Avy amin’ny hoe kaskassim (heb., mr.; tkn.: kaskeset) sy hoe lepis (gr.) ny hoe kira, izay takelaka manify sy henjana mandrakotra ny vatan’ny trondro sy biby mandady maro. Madio ka azo nohanina ‘izay rehetra misy vombony sy kirany ao anaty rano’, hoy ny Lalàna, tsy hoatran’ireo tsy nisy vombony sy kirany ka “zava-maharikoriko.” (Le 11:9, 10, 12; De 14:9, 10) Ny kirany àry no namantarana avy hatrany hoe azo nohanina ny trondro iray. Misy karazany efatra ny kiran-trondro, fa ireo misy sisiny mikinifinify toy ny an’ny fihogo, sy ireo misy sisiny boribory no tena fahita. Milahatra sy mifanindry ny kirany, izay manify sy maivana ary azo aforitra.

Mampiasa ny hoe kaskassim koa ny Ezekiela 29:4, ary toa ohariny amin’ny voay i Faraon’i Ejipta. Rakotra tandroka fisaka mafy milentika ao anaty hodiny ny vatan’ny voay. Toa miresaka kiram-boay (JM, TV) koa ny Joba 41:15-17 (41:7-9, Prot.), ka ny teny hebreo adika matetika hoe “ampinga” no ampiasaina ao.​—Jereo LEVIATANA.

Akanjo mifono vy nisy takelaka toy ny kiran-trondro. Nasiana takela-by kely nifanindritsindry toy ny kiran-trondro (heb.: kaskassim [mr.]; tkn.: kaskeset) nefa tsy henjana be ny akanjo fiarovan-tratra sasany.​—1Sa 17:5; jereo FIADIANA, FITAOVAM-PIADIANA (Akanjo mifono vy).

Kiran-trondro tamin’ny mason’i Paoly. Lasa jamba i Paoly rehefa nisehoan’i Jesosy. Nisy “zavatra toy ny kiran-trondro” nilatsaka avy tamin’ny masony, rehefa sitrana izy. (As 9:18) Tsy nisy akory io zavatra io, hoy ny manam-pahaizana sasany, fa te hilaza fotsiny ilay andininy hoe nahita indray i Paoly. Lazain’ny Baiboly maoderina maromaro anefa fa tena nisy zavatra nilatsaka avy tamin’ny mason’i Paoly.​—DIEM, FFBF, Prot., TV.