(Farpàra).

Iray amin’ireo “reniranon’i Damaskosy” nolazain’i Namàna fa tsara noho “ny rano rehetran’ny Israely.” (2Mp 5:12) Kely kokoa noho i Abana angamba izy io, matoa notononiny faharoa. Maro no mihevitra azy io ho Nahr el-ʼAʽvaj. Io ihany no renirano (tsy sampana renirano hafa) any amin’ny faritr’i Damaskosy, ankoatra an’i Nahr Barada (heverina fa i Abana). Kely kokoa noho i Barada i ʼAʽvaj, satria ampahefany eo ho eo monja. Misy sakelidrano vitsivitsy mipoitra avy amin’ny ilany atsinanan’ny tehezan-tendrombohitr’i Hermona, ary ireo no mitambatra ho Reniranon’i ʼAʽvaj, 30 km eo ho eo atsimoandrefan’i Damaskosy. Hady lalina be vato no lalan’ilay renirano manomboka eo, ary miafara any amin’ilay heniheny any atsimoatsinanan’i Damaskosy izy io. Tokony ho 64 km eo ho eo ny halavan’ilay renirano (hatrany amin’ny loharanony), raha refesina mahitsy.

Tsy ny rehetra anefa no manaiky hoe i ʼAʽvaj no Farpara. Tsy anisan’ny “reniranon’i Damaskosy” mantsy, hono, i ʼAʽvaj satria 15 km eo ho eo atsimon’ilay tanàna no misy azy. Misy àry milaza fa i Nahr Taora, iray amin’ny sampan’i Nahr Barada, no Farpara. Mety ho anisan’ilay Damaskosy noresahin’i Namàna koa anefa ny Lemak’i Damaskosy, izay ikorianan’i Nahr el-ʼAʽvaj.