FIRENENA ratsy fitondran-tena no tao amin’ilay tany nampanantenain’i Jehovah an’i Abrahama fa homeny ny Israely. Resahin’ny Baiboly fa nodidian’Andriamanitra handringana an’ireny firenena ratsy fanahy ireny ny Israelita. (De 7:2) Maro no milaza fa tsy mety ny nataon’Andriamanitra. Ny olona manetry tena kosa miaiky fa tsy anjaran’olombelona tsy lavorary ny mitsara azy. (Ampit. Ezk 18:29.) Tian’izy ireo hofantarina kosa ny antony nanaovan’Andriamanitra izany.

Takatr’izy ireo avy amin’ilay fitantarana fa afaka manao ampamoaka na iza na iza i Jehovah Andriamanitra, ilay Mpamorona, na mino azy izy ireny na tsia. Manam-paharetana izy, nefa koa tsy manakimpy ny masony manoloana ny fanaovan-dratsy. (Ge 15:16) Nankininy ho andraikitry ny ray aman-dreny ny ankizy madinika. Tsy tiany izy ireo hihevitra hoe tsy hisy fiantraikany amin-janany ny zavatra ataony. (De 30:19; Js 10:40) Tsy haringany kosa anefa izay rehetra miala amin’ny fanao ratsy ka manompo azy.​—Js 6:25; 9:3–10:11.

Resahin’ny Baiboly mazava tsara ireo fanao ratsin’ny Kananita. Hoy àry ilay boky hoe Ny Boky Ara-baiboly Nosoratan’i Halley (1964, p. 161): “Manontany tena ireo nanao fikarohana tany amin’ny tanàna kananita efa ravarava hoe nahoana Andriamanitra no tsy nandringana azy ireo taloha kokoa.” Tsy milefitra mandrakizay amin’ny faharatsiana tokoa i Jehovah.