Jeremia 39:1-18
39 Tamin’ny volana fahafolo, tamin’ny taona fahasivy nanjakan’i Zedekia mpanjakan’ny Joda, dia tonga nanao fahirano an’i Jerosalema i Nebokadnezara* mpanjakan’i Babylona sy ny tafiny manontolo.+
2 Noloahan’izy ireo ny mandan’ilay tanàna,+ tamin’ny andro fahasivin’ny volana fahefatra, tamin’ny taona faha-11 nanjakan’i Zedekia.
3 Dia niditra tao amin’ilay tanàna daholo ny andrianan’ny mpanjakan’i Babylona ka nipetraka teo amin’ny Vavahady Afovoany.+ Ireto avy izy ireo: I Nergala-sarezera Samgara, Nebo-sarsekima Rabsarisa,* Nergala-sarezera Rabmagy,* ary ny sisa rehetra tamin’ireo andrianan’ny mpanjakan’i Babylona.
4 Rehefa nahita azy ireo i Zedekia mpanjakan’ny Joda sy ny miaramila rehetra, dia nandositra+ niala tao an-tanàna tamin’ny andro alina. Tany amin’ny zaridainan’ny mpanjaka ny lalan’izy ireo, teo amin’ilay vavahady teo anelanelan’ny manda roa sosona. Ary nandeha tamin’ny lalana mankany Araba izy ireo.+
5 Nanenjika azy ireo anefa ny tafiky ny Kaldeanina, ka tratrany tao amin’ilay lemaka karakaina any Jeriko+ i Zedekia. Dia nosamborin’izy ireo izy ka nentiny niakatra tany amin’i Nebokadnezara* mpanjakan’i Babylona tao Ribla,+ tany Hamata.+ Tany ilay mpanjaka no namoaka didim-pitsarana momba azy.
6 Nasain’ny mpanjakan’i Babylona novonoina tao Ribla teo imason’i Zedekia ireo zanany lahy. Nasain’ny mpanjakan’i Babylona novonoina koa ny olona ambony rehetra tao Joda.+
7 Dia nopotsiriny ny mason’i Zedekia, ary nofatorany tamin’ny gadra varahina izy mba hoentina any Babylona.+
8 Nodoran’ny Kaldeanina avy eo ny tranon’ny* mpanjaka sy ny tranon’ny vahoaka,+ ary narodany ny mandan’i Jerosalema.+
9 Dia nentin’i Nebozaradana,+ lehiben’ny mpiambina, ny vahoaka sisa tao an-tanàna, sy ireo efa nitolo-batana tany aminy, ary izay olon-kafa sisa tavela, ka nataony sesitany tany Babylona.
10 Fa navelan’i Nebozaradana lehiben’ny mpiambina hijanona tao Joda kosa ny sasany tamin’ireo mahantra faraidiny, izay tsy nanana na inona na inona. Nomeny tanimboaloboka sy tany hovolena* koa izy ireo,+ tamin’izany andro izany.
11 Ary nanome baiko momba an’i Jeremia i Nebokadnezara* mpanjakan’i Babylona, ka hoy izy tamin’i Nebozaradana lehiben’ny mpiambina:
12 “Alaivo izy, dia karakarao. Aza manisy ratsy azy, fa ataovy izay angatahiny aminao.”+
13 Koa nandefa iraka i Nebozaradana lehiben’ny mpiambina, sy Nebosazbana Rabsarisa,* sy Nergala-sarezera Rabmagy,* ary ny manamboninahitra rehetran’ny mpanjakan’i Babylona,
14 mba haka an’i Jeremia tany amin’ny Tokotanin’ny Mpiambina.+ Dia natolony an’i Gedalia+ zanak’i Ahikama,+ zanak’i Safana,+ izy mba hoentiny any an-tranony. Koa niara-nonina tamin’ny vahoaka izy.
15 Tamin’i Jeremia mbola nogadraina tao amin’ny Tokotanin’ny Mpiambina,+ dia niteny taminy i Jehovah hoe:
16 “Mandehana lazao amin’i Ebeda-meleka+ Etiopianina hoe: ‘Izao no tenin’i Jehovah Tompon’ny tafika, Andriamanitry ny Israely: “Hotanterahiko ny teniko momba an’ity tanàna ity, dia ny hahatonga loza aminy fa tsy ny hanisy soa azy. Ary hahita maso an’izany ianao amin’izany andro izany.”’
17 “‘Hamonjy anao anefa aho amin’izany andro izany’, hoy i Jehovah, ‘ary tsy hatolotra eo an-tanan’ireo olona atahoranao ianao.’
18 “‘Fa tsy maintsy hataoko afa-mandositra ianao, ka tsy ho fatin’ny sabatra. Ary ny ainao no ho babonao,*+ satria natoky ahy ianao’,+ hoy i Jehovah.”
Fanamarihana
^ Abt: “Nebokadrezara”, fomba hafa nanoratana ny anarany.
^ Na: “I Nergala-sarezera, Samgara-nebo, Sarsekima, Rabsarisa”, araka ny fomba hafa nizarana ny teny hebreo.
^ Na: “lehiben’ny mpimasy (mpanandro).”
^ Abt: “Nebokadrezara”, fomba hafa nanoratana ny anarany.
^ Na: “lapan’ny.”
^ Na mety hoe “sy nampanaoviny asa an-terivozona.”
^ Abt: “Nebokadrezara”, fomba hafa nanoratana ny anarany.
^ Na: “lehiben’ny tandapa.”
^ Na: “lehiben’ny mpimasy (mpanandro).”
^ Na: “Ary ho avotra ny ainao.”
