(Keìla).

Tanàna voaro mafy tany Sefela, tany Joda. (Js 15:20, 33, 44; 1Sa 23:7) Ny taranak’i Kaleba angamba no nanorina azy io, na nifehy azy io nandritra ny fotoana kelikely. (1Ta 4:15, 19) Maro no milaza azy io ho i Kirbet Kila (Keila), izay eo an-tampon-kavoana, tokotokony ho 14 km any avaratrandrefan’i Hebrona. Mbola misy fambolem-bary toy ny tany Keila fahiny ihany ankehitriny any akaikin’i Kirbet Kila.​—Ampit. 1Sa 23:1.

Namonjy an’i Keila tsy ho azon’ny Filistinina i Davida, tamin’izy nenjehin’i Saoly Mpanjaka. Voatery niala tao anefa izy sy ireo lehilahy niaraka taminy, mba tsy hatolotry ny mponin’i Keila ho eo an-tanan’ny tafik’i Saoly.​—1Sa 23:5, 8-13.

Nonenana indray ilay tanàna taorian’ny sesitany tany Babylona. Rehefa namboarina indray ny  simba tamin’ny mandan’i Jerosalema, tamin’ny andron’i Nehemia, dia efa nizara roa ny faritanin’i Keila, ka samy nanana ny ‘andrianany’ avy izy ireo.​—Ne 3:17, 18.