Fanavahana ho amin-java-kendrena masina. Midika hoe “tsy manakaiky; miala” ny matoanteny hebreo hoe nazar (voatokana). (Le 22:2; Ezk 14:7) Ny teny hebreo hoe nezer kosa no ilazana an’ilay famantarana masina natao teo amin’ny lohan’ny mpisoronabe na izay voahosotra ho mpanjaka, mba hahalalana hoe voatokana izy. Ilazana ny Nazirita koa io teny io.​—No 6:4-6.

Nampanaovina satroka lamba rongony i Arona rehefa napetraka teo amin’ny toeran’ny mpisoronabe. Nafatotra tamin’ny kofehy manga teo amin’ilay satroka ny “famantarana masina hoe voatokana [nezer].” Takela-bolamena tsy misy fangarony izy io, ary nasiana soratra tamin’ny teny hebreo hoe: “An’i Jehovah ny fahamasinana.” Norarahana menaka masina fanosorana avy eo ny lohan’ilay mpisoronabe. (Ek 29:6, 7; 39:30, 31; Le 8:9, 12) Nila nitandrina foana izy mba tsy hanazimbazimba ny toerana masina, ‘satria teo aminy ilay famantarana hoe voatokana izy, dia ilay menaka fanosorana avy amin’Andriamaniny.’​—Le 21:12.

Ilazana ny “diadema” koa ilay hoe nezer. Satroboninahitra nanaovan’izay voahosotra ho mpanjakan’ny Israely izy io, ho famantarana fa masina ny andraikiny.​—2Sa 1:10; 2Mp 11:12; 2Ta 23:11; Sl 89:39; 132:18, f.a.p.; Oh 27:24.

Tsy nahazo nanapa-bolo na niharatra ny olona nivoady tamin’i Jehovah ho Nazirita, raha mbola tsy afaka tamin’ny voady nataony. Ny volony lava àry no famantarana fa Nazirita (nezer) izy. (No 6:4-21) Noharin’i Jeremia mpaminany tamin’ny olona nivadika tamin’ny voady masina nataony tamin’i Jehovah i Jerosalema, ka hoy izy: “Hetezo ny volonao lava [na “volonao voatokana”; nizrek, endriny hafa amin’ny hoe nezer] ka ario.” (Je 7:29) Nilaza koa i Jehovah fa “nanaraka an’i Balan’i Peora” ny Israely nivadika, “sady nanokan-tena [vaiyinnazero, endriny hafa amin’ny hoe nazar] ho an’ilay zava-mahamenatra.”​—Ho 9:10.

Anisan’ny zavatra voatokana resahin’ny Soratra Grika Kristianina ny “fetin’ny fitokanana” (enkainia) izay nankalazaina isaky ny ririnina. (Jn 10:22; jereo FETIN’NY FITOKANANA.) Iray ihany ny fototenin’ilay hoe enkainia sy ny hoe enkainizô ao amin’ny Hebreo 9:18 izay nadika hoe “nohamasinina” (Prot., Kat., JM), na “nanan-kery” (TV) na “nosantarina” (DIEM). Misy koa nandika azy io hoe “natokany” (Prot., JM) ao amin’ny Hebreo 10:20, fa ny hafa indray nanao hoe “nosantariny” (Kat., TV). Noresahin’i Jesosy ny amin’ny fampianaran’ny Fariseo momba ilay hoe “korbana”, na fanomezana voatokana ho an’Andriamanitra. (Mr 7:11; Mt 15:5; jereo KORBANA.) Nampitandrina koa izy fa harodana ny tempolin’i Heroda izay noravahana tamin’ny ‘vato tsara sy zavatra voatokana [anatemasin] ho an’Andriamanitra.’​—Lk 21:5, 6.