Romanina 1:1-32
1 Paoly, mpanompon’i+ Jesosy Kristy, voantso+ ho apostoly,+ ary voatokana hitory ny vaovao tsaran’Andriamanitra,+
2 dia ny vaovao tsara nambarany mialoha tamin’ny alalan’ny mpaminaniny,+ ao amin’ny Soratra Masina.
3 Izany vaovao tsara izany dia momba ny Zanany, izay avy amin’ny taranak’i Davida+ raha araka ny nofo,+
4 fa nambara tamin-kery+ ho Zanak’Andriamanitra+ kosa raha araka ny fanahy+ masina, tamin’izy natsangana tamin’ny maty.+ Eny, tsy iza izany fa i Jesosy Kristy Tompontsika,
5 izay nahazoanay hatsaram-panahy tsy manam-paharoa+ sy fanendrena ho apostoly,+ mba hahatonga ny firenena rehetra+ hino ka hankatò, ho voninahitry ny anarany.
6 Ary voantso avy teo amin’ireny firenena ireny koa ianareo mba ho an’i Jesosy Kristy.
7 Ho anareo rehetra any Roma, izay malalan’Andriamanitra sy voantso+ ho olona masina,+
Ho aminareo anie ny hatsaram-panahy tsy manam-paharoa sy ny fiadanana+ izay avy amin’Andriamanitra Raintsika sy Jesosy Kristy Tompo!+
8 Misaotra+ an’Andriamanitro amin’ny alalan’i Jesosy Kristy aho aloha noho ny aminareo rehetra, satria re laza+ eran’izao tontolo izao ny finoanareo.
9 Amin’ny foko manontolo no anaovako fanompoana masina ho an’Andriamanitra ka itoriako ny vaovao tsara momba ny Zanany. Ary Andriamanitra no vavolombeloko+ fa tsy mitsahatra mahatsiaro anareo amim-bavaka aho,+
10 sady mitalaho mba ho tonga soa aman-tsara any aminareo ihany, raha sitrapon’Andriamanitra.+
11 Maniry mafy hahita anareo mantsy aho,+ mba hampita fanomezana ara-panahy+ aminareo. Amin’izay dia ho mafy orina ianareo,
12 na, raha ny marimarina kokoa, dia hisy fifampaherezana+ eo amintsika, ka mba hampahery anareo ny finoako ary ny anareo kosa hampahery ahy.+
13 Tsy tiako tsy ho fantatrareo anefa, ry rahalahy,+ fa efa imbetsaka aho no nikasa hankatỳ aminareo+ mba hahazoako vokatra+ eo aminareo koa, tahaka ny eo amin’ny hafa firenena, kanefa voasakana aho hatramin’izao.
14 Manan-trosa amiko ny Grika sy ny tsy Grika, ny hendry+ sy ny tsy hendry:
15 Koa marisika hitory ny vaovao tsara+ aminareo izay any Roma+ koa aho.
16 Fa tsy menatra+ noho ny vaovao tsara aho, fa herin’Andriamanitra+ izy io ho famonjena izay rehetra mino,+ dia ny Jiosy aloha+ vao ny Grika koa.+
17 Ary amin’ny alalan’ny vaovao tsara no ampiharihariana ny fahamarinan’Andriamanitra.+ Izany dia vokatry ny fananana finoana+ ka vao mainka mampitombo finoana, araka ny voasoratra hoe: “Fa ny olo-marina dia ho velona noho ny finoany.”+
18 Fa aharihary avy any an-danitra ny fahatezeran’Andriamanitra,+ dia ny fahatezerany amin’ny asa ratsy sy ny tsy fahamarinana+ rehetra ataon’ny olona, izay mampiasa fomba tsy marina+ mba hisakanana ny fahamarinana.+
19 Miharihary eo amin’izy ireo mantsy izay azo fantarina momba an’Andriamanitra,+ satria nahariharin’Andriamanitra taminy izany.+
20 Fa ny toetrany tsy hita maso,+ izany hoe ny heriny+ mandrakizay sy ny maha Andriamanitra azy,+ dia hita mazava hatramin’ny namoronana izao tontolo izao,+ satria hita amin’ny zavatra nataony.+ Koa tsy afa-tsiny izy ireo,+
21 satria nahalala an’Andriamanitra, nefa tsy nanome voninahitra azy amin’ny maha Andriamanitra azy sady tsy nisaotra azy.+ Fa nanjary poakaty ny fomba fisainany,+ ary nanjary maizina ny fony feno hadalana.+
22 Na dia nanizingizina aza izy ireo fa hendry, dia nanjary adala,+
23 ka ny voninahitr’ilay+ Andriamanitra tsy mety lo dia nosoloany zavatra toy ny sarin’olona+ mety lo sy toy ny sary mampiseho vorona sy biby manan-tongotra efatra ary biby mandady.+
24 Koa navelan’Andriamanitra hanao fahalotoana araka ny fanirian’ny fony izy ireo,+ mba hahafa-baraka+ ny vatany.+
25 Nanakalo ny fahamarinan’Andriamanitra+ tamin’ny lainga+ ireo, ka nanompo zavatra noforonina sy nivavaka tamin’izany, fa tsy tamin’ny Mpamorona, izay isaorana mandrakizay. Amena.*
26 Izany no antony namelan’Andriamanitra azy hanaraka ny filan’ny nofo mahafa-baraka,+ fa nanova ny fanao voajanahary ho amin’ny fanao tsy voajanahary ny vehivavy teo aminy.+
27 Torak’izany koa fa na ny lehilahy aza namela ny fanao voajanahary amin’ny vehivavy,+ ary nanjary narehitry ny filana mafy dia mafy hanao zava-betaveta+ teo amin’izy samy lehilahy,+ ka nandray tao amin’ny tenany ny valin’izany rehetra izany,+ dia valiny sahaza azy noho ny fahadisoany.+
28 Koa satria tsy sitrak’izy ireo ny hahalala marina tsara+ an’Andriamanitra, dia navelan’Andriamanitra hanana toe-tsaina tsy ankasitrahany+ izy ireo, hanao zavatra tsy mendrika.+
29 Feno ny tsy fahamarinana+ rehetra mantsy izy ireo, eny, feno ny haratsiam-panahy+ rehetra sy ny fitsiriritana+ rehetra ary ny faharatsiana+ rehetra, sady feno fialonana+ sy famonoana olona+ sy fifamaliana+ sy fitaka+ ary hasomparana.+ Mpibitsibitsika+ izy ireo,
30 mpanaratsy,+ mpankahala an’Andriamanitra, mpanambany+ olona, mpanambony tena,+ matin-kambo,+ mpamorona zava-dratsy,+ tsy mpankatò ray aman-dreny,+
31 tsy misaina,+ tsy manaja fifanekena,+ tsy tia ny mpianakaviny,+ tsy misy antra.+
32 Fantany tsara tokoa ilay didin’Andriamanitra+ ara-drariny hoe mendrika ny ho faty+ izay mpanao ireo, nefa mbola manao ihany izy sady mankasitraka+ an’izay mpanao izany koa.
Fanamarihana
^ Midika hoe “Ho tanteraka anie izany!”
