NIRAHIN’I Jehovah hiseho teo anatrehan’i Farao i Mosesy, mba hiteny amin’ny anaran’i Jehovah hoe: “Alefaso ny oloko.” (Ek 5:1) Tsy nety anefa i Farao. Tsy te hamoy andevo maro be mantsy izy. Tsy fantany na tsy nekeny koa hoe i Jehovah no tena Andriamanitra. (Ek 5:2) Nivavaka tamin’ireo andriamanitr’i Ejipta mantsy i Farao ary nihevi-tena ho andriamanitra mihitsy koa. Iza marina àry no tena Andriamanitra? Nampihatra didim-pitsarana tamin’ireo “andriamanitra rehetran’i Ejipta” i Jehovah rehefa nandefa loza folo. Nafahan’i Farao àry ny Israelita ary voaporofo fa i Jehovah no tena Andriamanitra velona.​—Ek 12:12.

Niala tao Ramesesa any Ejipta ny vahoakan’Israely tamin’ny 15 Nisana 1513 T.K. Niantsinanana izy ireo, ary azo antoka fa niaraka taminy ny Israelita avy any Gosena. Rehefa tonga tany Etama izy ireo, dia nasain’i Jehovah ‘niverina, ka hitoby eo akaikin’i Pihahirota, eo akaikin’ny ranomasina.’ Noheverin’ny Ejipsianina fa tsy nahita lalana ilay vahoaka. (Ek 13:20; 14:1-3) Toa tapi-dalan-kaleha izy ireo, satria teo anelanelan’ny Ranomasina Mena sy ny tendrombohitra, nefa ny kalesin’adin’ny Ejipsianina koa tao aoriany. Tamin’izay indrindra i Jehovah no namonjy azy ireo sy nandringana an’i Farao sy ny tafiny. (Ek 14:13-31) Nasehony fa tena mahery Izy, ary nanjary noresahina “eran-tany” iny zavatra nataony ho an’ny Israely iny. ​—Ek 9:16; Js 2:10; 9:9.