Ny faritra malemy eo ambanin’ny tratra ary misy ny vavony sy ny aty ary ny tsinay.

Ampiasaina hilazana an’io faritra amin’ny vatana io ilay teny hebreo hoe beten. (Mpts 3:21, 22; Oh 13:25) Ampiasaina hilazana ny fitondrana vohoka koa anefa ny beten, satria naloaky ny kibo ny zanaka. (Ge 25:23, 24; Jb 1:21; Sl 127:3; Mpto 11:5; Is 44:2; Ho 9:11) Teny hebreo hafa hoe rehem (na raham) kosa no ilazana ny vohoka. Izao, ohatra, no voalazan’ny Joba 31:15: “Tsy Ilay nanamboatra ahy tao am-bohoka ihany ve no nanamboatra azy koa? Ary tsy Iray ihany ve no namolavola anay tao am-bohoka?”​—Jereo koa Ge 49:25, f.a.p.; Sl 22:10; Oh 30:16.

Ampiasaina eo amin’ny resaka taotrano koa ilay teny hebreo hoe beten (kibo) ao amin’ny 1 Mpanjaka 7:20, mba hilazana zavatra mibontsina na mivohitra.

Ilay teny grika hoe kôilia izay midika hoe lavaka no nadika hoe ‘kibo’ (1Ko 6:13; Fi 3:19; Lk 1:15, 41), “tsinay” (Mt 15:17), ‘ao anaty ao’ (Jn 7:38), arakaraka ny zavatra resahina.

Ampiasaina an’ohatra koa ny hoe ‘kibo’, ka hilazana fahazotoan-komana na fanirian’ny nofo (Ro 16:18; Fi 3:19), sy ny fiavian’ny fitenenana sy adihevitra. (Jb 32:18, 19) Nantsoin’i Jona hoe Fasana ny kibon’ilay trondro ngezabe. Hoy izy: “Tao an-kibon’ny Fasana aho no niantso vonjy.” Toy ny hoe maty mantsy izy raha tsy nanao fahagagana i Jehovah mba hanafahana azy avy tao.​—Jo 2:2; jereo KIBO, VOHOKA; TSINAY.