Ohabolana 12:1-28
12 Tia fahalalana izay tia anatra,+ fa tsy misaina kosa izay mankahala fananarana.+
2 Ankasitrahan’i Jehovah ny olona tsara toetra,+ fa homelohiny kosa izay manana sain-dratsy.+
3 Tsy hisy hanana fiainana milamina ny olona manao ratsy,+ fa ny marina kosa dia toy ny hazo mamaka tsara ka tsy mihozongozona.+
4 Satroboninahitry ny vadiny* ny vehivavy tsara toetra,+ fa toy ny lo mikiky ny taolan-dralehilahy kosa izy raha manao izay mahamenatra.+
5 Ara-drariny ny hevitry ny marina,+ fa fitaka kosa ny tari-dalana omen’ny ratsy fanahy.+
6 Ny tenin’ny ratsy fanahy dia vela-pandrika hoenti-mandatsa-dra,+ fa ny tenin’ny olo-mahitsy kosa no hanafaka azy.+
7 Aringana ny ratsy fanahy ka tsy misy intsony,+ fa haharitra kosa ny ankohonan’ny marina.+
8 Hoderaina ny olona mitandrina an’izay lazainy,+ fa hohamavoina kosa ny olona fetsifetsy.+
9 Aleo tsotsotra nefa manana mpanompo iray, toy izay miseho ho ambony nefa tsy manan-kohanina.+
10 Mitsimbina ny ain’ny biby fiompiny ny marina,+ fa fahasiahana kosa no mba famindram-pon’ny ratsy fanahy.+
11 Ho voky hanina izay miasa ny taniny,+ fa tsy ampy saina kosa izay mikatsaka zava-poana.+
12 Ny ratsy fanahy dia mitsiriritra ny biby azon’ny olon-dratsy tao anaty fandrika harato,+ fa ny fakan’ny olo-marina kosa manome voa.+
13 Nanao teny tsy nety ny olon-dratsy ka voafandrik’izany,+ fa tafavoaka amin’ny fahoriana kosa ny marina.+
14 Be ny soa raisin’ny olona avy amin’ny teny aloaky ny vavany,+ ary hivaly aminy ihany izay nataony.+
15 Amin’ny adala dia mety ny ataony,+ fa izay mandray torohevitra kosa no hendry.+
16 Ny olona adala no mampiseho avy hatrany ny fahasosorany,+ fa ny malina kosa mifehy tena mba tsy ho afa-baraka.+
17 Izay milaza zavatra azo antoka dia hanambara ny marina,+ fa fitaka kosa no lazain’ny vavolombelona mandainga.+
18 Misy manao teny tsy voahevitra, ka tonga toy ny fanindron’ny sabatra,+ fa ny tenin’ny hendry kosa manasitrana.+
19 Haharitra mandrakizay+ ny vava milaza ny marina,+ fa mihelina kosa ny lela fandainga.+
20 Fitaka no ao am-pon’izay mikendry hanao ratsy,+ fa ravoravo kosa izay mandala fihavanana.+
21 Tsy hisy zava-doza hanjo ny marina,+ fa ho maro be kosa ny loza hanjo ny ratsy fanahy.+
22 Maharikoriko an’i Jehovah ny molotra mandainga,+ fa mahafinaritra azy kosa ny olona tsy mivadika.+
23 Tsy mampideradera fahalalana ny malina,+ fa ny fon’ny tsisy saina kosa no mahatonga azy hamoaka ny hadalany.+
24 Ny mazoto no hahazo ny fitondrana,+ fa ny kamo kosa no hanao asa an-terivozona.+
25 Ny tebiteby ao am-pon’ny olona no mahakivy ny fony,+ fa ny teny soa kosa no mahafaly ny fony.+
26 Ny olo-marina mandinika tsara ny kijanany, ary ny ataon’ny ratsy fanahy ihany no mahadiso lalana azy.+
27 Tsy mety mihaza ny kamo,+ fa ny mazoto kosa harena sarobidy ho an’ny olona.
28 Midika ho fiainana ny lalan’ny fahamarinana,+ ary tsy mitarika ho amin’ny fahafatesana izany lalana izany.+
Fanamarihana
^ A.b.t.: “tompony.”
