Zakaria 7:1-14
7 Ary tamin’ny taona fahefatra nanjakan’i Dariosy Mpanjaka, dia niteny tamin’i Zakaria+ i Jehovah, tamin’ny andro fahefatry ny volana fahasivy, izany hoe ny volana Kisleo.*
2 Nirahin’ny mponin’i Betela i Sarezera sy Regema-meleka sy ny olony, mba hitady sitraka amin’i* Jehovah,
3 ka hanontany an’ireo mpisorona tao an-tranon’i* Jehovah Tompon’ny tafika sy hanontany ny mpaminany, hoe: “Tokony hitomany ve aho amin’ny volana fahadimy,+ ka hifady hanina hoatran’ny efa nataoko tao anatin’izay taona maro be izay?”
4 Niteny tamiko indray i Jehovah Tompon’ny tafika hoe:
5 “Lazao amin’ny olona rehetra eto amin’ity tany ity sy amin’ny mpisorona, hoe: ‘Nifady hanina sy nidradradradra ianareo tamin’ny volana fahadimy sy fahafito,+ nandritra ny 70 taona.+ Noho izaho tokoa ve anefa no nahatonga anareo hifady hanina tamin’ireny?
6 Rehefa nihinana sy nisotro ianareo, tsy ho an’ny tenanareo ihany ve no nanaovanareo an’izany?
7 Ary tsy tokony ho nankatò ny teny nolazain’i Jehovah tamin’ny alalan’ny mpaminany fahiny ve ianareo?+ Mbola nisy mponina tao Jerosalema sy tao amin’ny tanàna nanodidina azy tamin’izany, ary niadana izy ireo. Mbola nisy mponina koa i Negeba sy Sefela.’”
8 Niteny tamin’i Zakaria indray i Jehovah hoe:
9 “Izao no tenin’i Jehovah Tompon’ny tafika: ‘Mitsarà araka ny rariny,+ dia miezaha koa ho be fitiavana sy tsy hivadika+ ary hamindra fo aminareo samy ianareo.
10 Aza manambaka ny mpitondratena, na ny kamboty ray,+ na ny hafa firenena,+ na ny mahantra.+ Dia aza mamorona teti-dratsy ao am-ponareo avy ianareo, mba hamelezana ny namanareo.’+
11 Tsy nety nihaino mihitsy anefa izy ireo,+ sady mafy loha+ sy nanao be marenina.+
12 Nataony mafy toy ny vato* ny fony,+ dia tsy nankatoaviny ny lalàna* sy ny teny nolazain’i Jehovah Tompon’ny tafika tamin’ny alalan’ny fanahiny ka nasainy nampitain’ny mpaminaniny fahiny.+ Dia tezitra be i Jehovah Tompon’ny tafika.”+
13 “‘Koa satria tsy nihaino izy ireo rehefa niantso aho,*+ dia tsy hihaino koa aho rehefa miantso izy ireo’,+ hoy i Jehovah Tompon’ny tafika.
14 ‘Ary naparitako tamin’ny tafio-drivotra izy ireo ka niely eran’ny firenena rehetra tsy fantany.+ Dia tsy nisy mponina intsony ilay tany rehefa nilaozan’izy ireo, ka tsy nisy nandalo na niverina nankany.+ Lasa tsy nahafinaritra intsony ilay tany noho ny nataon’izy ireo, ka nihorohoro ny olona rehefa nahita azy io.’”
Fanamarihana
^ Abt: “mba hampitony ny tarehin’i.”
^ Na: “tao amin’ny tempolin’i.”
^ Ilazana diamondra na vato mafy hafa ilay teny hebreo eo.
^ Na: “toromarika.”
^ Abt: “izy.”
