(Elisà).

Zanakalahin’i Javana sady lohan’ny fianakaviambe. Avy aminy “no nielezan’ny mponin’ny nosin’ireo firenena.” (Ge 10:4, 5; 1Ta 1:7) Ao amin’ilay hira fisaonana an’i Tyro indray ny Baiboly vao miresaka an’i Elisaha. Aseho ho toy ny tany na firenena nanao raharaham-barotra tamin’i Tyro izy ao. Oharina amin’ny sambo namboarina tamin’ny akora avy tamin’ny firenena maro i Tyro. Anisan’ireny firenena ireny “ireo nosy Elisaha” izay namatsy “kofehy manga sy volonondry nolokoana volomparasy somary mena” (angamba nanaovana karazana labasy hiarovana tamin’ny hainandro sy orana) handrakofana ny tokotanin-tsambony.​—Ezk 27:1-7.

Nilaza i Josèphe, Jiosy mpahay tantara tamin’ny taonjato voalohany, fa ny Halisianina (Eolianina), izay anisan’ny razamben’ny firenena grika, no Halisa (Elisaha). (Rakitry ny Ela Jiosy, I, 127 [vi, 1]) Ny ampahany tamin’ny morontsiraka andrefan’i Azia Minora ihany no nantsoina hoe Eolia, tamin’ny andron’i Ezekiela. Mitovitovy amin’ny hoe Elisaha ny anaran’ilay faritra antsoina hoe Elisa, eo amin’ny morontsiraka avaratrandrefan’i Peloponezy (faritra atsimon’ilay saikinosy any Gresy). Fantatra koa fa nisy Grika nanorim-ponenana tany amin’ny faritra atsimon’i Italia sy ny nosy Sisila, ary hazavain’ny Targoma Aramianina fa “faritanin’i Italia” ilay Elisaha ao amin’ny Ezekiela 27:7. Mety ho ny iray amin’ireo toerana ireo tokoa ilay resahin’ny Ezekiela, satria faritra mpamokatra loko volomparasy be mpitia daholo ireo. Tsy fantatra marina anefa hoe iza amin’ireo no Elisaha, fa azo inoana kokoa hoe tany Gresy no nisy azy, fa tsy tany Afrika Avaratra na Sipra. Mety ho tsy nijanona tao amin’ny toerana iray koa ny taranak’i Elisaha, fa nifindra monina rehefa nandeha ny fotoana. Mety ho nitatra koa anefa ny toeram-ponenany, ka faritra maro samy hafa no nantsoina hoe Elisaha tatỳ aoriana.