsy. Dia nisy mpanjaka lehibe iray tonga ka nanodidina an’ilay tanàna sy nanisy dongona goavana mba hanaovana fahirano azy.+
15 Ary nisy lehilahy nahantra nefa hendry tao, ary ny fahendreny+ no nahavoavonjy an’ilay tanàna. Tsy mba nisy nahatsiaro anefa io lehilahy nahantra io.+
16 Dia hoy aho: “Aleo fahendrena toy izay tanjaka.+ Hamavoina anefa ny fahendren’ny mahantra, ary tsy mba henoina ny teniny.”+
17 Ny teny malefaka avy amin’ny hendry dia misy lanjany kokoa+ noho ny antsoantson’ny mpitondra manjaka eo amin’ny adala.+
18 Aleo fahendrena toy izay fitaovam-piadiana. Ary afaka manimba zava-tsoa maro na dia mpanota iray monja aza.+
Fanamarihana
^ Heb.: sheôl. Jereo F.F. 3D.
