Avy amin’ny teny hebreo hoe ʼamen midika hoe “ho tanteraka anie izany” na “izany tokoa anie”, io teny malagasy io sy ny teny grika hoe amen. Midika hoe “azo antoka; mendri-pitokisana” ny fototeny hebreo hoe ʼaman.

Toy izao avy no nampiasana ny hoe “Amena” ao amin’ny Soratra Hebreo: Rehefa manaiky an’izay voalaza ao amin’ny fianianana na fifanekena na manaiky izay ho vokany raha tsy mahatanteraka an’ilay izy (No 5:22; De 27:15-26; Ne 5:13), rehefa manaiky an’izay voalaza ao amin’ny vavaka (1Ta 16:36) na fiderana (Ne 8:6) na fikasana (1Mp 1:36; Je 11:5). Samy mifarana amin’ny hoe “Amena” ireo fizarana efatra voalohany ao amin’ny Salamo. Fanaon’ny fiangonan’Israely angamba ny niara-nanao hoe “Amena”, rehefa vita ny hira na salamo iray.​—Sl 41:13; 72:19; 89:52; 106:48.

Nadika hoe “mendri-pitokisana” ny teny hebreo hoe ʼaman rehefa ilazana an’i Jehovah (De 7:9; Is 49:7), ary hoe “azo itokisana” sy “azo antoka” rehefa ilazana ny fampahatsiahivany sy ny fampanantenany. (Sl 19:7; 89:28, 37) Antsoina hoe “Amena” i Kristy Jesosy, “ilay vavolombelona mendri-pitokisana sy marina”, ao amin’ny Soratra Grika Kristianina. (Ap 3:14) Nampiasa matetika ny teny grika hoe amen i Jesosy rehefa hilaza zava-misy, fampanantenana, na faminaniana, tamin’izy nitory sy nampianatra. Nadika hoe “marina tokoa” izy io, na hoe “marina dia marina tokoa” (naverina indroa) ao amin’ny bokin’i Jaona. (Jn 1:51) Nohamafisiny àry fa tena marina sy azo itokisana izay nolazainy. (Mt 5:18; 6:2, 5, 16; 24:34) Voalaza fa i Jesosy ihany no nampiasa ny hoe “amena” tamin’izany fomba izany ao amin’ny boky masina, noho ny fahefana nomen’Andriamanitra azy.​—Mt 7:29.

I Jesosy no ilay “Amena” (2Ko 1:19, 20), hoy i Paoly, satria nilaza ny marina izy, tena mpaminany sy mpitondra tenin’Andriamanitra, ary tanteraka taminy sy hotanterahiny ny fampanantenan’Andriamanitra rehetra. Tsy nivadika izy ary nankatò foana mandra-pahafatiny. Tsy maintsy ho tanteraka àry ny fampanantenana sy fikasan’Andriamanitra rehetra. I Jesosy no Fahamarinana, na antoka fa marina sy ho tanteraka ny fikasana efa nanaovan’Andriamanitra fianianana.​—Ampit. Jn 1:14, 17; 14:6; 18:37.

Nampiasa imbetsaka ny hoe “Amena” ireo nanoratra taratasy ao amin’ny Soratra Grika, indrindra fa i Paoly, rehefa nidera an’Andriamanitra (Ro 1:25; 16:27; Ef 3:21; 1Pe 4:11) na nirary ny hitahian’Andriamanitra an’izay nanoratany. (Ro 15:33; He 13:20, 21) Nanao hoe “Amena” koa ny mpanoratra rehefa nekeny izay voalaza.​—Ap 1:7; 22:20.

Mety ny manao hoe “Amena” amin’ny faran’ny vavaka, rehefa jerena ny vavaka ao amin’ny 1 Tantara 16:36 sy ny Salamo (41:13; 72:19; 89:52; 106:48) ary ireo taratasy anisan’ny Soratra Masina. Marina fa tsy nifarana tamin’ny hoe “Amena” ny vavaka nataon’i Davida ho an’i Solomona (1Ta 29:19), na ny vavak’i Solomona rehefa notokanana ny tempoly. (1Mp 8:53-61) Mety ho nisy niteny hoe “Amena” ihany anefa tamin’izay. (Mariho ny 1Ta 29:20.) Tsy voalaza koa hoe niteny izany i Jesosy (Mt 26:39, 42; Jn 17:1-26) na ny mpianany rehefa nivavaka. (As 4:24-30) Maro anefa ny porofo hitantsika teo fa mety ny manao hoe “Amena” rehefa vita ny vavaka. Nohamafisin’i Paoly fa niara-nanao hoe “Amena” ny Kristianina tafavory rehefa nifarana ny vavaka. (1Ko 14:16) Nanao toy izany koa ireo any an-danitra. (Ap 5:13, 14; 7:10-12; 19:1-4) Mety àry ny manao hoe “Amena” rehefa mivavaka na mianiana. Feno toky mantsy ireo miteny hoe “Amena”, ary tena manaiky an’izay voalaza sady manantena ao am-pony ao hoe ho tanteraka izany.