Ohabolana 26:1-28
26 Hafahafa raha misy lanezy amin’ny fahavaratra, sy orana amin’ny fotoam-pijinjana,+ ary hafahafa koa raha ny adala no omem-boninahitra.+
2 Misy antony matoa mandositra ny vorona na manidina ny sidintsidina, dia toy izany koa fa tsy tongatonga ho azy ny ozona.+
3 Natao ho an’ny soavaly ny karavasy,+ ary ho an’ny ampondra ny lamboridy,+ fa ny tsorakazo natao ho an’ny lamosin’ny tsisy saina.+
4 Aza mamaly ny tsisy saina araka ny hadalany, sao hitovy aminy koa ianao.+
5 Valio araka ny hadalany ny tsisy saina, mba tsy hihevi-tena ho hendry izy.+
6 Toy ny olona manapaka ny tongony, sy mitera-doza ho an’ny tenany, ny olona manankina andraikitra amin’ny adala.+
7 Mahavita mantsaka rano ve ny olona malemy tongotra? Raha izany no izy, dia mba mahavita mampiasa ohabolana koa ny tsisy saina.+
8 Izay manome voninahitra ny tsisy saina,+ dia toy ny olona manototra vato iray amin’ny vato maro be.
9 Toy ny tsilo eny an-tanan’ny mamo ny ohabolana eo am-bavan’ny tsisy saina.+
10 Izay manakarama ny tsisy saina na manakarama ny mpandalo, dia toy ny mpandefa zana-tsipìka manatrobaka ny zava-drehetra.+
11 Toy ny alika miverina amin’ny loany, dia miverina amin’ny hadalany koa ny tsisy saina.+
12 Mahita olona mihevi-tena ho hendry ve ianao?+ Ny tsisy saina aza misy antenaina kokoa+ noho izy.
13 Hoy ny kamo: “Misy liona tanora eny an-dalana, ary misy liona eny an-tany malalaky ny tanàna.”+
14 Mihodina eo amin’ny savily ny varavarana, ary mihodina eo am-pandrianany ny kamo.+
15 Mangarona ny ao anaty vilia ny kamo, nefa mamizana azy ny hampakatra ny tanany ho ao am-bavany.+
16 Ny olona iray kamo dia mihevi-tena ho hendry+ mihoatra noho ny olona fito mahay mamaly.
17 Toy ny olona mihazona alika amin’ny sofiny ny mpandalo misafoaka noho ny adin’ny hafa.+
18 Toy ny adala mandefa zana-tsipìka mirehitra+ sy mahafaty,
19 dia toy izany koa izay mamitaka olona, nefa avy eo manao hoe: “Vazivazy fotsiny iny!”+
20 Maty ny afo rehefa tsy misy kitay, ary mitsahatra ny fifandirana rehefa tsy misy mpanendrikendrika.+
21 Toy ny saribao atao eo amin’ny vainafo sy toy ny kitay atao anaty afo ny olona tia fifandirana, satria mampirehitra ady.+
22 Ny tenin’ny mpanendrikendrika dia toy ny zavatra mampilendalenda atao teli-moka, ka midina avy hatrany any an-kibo.+
23 Toy ny ankoso-bolafotsy amin’ny silaka tanimanga ny olona manao teny feno fitiavana nefa ny fony feno fankahalana.+
24 Teny feno fihatsarambelatsihy no ataon’ny mpankahala, ary fitaka no ao am-pony.+
25 Aza matoky azy+ na dia manao teny malefaka aza izy,+ fa zavatra fito maharikoriko+ no ao am-pony.
26 Fitaka no entiny manafina ny fankahalany. Hibaribary eo anivon’ny fiangonana anefa ny toetra ratsiny.+
27 Izay mihady lavaka ihany no hilatsaka ao,+ ary izay manakodia vato ihany no hikodiavany.+
28 Ny mpandainga dia mankahala ny olona anaovany teny mandratra.+ Ary manimba olona ny teny fandokafana.+
