TENA soa tokoa ilay tany nomen’Andriamanitra ny Israely. Io ilay Tany Nampanantenaina. Naniraka mpitsikilo i Mosesy mba hijery taratra azy io sy hialoha an’ilay firenena. Nasainy naka santionany tamin’ny vokatry ny tany koa izy ireo, ka nitondra aviavy, sy ampongabendanitra, ary sampahom-boaloboka lehibe izay nentin’ny roa lahy tamin’ny bao filanjana! Natahotra izy ireo satria tsy ampy finoana, nefa niaiky ihany fa “tena tondra-dronono sy tantely tokoa” ilay tany.​—No 13:23, 27.

Nanome toky an’ilay vahoaka ny mpitondra tenin’i Jehovah, taloha kelin’ny hidiran’izy ireo tao amin’ilay tany. Hoy izy: “Efa hampiditra anao ao amin’ny tany soa i Jehovah Andriamanitrao. Tany be lohasaha falehan-driaka misy rano izy io, sady misy loharano sy rano lalina avy any amin’ny lemaka sy ny faritra be tendrombohitra; tany misy varimbazaha sy vary orza sy voaloboka sy aviavy sy ampongabendanitra sy oliva fanaovana menaka, ary tany misy tantely. ... Tsy ho ory na inona na inona [ianao]. Feno vy ny vato ao amin’izany tany izany, ary ao amin’ny tendrombohiny no hitrandrahanao varahina.” (De 8:7-9) Mbola mamokatra be foana ilay tany hatramin’izao.

Mahaliana antsika ny hakanton’ilay Tany Nampanantenaina fahiny. Nahoana? Satria ny fitahiana be dia be nomen’i Jehovah ny Israely fahiny no indramin’ny faminaniana momba ny Mesia mba hampisehoana izay hataon’Andriamanitra ho an’ny olombelona rehefa hitondra i Jesosy Kristy, ilay “Andrianan’ny Fiadanana.”​—Is 9:6; Sl 67:4-7; 72:16.