Zakaria 6:1-15
6 Dia nijery indray aho ka nahita kalesy efatra nivoaka avy teo anelanelan’ny tendrombohitra roa, ary varahina ireo tendrombohitra ireo.
2 Mena ireo soavaly nitarika an’ilay kalesy voalohany, ary mainty ireo nitarika an’ilay faharoa.+
3 Soavaly fotsy kosa ireo nitarika an’ilay kalesy fahatelo, ary soavaly misy pentimpentina sy soavaly maramara+ no nitarika an’ilay fahefatra.
4 Hoy aho tamin’ilay anjely niresaka tamiko: “Inona ny dikan’ireo, tompoko?”
5 Dia hoy ilay anjely: “Ireo no fanahy efatry+ ny lanitra. Mivoaka avy eo anatrehan’ilay Tompon’ny tany manontolo izy ireo.+
6 Mivoaka ho any amin’ny tany any avaratra+ ilay kalesy tarihin’ireo soavaly mainty, ary ho any amin’ny tany eny ampitan’ny ranomasina ireo soavaly fotsy. Ireo soavaly misy pentimpentina kosa ho any amin’ny tany any atsimo.
7 Efa maika handeha hivezivezy eny ambonin’ny tany koa anefa ireo soavaly maramara.” Ary hoy ilay anjely: “Mandehana mivezivezy eny ambonin’ny tany.” Dia nivezivezy teny ambonin’ny tany izy ireo.
8 Dia niantso ahy izy ka niteny hoe: “Ireo soavaly nankany amin’ny tany any avaratra no nampitony an’i Jehovah any amin’ny tany any avaratra.”
9 Niteny tamiko indray i Jehovah hoe:
10 “Alaivo any amin’i Helday sy Tobia ary Jedaia ny zavatra nentin-dry zareo avy tany amin’ny olona tany an-tsesitany. Dia mankanesa any an-tranon’i Josia zanak’i Zefania, amin’io andro io ihany, miaraka amin’ireo olona avy tany Babylona ireo.
11 Makà volafotsy sy volamena ka manamboara satroboninahitra,* dia ataovy eo amin’ny lohan’i Josoa+ mpisoronabe, zanak’i Jozadaka, ilay izy.
12 Dia teneno izy hoe:“‘Izao no tenin’i Jehovah Tompon’ny tafika: “Ity ilay lehilahy antsoina hoe Tsimoka.+ Hitsimoka eo amin’izay misy azy izy, ka hanorina ny tempolin’i Jehovah.+
13 Izy no hanorina ny tempolin’i Jehovah, ary izy koa no hahazo voninahitra. Dia hipetraka eo amin’ny seza fiandrianany izy ka hanjaka. Ho mpisorona mipetraka eo amin’ny seza fiandrianany koa izy.+ Ary hifanaraka tsara ireo andraikiny roa ireo.
14 Ary hatao ao amin’ny tempolin’i Jehovah ilay satroboninahitra,* mba ho fahatsiarovana* an’i Helema sy Tobia sy Jedaia+ ary Hena, zanak’i Zefania.
15 Ary ho tonga ny avy lavitra, ka handray anjara amin’ny fanorenana ny tempolin’i Jehovah koa.” Dia ho fantatrareo fa i Jehovah Tompon’ny tafika no naniraka ahy ho atỳ aminareo. Ho tanteraka izany, raha tena mihaino ny tenin’i Jehovah Andriamanitrareo ianareo.’”
Fanamarihana
^ Na: “satroboninahitra tsara tarehy.”
^ Na: “satroboninahitra tsara tarehy.”
^ Na: “mba tsy hanadinoana.”
