Ohabolana 9:1-18
9 Nanorina ny tranony+ ny tena fahendrena,+ ka nipai-bato hanaovana ny andry fito amin’ilay trano.
2 Namono biby hatao sakafo izy, sy nanisy fangarony ny divainy, ary namelatra latabatra.+
3 Naniraka ny ankizivavy mpanompony izy mba hiantsoantso eny amin’ny toerana avo ao an-tanàna hoe:
4 “Mivilia atỳ izay tanora fanahy.”+ Hoy koa izy tamin’izay tsy ampy saina:*+
5 “Avia hihinana ny mofo arosoko, sy hisotro ny divay efa nasiako fangarony.+
6 Ilaozy ny tanora fanahy mba ho ela velona ianao.+ Ary mandehana amin’ny lalan’ny fahiratan-tsaina, ka aza mivilivily.”+
7 Manala baraka ny tenany izay manitsy ny mpaniratsira.+ Ary hanan-tsiny izay mananatra ny ratsy fanahy.+
8 Aza mananatra ny mpaniratsira sao ho halany ianao.+ Anaro kosa ny hendry dia ho tiany ianao.+
9 Ampianaro ny hendry dia vao mainka ho hendry.+ Omeo fahalalana ny marina dia hitombo ny zavatra hainy.
10 Ny fahatahorana an’i Jehovah no fiandoham-pahendrena,+ ary ny fahalalana an’Ilay Masina Indrindra no atao hoe fahiratan-tsaina.+
11 Hahalava ny androm-piainanao aho,+ ary hahamaro ny taona iainanao.+
12 Raha hendry ianao, dia ianao ihany no handray soa amin’ny fahendrenao.+ Fa raha maniratsira kosa ianao, dia ianao ihany no hizaka ny vokany, eny, ianao irery.+
13 Be resaka ny vehivavy tsisy saina,+ mora ambakaina izy sady tsy mahalala na inona na inona.+
14 Mipetraka eo ambony seza eo am-baravaran’ny tranony izy, eny amin’ny toerana avo ao an-tanànany,+
15 mba hiantsoantso an’ireo mpandalo, dia ireo mandeha eny an-dalana. Miantsoantso izy hoe:+
16 “Mivilia atỳ izay tanora fanahy!”+ Hoy koa izy tamin’izay tsy ampy saina:*+
17 “Mamy ny rano nangalarina,+ ary tsara ny mofo hanina am-piafenana.”+
18 Tsy fantatr’ilay olona anefa fa ny maty, izay tsy mahefa na inona na inona, no ao. Tsy fantany fa ireo olona nantsoin-dravehivavy dia any amin’ny toerana iva, izany hoe ny Fasana.*+
