(Beolà) [Manan-tompo Satria Manambady].

Teny hebreo (Beʽolah) izay nataon’ny Baiboly sasany hoe “Bela” (JM) ao amin’ny Isaia 62:4, fa nataon’ny hafa kosa hoe “Vady ampakarina” (Prot., Kat., DIEM) na “Manan-tompo Satria Manambady” (TV).

Nafoy i Ziona, ilay vehivavy an’ohatra, rehefa noravan’ny Babylonianina i Jerosalema ary lao tanteraka i Joda. Naminany anefa i Isaia fa hiverina ho toy ny taloha sy honenana indray ilay tany, ary tena zava-dehibe tamin’ny Jiosy natao sesitany tany Babylona sy ireo anisan’ny Israely ara-panahy io faminaniana io. Tsy ho “vady nafoy tanteraka” intsony i Ziona ary tsy ho lao intsony ilay tany, araka ilay fampanantenan’i Jehovah hoe: “Hantsoina kosa ianao hoe Sitrako Izy [heb.: Heftsi-vah], ary ny taninao hoe Manan-tompo Satria Manambady [heb.: Beʽolah]. Fa hankasitraka anao i Jehovah, ary ny taninao hanan-tompo satria manambady.” Hafahana avy ao Babylona ireo ‘zanak’i’ Ziona, ka honina indray ao amin’ ilay tany. Toy ny hoe ‘haka azy io ho vady’ izy ireo ‘ka ho lasa tompony.’ Ho vaovao ny toe-javatra hisy an’i Ziona na Jerosalema, fa tsy ho lao toy ny taloha intsony izy. Hankasitrahan’i Jehovah indray àry i Ziona, ka hantsoina hoe “Sitrako Izy” ary ny taniny hoe “Manan-tompo Satria Manambady.”​—Is 62; ampit. Is 54:1, 5, 6; 66:8; Je 23:5-8; 30:17; Ga 4:26-31.