Lalana tany Damaskosy, any Syria. (As 9:10, 11; SARY, Boky Faha-2, p. 748) Tamin’ny andron’ny Romanina, dia lalambe tokotokony ho 1,5 km izy io, ary namakivaky an’ilay tanàna avy tany atsinanana nankany andrefana. Tena lalambe izy io satria 26 m teo hoe eo ny sakany: Teo afovoany ny lalana natao ho an’ny kalesy, ary 15 m teo ho eo ny sakan’izy io, ary teo amin’ny andininy roa ny lala-mitafo ho an’ny mpandeha an-tongotra. Mbola antsoin’ny Arabo hoe Darb al-Mostakim (Imahitsy) ihany izy io. Tsy tena mahitsy be intsony anefa izy io. Miankandrefana izy io raha vao miala eo amin’ny Vavahady Atsinanana. Teo amin’io lalana fahiny io no nisy ny tranon’ilay lehilahy natao hoe Jodasy. Nijanona tao kelikely i Saoly avy any Tarsosy, rehefa avy niseho taminy i Jesosy Kristy nomem-boninahitra. Niseho tamin’i Ananiasy mpianany koa i Jesosy, ary naniraka azy ho any amin’ilay trano teo amin’ilay “lalana atao hoe Imahitsy” mba hanasitrana ny mason’i Saoly.​—As 9:3-12, 17-19.