(Kebàra) [avy amin’ny teny babylonianina, ary midika hoe “(Lakandrano) Lehibe”].

‘Renirano’ tany amin’ny “tanin’ny Kaldeanina.” Teo amoron’izy io ny Jiosy tany Tela-abiba no natao sesitany. (Ezk 1:1-3; 3:15) Toa tamin’ny heviny malalaka no nampiasan’i Ezekiela ny teny hebreo hoe nahar (nadika hoe ‘renirano’), rehefa nilaza izy hoe “reniranon’i Kebara.” Tiany holazaina tamin’izany mantsy ireo lakandrano maro be nifanapaka teo amin’ilay faritra lonaka, teo anelanelan’ny reniranon’i Eofrata sy Tigra tany atsimo kokoa. Midika ho renirano na lakandrano koa ny teny babylonianina mifanitsy amin’ny nahar. Tsy fantatra hoe taiza marina no nisy an’i Kebara.

Milaza anefa ny ankamaroan’ny mpahay jeografia momba ny Baiboly, fa i Shatt en-Nil no “reniranon’i Kebara.” I Shatt en-Nil, hono, ilay naro Kabaro (na “Lakandrano Lehibe”) noresahin’ny fifanekena tao amin’ny takelaka misy soratra miendri-pantsika, hita tao amin’ny tanànan’i Nippour (85 km eo ho eo atsimoatsinanan’i Babylona). I Shatt en-nil no sampan’i Eofrata eo avaratr’i Babylona. Mianatsimoatsinanana io sampany io, mandalo eo akaikin’i Nippour, ary avy eo mivarina any Eofrata indray eo atsimon’i Ora, 240 km eo ho eo atsimon’i Babylona.

Tao Tela-abiba, teo amoron’ny reniranon’i Kebara, i Ezekiela mpaminany no voalohany nahita fahitana, tamin’ny 613 T.K. Tsy nahateny tsy nahavolana nandritra ny fito andro izy vokatr’izany. Teo koa izy no voatendry ho “mpitily ho an’ny taranak’Israely.” (Ezk 1:1–3:21) Nampahatsiahy azy an’izay hitany teo amoron’i Kebara ny fahitana hafa azony tatỳ aoriana.​—Ezk 10:15, 20, 22; 43:3.